IPL 2021: ಹರಾಜಿಗೂ ಮುನ್ನ ಅಚ್ಚರಿ ಮೂಡಿಸಿದ RCB ನಡೆ..!

ರಂಗು ರಂಗಿನ ಕ್ರಿಕೆಟ್ ಟೂರ್ನಿ ಇಂಡಿಯನ್ ಪ್ರೀಮಿಯರ್ ಲೀಗ್14ನೇ ಸೀಸನ್​ಗೆ ಸಿದ್ದತೆ ಶುರುವಾಗಿದೆ. ಅದರ ಮೊದಲ ಹಂತವಾದ ಆಟಗಾರರ ಬಿಡುಗಡೆ ಪ್ರಕ್ರಿಯೆ ಕೂಡ ಮುಗಿದಿದೆ. ಎಲ್ಲಾ ಫ್ರಾಂಚೈಸಿಗಳು 5 ಕ್ಕೂ ಹೆಚ್ಚಿನ ಆಟಗಾರರನ್ನು ಕೈ ಬಿಟ್ಟಿದ್ದಾರೆ. ಅದರಲ್ಲೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 10 ಆಟಗಾರರನ್ನು ಬಿಡುಗಡೆ ಮಾಡಿದ್ದು, ಈ ಮೂಲಕ ಹೊಸ ತಂಡ ಕಟ್ಟುವ ಯೋಜನೆಯಲ್ಲಿದೆ.

ನಾಯಕ  ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್, ಯಜುವೇಂದ್ರ ಚಾಹಲ್, ದೇವದತ್ ಪಡಿಕ್ಕಲ್, ವಾಷಿಂಗ್ಟನ್ ಸುಂದರ್, ಮೊಹಮ್ಮದ್ ಸಿರಾಜ್, ನವದೀಪ್ ಸೈನಿ, ಆಡಮ್ ಜಂಪಾ, ಶಹಬಾಜ್ ಅಹ್ಮದ್, ಜೋಶ್ ಫಿಲಿಪ್, ಕೇನ್ ರಿಚರ್ಡ್ಸನ್, ಪವನ್ ದೇಶಪಾಂಡೆ ಅವರನ್ನು ಆರ್​ಸಿಬಿ ಉಳಿಸಿಕೊಂಡಿದೆ.

ಹಾಗೆಯೇ ಕ್ರಿಸ್ ಮೋರಿಸ್, ಆರೋನ್ ಫಿಂಚ್, ಮೊಯೀನ್ ಅಲಿ, ಇಸುರು ಉದಾನಾ, ಡೇಲ್ ಸ್ಟೇನ್, ಶಿವಂ ದುಬೆ, ಉಮೇಶ್ ಯಾದವ್, ಪವನ್ ನೇಗಿ, ಗುರ್ಕೀರತ್ ಮನ್, ಪಾರ್ಥಿವ್ ಪಟೇಲ್ ಅವರನ್ನು ಬಿಡುಗಡೆ ಮಾಡಿದೆ.<br /> ಇದರ ಹೊರತಾಗಿಯೂ ಆರ್​ಸಿಬಿ ಇಬ್ಬರು ಆಟಗಾರರನ್ನು ಟ್ರೇಡ್ ಮಾಡಿದೆ.

ಹೌದು, ಕಳೆದ ಸೀಸನ್​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಪ್ರತಿನಿಧಿಸಿದ್ದ ಡ್ಯಾನಿಯಲ್ ಸ್ಯಾಮ್ ಹಾಗೂ ಹರ್ಷಲ್ ಪಟೇಲ್ ಆರ್‌ಸಿಬಿಗೆ ಸೇರಲಿದ್ದಾರೆ. 8 ಐಪಿಎಲ್ ಸೀಸನ್ ಆಡಿರುವ ಹರ್ಷಲ್ ಪಟೇಲ್ 48 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದಾರೆ. ಇದರಲ್ಲಿ ಪಡೆದಿರುವುದು 46 ವಿಕೆಟ್ ಮಾತ್ರ.

ಇನ್ನು ಬೌಲಿಂಗ್ ಎಕನಾಮಿ ನೋಡುವುದಾದರೆ ಓವರ್​ಗೆ 8.74 ರನ್ ನೀಡಿದ್ದಾರೆ. ಹಾಗೆಯೇ ಕಳೆದ ಸೀಸನ್​ನಲ್ಲಿ 5 ಪಂದ್ಯಗಳಿಂದ ಹರ್ಷಲ್ ಪಟೇಲ್ ಕೇವಲ 3 ವಿಕೆಟ್ ಪಡೆಯಲು ಮಾತ್ರ ಯಶಸ್ವಿಯಾಗಿದ್ದರು.

