RCB ವಿರುದ್ಧ ಅತೀ ಹೆಚ್ಚು ಸಿಕ್ಸ್ ಸಿಡಿಸಿದ ಬ್ಯಾಟ್ಸ್​ಮನ್​ಗಳು ಇವರು..!

ವಿರಾಟ್ ಕೊಹ್ಲಿ ನಾಯಕತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಇಂಡಿಯನ್ ಪ್ರೀಮಿಯರ್ ಲೀಗ್​ನ ಅತ್ಯಂತ ಬಲಿಷ್ಠ ತಂಡಗಳಲ್ಲಿ ಒಂದು.

ಈ ತಂಡದಲ್ಲಿ ಅತ್ಯುತ್ತಮ ಆಟಗಾರರಿಗೆ ಕೊರತೆಯಿಲ್ಲ. ಆದರೂ ಐಪಿಎಲ್​ ಟ್ರೋಫಿ ಗೆಲ್ಲುವಲ್ಲಿ ಇದುವರೆಗೂ ಆರ್​ಸಿಬಿ ಸಾಧ್ಯವಾಗಿಲ್ಲ.

ಆರ್​ಸಿಬಿಯಲ್ಲಿ ವಿರಾಟ್ ಕೊಹ್ಲಿ, ಡಿವಿಲಿಯರ್ಸ್​ರಂತಹ ಸ್ಪೋಟಕ ಬ್ಯಾಟ್ಸ್​ಮನ್​ಗಳಿದ್ದರೂ ತಂಡದ ದೌರ್ಬಲ್ಯ ಎಂಬುದು ಬೌಲಿಂಗ್ ವಿಭಾಗ.

ಪ್ರತಿವರ್ಷ ಬ್ಯಾಟ್ಸ್​ಮನ್​ಗಳು ಆರ್​ಸಿಬಿ ಅಭಿಮಾನಿಗಳನ್ನು ಚಕಿತಗೊಳಿಸಿದರೆ, ಅತ್ತ ಬೌಲರುಗಳಿಗೆ ನಿರಾಸೆ ಮೂಡಿಸಿರುವುದೇ ಹೆಚ್ಚು. ಇದಕ್ಕೆ ಸಾಕ್ಷಿಯಾಗಿ ಬೃಹತ್ ಮೊತ್ತ ಬಾರಿಸಿ ಬೆಂಗಳೂರು ಸೋಲುಂಡ ಅನೇಕ ಉದಾಹರಣೆಗಳಿವೆ.

ಇಂತಹದೊಂದು ದುರ್ಬಲ ಬೌಲಿಂಗ್ ಪಡೆಯ ಸಂಪೂರ್ಣ ಲಾಭದ ಪಡೆದ ಬ್ಯಾಟ್ಸ್​ಮನ್​ಗಳಾರು ಎಂದು ಪರಿಶೀಲಿಸಿದರೆ ಮೂವರು ದಾಂಡಿಗರ ಹೆಸರುಗಳು ಕಾಣಿಸಿಕೊಳ್ಳುತ್ತವೆ.

ಅಂದರೆ ಐಪಿಎಲ್ ಇತಿಹಾಸದಲ್ಲೇ ಆರ್​ಸಿಬಿ ವಿರುದ್ಧ ಅತೀ ಹೆಚ್ಚು ಸಿಕ್ಸರ್ ಸಿಡಿಸಿದ ಆಟಗಾರರು ಯಾರೆಂಬುದನ್ನು ಇಲ್ಲಿ ತಿಳಿಸಲಾಗಿದೆ.

#3 ಆಂಡ್ರೆ ರಸೆಲ್

ಇಂಡಿಯನ್ ಪ್ರೀಮಿಯರ್ ಲೀಗ್​​ನ ಸ್ಪೋಟಕ ಬ್ಯಾಟ್ಸ್​ಮನ್​ ಆಂಡ್ರೆ ರಸೆಲ್ 2012 ರಿಂದ 2019 ರವರೆಗೆ ಎರಡು ತಂಡಗಳ ಪರವಾಗಿ ಕಣಕ್ಕಿಳಿದಿದ್ದಾರೆ. ಆರಂಭದಲ್ಲಿ ಡೆಲ್ಲಿ ಡೇರ್​ ಡೆವಿಲ್ಸ್ ತಂಡದಲ್ಲಿದ್ದ ರಸೆಲ್ ಆ ಬಳಿಕ ಕೊಲ್ಕತ್ತಾ ನೈಟ್ ರೈಡರ್ಸ್ ಪಾಲಾಗಿದ್ದರು. ವಿಂಡೀಸ್​ನ ಈ ಸ್ಪೋಟಕ ಬ್ಯಾಟ್ಸ್​ಮನ್​ ಆರ್​ಸಿಬಿ ವಿರುದ್ಧ 9 ಇನಿಂಗ್ಸ್​ ಆಡಿದ್ದಾರೆ.

