IPL2020: ಐಪಿಎಲ್ ಇತಿಹಾಸದಲ್ಲೇ ಗರಿಷ್ಠ ಮೊತ್ತಕ್ಕೆ ಸೇಲ್ ಆದ ಟಾಪ್ 5 ಆಟಗಾರರು ಯಾರು ಗೊತ್ತಾ?

ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಆವೃತ್ತಿಗೆ ಕೆಲವು ತಿಂಗಳುಗಳಷ್ಟೆ ಬಾಕಿ ಉಳಿದಿದೆ. ಡಿಸೆಂಬರ್ 19 ರಂದು ಕೋಲ್ಕತ್ತಾದಲ್ಲಿ ಹರಾಜು ಪ್ರಕ್ರಿಯೆ ನಡೆಯಲಿದೆ.

ಈಗಾಗಲೇ ಎಲ್ಲಾ ಫ್ರಾಂಚೈಸಿಗಳು ಭರ್ಜರಿ ಸಿದ್ಧತೆಯಲ್ಲಿ ತೊಡಗಿಕೊಂಡಿವೆ. ಈ ಬಾರಿಯ ಐಪಿಎಲ್​ಗಾಗಿ ಪ್ರತಿ ತಂಡಗಳು ಕೆಲ ಆಟಗಾರರನ್ನು ಕೈ ಬಿಟ್ಟು ಭರ್ಜರಿ ಸರ್ಜರಿ ಮಾಡಿಕೊಂಡಿದೆ.

ಒಟ್ಟು ಎಂಟು ಫ್ರಾಂಚೈಸಿಗಳು 71 ಆಟಗಾರರನ್ನು ಐಪಿಎಲ್ 2020 ಹರಾಜು ಪ್ರಕ್ರಿಯೆಗೆ ಮುನ್ನ ರಿಲೀಸ್ ಮಾಡಿದೆ. ಒಟ್ಟು 127 ಆಟಗಾರರನ್ನು ತನ್ನಲ್ಲೆ ಉಳಿಸಿಕೊಂಡಿದೆ.

ಸದ್ದಿಲ್ಲದ ಆಟಗಾರರು ಹರಾಜಿನಲ್ಲಿ ಯಾರು ಊಹಿಸಲಾಗದ ರೀತಿ ಸೇಲ್ ಆಗಿದ್ದನ್ನು ನಾವು ನೋಡಿದ್ದೇವೆ. ಅಂತೆಯೆ ಸ್ಟಾರ್ ಆಟಗಾರರನ್ನು ಯಾವೊಂದು ಫ್ರಾಂಚೈಸಿ ಖರೀದಿ ಮಾಡದೇ ಇರುವುದನ್ನು ಕಂಡಿದ್ದೇವೆ.

ಹಾಗಾದರೆ ಈವರೆಗಿನ ಐಪಿಎಲ್ ಇತಿಹಾಸದಲ್ಲಿ ಗರಿಷ್ಠ ಮೊತ್ತಕ್ಕೆ ಸೇಲ್ ಆದ ಪ್ರಮುಖ 5 ಆಟಗಾರರನ್ನು ನೋಡುವುದಾದರೆ

ಯುವರಾಜ್ ಸಿಂಗ್: ಯುವರಾಜ್ ಸಿಂಗ್ ಅನ್ನು ಡೆಲ್ಲಿ ಡೇರ್ ಡೆವಿಲ್ಸ್ ತಂಡ 2015ರ ಹರಾಜಿನಲ್ಲಿ ಬರೋಬ್ಬರಿ 16 ಕೋಟಿ ಕೊಟ್ಟು ಖರೀದಿ ಮಾಡಿತ್ತು.

ಆದರೆ, ಯುವಿಯನ್ನು ಪಡೆದುಕೊಂಡಿದ್ದು ಡೆಲ್ಲಿಗೆ ಯಾವುದೇ ಪ್ರಯೋಜನವಾಗಿಲ್ಲ, ಆಡಿದ 14 ಪಂದ್ಯಗಳಲ್ಲಿ 248 ರನ್ ಗಳಿಸಿದ್ದರು. ಪಾಯಿಂಟ್ ಪಟ್ಟಿಯಲ್ಲಿ 7ನೇ ಸ್ಥಾನಿಯಾಗಿ ಡೆಲ್ಲಿ ಅಭಿಯಾನ ಮುಗಿಸಿತ್ತು.

