IPL 2020: ಐಪಿಎಲ್ 2020ರಲ್ಲಿ ಬಿಸಿಸಿಐ ಗಳಿಸಿದ ಲಾಭವೆಷ್ಟು?: ಅಧಿಕೃತವಾಗಿ ಹೊರಬಿತ್ತು ಲೆಕ್ಕಾಚಾರ

ಐಪಿಎಲ್ 2020ಕ್ಕೆ ತೆರೆಬಿದ್ದಿದ್ದು ವಿದೇಶದಲ್ಲಿ ಆಯೋಜಿಸಿ ಬಿಸಿಸಿಐ ಎಷ್ಟರ ಮಟ್ಟಿಗೆ ಯಶಸ್ಸು ಸಾಧಿಸಿದೆ ಎಂಬ ಲೆಕ್ಕಾಚಾರ ಶುರುವಾಗಿದೆ. ಹೀಗಿರುವಾಗಲೇ ಸ್ವತಃ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ಈ ವಿಚಾರವನ್ನು ಬಹಿರಂಗ ಪಡಿಸಿದೆ.

ಕೊರೋನಾ ವೈರಸ್ ತಾಂಡವವಾಡುತ್ತಿದ್ದ ಕಾರಣ 13ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯನ್ನು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ ದೂರದ ಯುಎಇನಲ್ಲಿ ಆಯೋಜನೆ ಮಾಡಿತ್ತು. ಇದರಲ್ಲಿ ಬಿಸಿಸಿಐ ಅಭೂತಪೂರ್ವ ಯಶಸ್ಸು ಕೂಡ ಕಂಡಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಬಿಸಿಸಿಐ ಖಜಾಂಚಿ ಅರುಣ್ ಧುಮಾಲ್, ನಾವು ಕೊರೋನಾ ಮಧ್ಯೆ ಐಪಿಎಲ್ 2020 ಆಯೋಜಿಸಿ 4,000 ಕೋಟಿ ಆಧಾಯ ಗಳಿಸಿದ್ದೇವೆ ಎಂದಿದ್ದಾರೆ. ಅಲ್ಲದೆ ನಮ್ಮ ಟಿವಿ ವೀಕ್ಷಣೆಯಲ್ಲಿ ಶೇ. 25 ರಷ್ಟು ಹೆಚ್ಚಾಗಿದೆ. ಮುಂಬೈ-ಚೆನ್ನೈ ನಡುವಣ ಓಪನಿಂಗ್ ಪಂದ್ಯ ಐಪಿಎಲ್ ಇತಿಹಾಸದಲ್ಲೇ ಅತಿ ಹೆಚ್ಚು ವೀಕ್ಷಣೆ ಕಂಡ ಉದ್ಘಾಟನಾ ಪಂದ್ಯ ಎಂದು ತಿಳಿಸಿದ್ದಾರೆ.

ಈ ಬಾರಿಯ ಐಪಿಎಲ್ ಅನ್ನು ಯುಎಇನ ದುಬೈ, ಶಾರ್ಜಾ ಮತ್ತು ಅಬುಧಾಬಿಯ ಒಟ್ಟು 3 ಕ್ರೀಡಾಂಗಣದಲ್ಲಿ ಆಯೋಜಿಸಲಾಗಿತ್ತು. ಸೆಪ್ಟೆಂಬರ್ 19ರಿಂದ ಆರಂಭವಾಗಿ ನವೆಂಬರ್ 10ರವರೆಗೆ ಟೂರ್ನಿ ನಡೆದಿತ್ತು.

ಫೈನಲ್ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಮುಂಬೈ ಇಂಡಿಯನ್ಸ್ ತಂಡ ಭರ್ಜರಿ ಗೆಲುವು ಸಾಧಿಸಿ ದಾಖಲೆಯ ಐದನೇ ಬಾರಿ ಪ್ರಶಸ್ತಿಗೆ ಮುತ್ತಿಟ್ಟಿತು.

ಭಾರತದಲ್ಲಿ ಕೋವಿಡ್-19ನಿಂದ ಐಪಿಎಲ್ ಸಂಪೂರ್ಣ ರದ್ದಾಗಿದ್ದರೆ ಬಿಸಿಸಿಐ ಬರೋಬ್ಬರಿ 4,000 ಕೋಟಿ ರೂಪಾಯಿಗಳ ನಷ್ಟ ಅನುಭವಿಸುತ್ತಿತ್ತು. ಇದೇ ಕಾರಣಕ್ಕೆ ವಿದೇಶದಲ್ಲಾದರೂ ಟೂರ್ನಿಯನ್ನು ನಡೆಸುವ ಅನಿವಾರ್ಯ ಬಿಸಿಸಿಐಗೆ ಎದುರಾಗಿತ್ತು.

ಅದರಂತೆ ಯುಎಇ ಐಪಿಎಲ್ 2020 ಆತಿಥ್ಯ ವಹಿಸಿ ಯಶಸ್ವಿಯಾಗಿ ನಡೆಸಿದ ಕಾರಣಕ್ಕೆ ಬಿಸಿಸಿಐ ಬರೋಬ್ಬರಿ 100 ಕೋಟಿ ರೂ. ನೀಡಿದೆ .

ವರದಿಯ ಪ್ರಕಾರ ಬಿಸಿಸಿಐ ಎಮಿರೇಟ್ಸ್ ಕ್ರಿಕೆಟ್ ಬೋರ್ಡ್​ಗೆ 14 ಮಿಲಿಯನ್ ಡಾಲರ್ಸ್(100 ಕೋಟಿ ರೂ.) ಮೊತ್ತವನ್ನು ನೀಡಿದೆ.

ಈ ಬಾರಿಯ ಐಪಿಎಲ್ ಟೂರ್ನಿ ಯುಎಇನಲ್ಲಿ ನಡೆದರೂ ಪ್ರೇಕ್ಷಕರಿಲ್ಲದೆ ಖಾಲಿ ಮೈದಾನದಲ್ಲಿ ಆಯೋಜಿಸಲಾಗಿತ್ತು.

ಹೀಗಿದ್ದರೂ ಬಿಸಿಸಿಐ ಯಾವುದೇ ನಷ್ಟ ಅನುಭಿಸದೆ ವೀಕ್ಷಣೆಯಲ್ಲಿ, ಜಾಹೀರಾತುಗಳಲ್ಲಿ ಯಶಸ್ಸು ಕಂಡಿದೆ.

ಸದ್ಯ ಬಿಸಿಸಿಐ ಬಿಸಿಸಿಐ ಐಪಿಎಲ್ 2021ರ ಸಿದ್ದತೆಯಲ್ಲಿದೆ. ಮುಂದಿನ ಆವೃತ್ತಿಯನ್ನು ಭಾರತದಲ್ಲೇ ನಡೆಸಲಾಗುತ್ತದೆ ಎಂದು ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಮಾಹಿತಿ ನೀಡಿದ್ದಾರೆ.