ಈ ಕೆರಿಬಿಯನ್ ಆಟಗಾರ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ವಿರುದ್ಧ 227.46 ಸ್ಟ್ರೈಕ್ ರೇಟ್ ಹೊಂದಿದ್ದಾರೆ. ಅಲ್ಲದೆ ಆರ್​ಸಿಬಿ ವಿರುದ್ಧ  9 ಇನಿಂಗ್ಸ್​ಗಳಲ್ಲಿ ಆಂಡ್ರೆ ರಸೆಲ್ ಸಿಡಿಸಿದ್ದು ಬರೋಬ್ಬರಿ  32 ಸಿಕ್ಸರ್​ಗಳು.

#2 ಡೇವಿಡ್ ವಾರ್ನರ್

ಸನ್‌ರೈಸರ್ಸ್ ಹೈದರಾಬಾದ್ ತಂಡದ ನಾಯಕ ಡೇವಿಡ್ ವಾರ್ನರ್  2010 ರಿಂದ 2019 ರವರೆಗೆ ದೆಹಲಿ ಡೇರ್‌ಡೆವಿಲ್ಸ್ ಮತ್ತು ಹೈದರಾಬಾದ್ ಪರ ಕಣಕ್ಕಿಳಿದಿದ್ದಾರೆ. ಇನ್ನು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ವಿರುದ್ಧ ವಾರ್ನರ್ ಒಟ್ಟು 15 ಇನ್ನಿಂಗ್ಸ್‌ಗಳಲ್ಲಿ  51.86 ಸರಾಸರಿಯಲ್ಲಿ  669 ರನ್ ಗಳಿಸಿದ್ದಾರೆ.

ಅದರಲ್ಲೂ ಮುಖ್ಯವಾಗಿ ವಾರ್ನರ್ ಬ್ಯಾಟ್​ನಿಂದ ಐಪಿಎಲ್​ನಲ್ಲಿ ಮೂಡಿಬಂದ ಶತಕ ಕೂಡ ಆರ್​ಸಿಬಿ ವಿರುದ್ಧವಾಗಿತ್ತು. ಬೆಂಗಳೂರು ವಿರುದ್ಧದ 15 ಇನಿಂಗ್ಸ್​ನಲ್ಲಿ ಆಸ್ಟ್ರೇಲಿಯಾದ ಈ ಎಡಗೈ ದಾಂಡಿಗ ಬಾರಿಸಿದ್ದು ಬರೋಬ್ಬರಿ  36 ಸಿಕ್ಸರ್​ಗಳು.

#1 ಮಹೇಂದ್ರ ಸಿಂಗ್ ಧೋನಿ

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಬ್ಯಾಟಿಂಗ್ ಅಂಕಿ ಅಂಶ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ ಅತ್ಯುತ್ತಮವಾಗಿದೆ. ಐಪಿಎಲ್ ಆರಂಭದಿಂದಲೂ ಸಿಎಸ್​ಕೆ ಪರ ಕಣಕ್ಕಿಳಿಯುತ್ತಿರುವ ಧೋನಿ ಇದುವರೆಗೆ ಆರ್​ಸಿಬಿ ವಿರುದ್ಧ  27 ಪಂದ್ಯಗಳನ್ನಾಡಿದ್ದಾರೆ. ಅದರಲ್ಲಿ 25 ಇನಿಂಗ್ಸ್​ನಲ್ಲಿ ಬೆಂಗಳೂರು ವಿರುದ್ಧ ಬ್ಯಾಟ್ ಬೀಸಿದ್ದಾರೆ.

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧದ 25 ಇನಿಂಗ್ಸ್​ನಲ್ಲಿ ಧೋನಿ 41.78 ಸರಾಸರಿಯಲ್ಲಿ 794 ರನ್ ಬಾರಿಸಿದ್ದಾರೆ. ಈ ಸ್ಪೋಟಕ ಬ್ಯಾಟಿಂಗ್​ನಲ್ಲಿ ಬಾರಿಸಿದ್ದು ಭರ್ಜರಿ 45 ಸಿಕ್ಸರ್​ಗಳು. ಅಂದರೆ ಆರ್​ಸಿಬಿ ವಿರುದ್ದ ಅತೀ ಹೆಚ್ಚು ಸಿಕ್ಸ್ ಸಿಡಿಸಿದ ಪಟ್ಟಿಯಲ್ಲಿ ಧೋನಿ ಮೊದಲ ಸ್ಥಾನದಲ್ಲಿದ್ದಾರೆ.