ಹಾಗೆಯೇ ಕಳೆದ ಸೀಸನ್​ಲ್ಲಿ ಡೆಲ್ಲಿ ಪರ 3 ಪಂದ್ಯಗಳನ್ನಾಡಿರುವ ಆಲ್​ರೌಂಡರ್ ಡ್ಯಾನಿಯಲ್ ಸ್ಯಾಮ್ಸ್ ಒಂದೇ ಒಂದು ವಿಕೆಟ್ ಪಡೆದಿರಲಿಲ್ಲ ಎಂಬುದೇ ಅಚ್ಚರಿ. ಹಾಗೆಯೇ 9.50 ಸರಾಸರಿಯಲ್ಲಿ ರನ್ ನೀಡಿದ್ದಾರೆ. ಅತ್ತ ಬಿಗ್ ಬ್ಯಾಷ್ ಲೀಗ್​ನಲ್ಲೂ ಹೇಳಿಕೊಳ್ಳುವಂತಹ ಪ್ರದರ್ಶನ ನೀಡಿಲ್ಲ.

ಬಿಬಿಎಲ್​ನಲ್ಲಿ 46 ಪಂದ್ಯಗಳನ್ನಾಡಿರುವ ಸ್ಯಾಮ್ಸ್​ 62 ವಿಕೆಟ್ ಕಬಳಿಸಿದ್ದಾರೆ. ಹಾಗೆಯೇ ಬ್ಯಾಟಿಂಗ್ ಮೂಲಕ ಕಲೆಹಾಕಿದ್ದು 430 ರನ್​ಗಳು. ಇನ್ನು ಈ ಬಾರಿಯ ಬಿಬಿಎಲ್​ನಲ್ಲಿ 8 ಪಂದ್ಯಗಳಿಂದ 10 ವಿಕೆಟ್ ಪಡೆದಿದ್ದಾರೆ. ಆದರೆ ಪ್ರತಿ ಓವರ್​ಗೆ 8.59 ಸರಾಸರಿಯಲ್ಲಿ ರನ್ ಬಿಟ್ಟು ಕೊಟ್ಟಿದ್ದಾರೆ. ಅಲ್ಲದೆ 7 ಇನಿಂಗ್ಸ್​ನಲ್ಲಿ ಬ್ಯಾಟಿಂಗ್ ಮಾಡಿರುವ ಸ್ಯಾಮ್ಸ್ ಕಲೆಹಾಕಿದ್ದು 199 ರನ್​ ಮಾತ್ರ.

ಇನ್ನು ಕಳೆದ ಸೀಸನ್​ನಲ್ಲಿ ಡ್ಯಾನಿಯಲ್ ಸ್ಯಾಮ್ಸ್ ಐಪಿಎಲ್ ಹರಾಜಿನಲ್ಲಿ ಕಾಣಿಸಿಕೊಂಡಿರಲಿಲ್ಲ. ಆದರೆ ಡೆಲ್ಲಿ ಪರ ಆಯ್ಕೆಯಾಗಿದ್ದ ಜೇಸನ್ ರಾಯ್ ಟೂರ್ನಿಯಿಂದ ಹಿಂದೆ ಸರಿದಿದ್ದರು. ಹೀಗಾಗಿ ಇವರ ಸ್ಥಾನದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ಕೋಚ್ ರಿಕಿ ಪಾಂಟಿಂಗ್ ಡ್ಯಾನಿಯಲ್ ಸ್ಯಾಮ್ಸ್​ಗೆ ಅವಕಾಶ ನೀಡಿದ್ದರು.

ಪ್ರಸ್ತುತ ಆರ್​ಸಿಬಿ ತಂಡಕ್ಕೆ ಬೇಕಿರುವುದು ಅತ್ಯುತ್ತಮ ವೇಗಿ. ಇದಾಗ್ಯೂ ಡೆಲ್ಲಿ ಕ್ಯಾಪಿಟಲ್ಸ್​ ಪರ ವಿಫಲರಾಗಿದ್ದ  ಬೌಲರುಗಳನ್ನು ಆರ್​ಸಿಬಿ ಟ್ರೇಡ್ ಮಾಡಿ ಖರೀದಿಸುವ ಮೂಲಕ ಅಚ್ಚರಿ ಮೂಡಿಸಿದೆ.