ಬೆನ್ ಸ್ಟೋಕ್ಸ್: ಇಂಗ್ಲೆಂಡ್​ನ ಈ ಸ್ಟಾರ್ ಆಲ್ರೌಂಡರ್ ಆಟಗಾರನನ್ನು 2017ರ ಐಪಿಎಲ್ ಹರಾಜಿನಲ್ಲಿ ರೈಸಿಂಗ್ ಪುಣೆ 14.5 ಕೋಟಿಗೆ ಪಡೆದುಕೊಂಡಿತು. ಅದರಂತೆ ಸ್ಟೋಕ್ಸ್ ಆ ಆವೃತ್ತಿಯಲ್ಲಿ ಅಬ್ಬರಿಸಿದರು.

12 ಪಂದ್ಯಗಳಲ್ಲಿ 316 ರನ್ ಕಲೆಹಾಕಿದರು. 15 ಸಿಕ್ಸ್ ಇವರ ಬ್ಯಾಟ್​ನಿಂದ ಸಿಡಿದಿತ್ತು. 12 ವಿಕೆಟ್ ಕಿತ್ತು ಶ್ರೇಷ್ಠ ಪ್ರದರ್ಶನ ನೀಡಿದರು.

ಯುವರಾಜ್ ಸಿಂಗ್: 2014ರ ಐಪಿಎಲ್​ನಲ್ಲಿ ಯುವರಾಜ್​ನನ್ನು ಪಡೆದುಕೊಳ್ಳಲು ಮುಂಬೈ, ಕೋಲ್ಕತ್ತಾ, ಪಂಜಾಬ್ ಹಾಗೂ ಆರ್​ಸಿಬಿ ನಡುವೆ ದೊಡ್ಡ ಮಟ್ಟದ ಬಿಡ್ಡಿಂಗ್ ನಡೆದಿತ್ತು.

ಅಂತಿಮವಾಗಿ ಆರ್​ಸಿಬಿ ಯುವಿಯನ್ನು 14 ಕೋಟಿಗೆ ಖರೀದಿ ಮಾಡಿತು. ಅದರಂತೆ ಯುವರಾಜ್ ಉತ್ತಮ ಪ್ರದರ್ಶನವನ್ನೇನೊ ನೀಡಿದರು. 376 ರನ್ ಗಳಿಸಿ ದಾಖಲೆಯ 28 ಸಿಕ್ಸ್ ಸಿಡಿಸಿದ್ದರು. ಆದರೆ, ಆರ್​ಸಿಬಿ 7ನೇ ಸ್ಥಾನದಲ್ಲಿ ಅಭಿಯಾನ ಕೊನೆಗೊಳಿಸಿತು.

ದಿನೇಶ್ ಕಾರ್ತಿಕ್: ಡೆಲ್ಲಿ ಡೇರ್ ಡೆವಿಲ್ಸ್ 2014 ರಲ್ಲಿ ವಿಕೆಟ್ ಕೀಪರ್- ಬ್ಯಾಟ್ಸ್​ಮನ್​​ ದಿನೇಶ್ ಕಾರ್ತಿಕ್​ನನ್ನು 12.5 ಕೋಟಿಗೆ ಖರೀದಿ ಮಾಡಿತು. ಕಾರ್ತಿಕ್ ಇಡೀ ಟೂರ್ನಿಯಲ್ಲಿ 325 ರನ್ ಬಾರಿಸಿ ಉತ್ತಮ ಪ್ರದರ್ಶನ ನೀಡಿದರು. ಆದರೆ, ಇದು ತಂಡಕ್ಕೆ ಯಾವುದೇ ಪ್ರಯೋಜವಾಗಿಲ್ಲ. ಪಾಯಿಂಟ್ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿತ್ತು.

ಬೆನ್ ಸ್ಟೋಕ್ಸ್: 2018ರ ಐಪಿಎಲ್​ನಲ್ಲಿ ಸ್ಟೋಕ್ಸ್​ನನ್ನು ರಾಜಸ್ಥಾನ್ ರಾಯಲ್ಸ್ ತಂಡ 12.5 ಕೋಟಿಗೆ ಪಡೆದುಕೊಂಡಿತು. ಆದರೆ, ಈ ಬಾರಿ ಸ್ಟೋಕ್ಸ್ ವೈಫಲ್ಯ ಅನುಭವಿಸಿದರು.

ಸ್ಟೋಕ್ಸ್ ಆಡಿದ 13 ಪಂದ್ಯಗಳಲ್ಲಿ 121.73 ಸರಾಸರಿಯೊಂದಿಗೆ ಕಲೆಹಾಕಿದ್ದು ಕೇವಲ 196 ರನ್. ಕೇವಲ 8 ವಿಕೆಟ್​ಗಳನ್ನಷ್ಟೆ ಪಡೆದಿದ್ದರು.