IPL 2020: CSK ತಂಡದ ದೌರ್ಬಲ್ಯ ತಿಳಿಸಿದ ಡೀನ್ ಜೋನ್ಸ್

IPLನ ಬಲಿಷ್ಠ ತಂಡಗಳಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಕೂಡ ಒಂದು. ಆದರೆ ಪ್ರತಿಯೊಂದು ತಂಡಕ್ಕೂ ತನ್ನದೆಯಾದ ದೌರ್ಬಲ್ಯಗಳಿರುತ್ತವೆ ಎಂಬುದನ್ನು ಅಲ್ಲೆಗೆಳೆಯುವಂತಿಲ್ಲ. ಇದೀಗ ಸಿಎಸ್​ಕೆ ತಂಡದ ಇಂತಹದೊಂದು ದೌರ್ಬಲ್ಯವನ್ನು ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಡೀನ್ ಜೋನ್ಸ್ ಬಹಿರಂಗಪಡಿಸಿದ್ದಾರೆ.

ಈಗಾಗಲೇ ತಂಡದಿಂದ ಸುರೇಶ್ ರೈನಾ ಹೊರಗುಳಿದಿರುವುದು ಸಿಎಸ್​ಕೆ ತಂಡಕ್ಕೆ ಹಿನ್ನಡೆಯಾಗಲಿದೆ ಎಂದು ಅಭಿಪ್ರಾಯಪಟ್ಟಿರುವ ಜೋನ್ಸ್, ಈ ಅನುಪಸ್ಥಿತಿ ತಂಡವನ್ನು ಕಾಡಲಿದೆ ಎಂದಿದ್ದಾರೆ.

ಏಕೆಂದರೆ ರೈನಾ ಐಪಿಎಲ್​ನಲ್ಲಿ ಅತೀ ಹೆಚ್ಚು ರನ್​ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಟಾಪ್ 5 ಯಲ್ಲಿ ಇದ್ದಾರೆ. ಇಲ್ಲಿ ಮತ್ತೊಂದು ವಿಶೇಷತೆ ಎಂದರೆ ರೈನಾ ಎಡಗೈ ದಾಂಡಿಗ. ಹೀಗಾಗಿ ಸ್ಪಿನ್ ಬೌಲಿಂಗ್​ಗೆ ಉತ್ತಮವಾಗಿ ಬ್ಯಾಟ್ ಬೀಸುತ್ತಿದ್ದರು.

ಆದರೆ ಚೆನ್ನೈ ಸೂಪರ್ ಕಿಂಗ್ಸ್​ ತಂಡದಲ್ಲಿ ಇರುವವರು ಹೆಚ್ಚಿನವರು ಬಲಗೈ ಬ್ಯಾಟ್ಸ್​ಮನ್​ಗಳು. ಹೀಗಾಗಿ ತಂಡಕ್ಕೆ ಎಡಗೈ ಆಟಗಾರರ ಅವಶ್ಯಕತೆಯಿದೆ. ಇದುವೇ ತಂಡದ ದೌರ್ಬಲ್ಯವಾಗಿ ಪರಿಣಮಿಸಲಿದೆ ಎಂದು ಡೀನ್ ಜೋನ್ಸ್ ಅಭಿಪ್ರಾಯಪಟ್ಟಿದ್ದಾರೆ.

ಈ ಹಿಂದೆ ಮಾಜಿ ಸಿಎಸ್​ಕೆ ಆಟಗಾರ ಅಲ್ಬಿ ಮೊರ್ಕಲ್ ಕೂಡ ರೈನಾ ಅನುಪಸ್ಥಿತಿ ತಂಡದ ಫಲಿತಾಂಶದ ಮೇಲೆ ಪ್ರಭಾವ ಬೀರಲಿದೆ ಎಂದು ಅಭಿಪ್ರಾಯಪಟ್ಟಿದ್ದರು. ಏಕೆಂದರೆ ರೈನಾ ಕೇವಲ ಬ್ಯಾಟ್ಸ್​ಮನ್​ ಮಾತ್ರವಲ್ಲ, ಉತ್ತಮ ಫೀಲ್ಡರ್​ ಕೂಡ. ಹೀಗಾಗಿ ರೈನಾ ಅಲಭ್ಯತೆ ಚೆನ್ನೈಯನ್ನು ಕಾಡಲಿದೆ ಎಂದಿದ್ದರು.

ಸದ್ಯ ಸಿಎಸ್​ಕೆ ರೈನಾ ಹಾಗೂ ಹರ್ಭಜನ್ ಸ್ಥಾನದಲ್ಲಿ ಯುವ ಆಟಗಾರರನ್ನು ಕಣಕ್ಕಿಳಿಸಲು ನಿರ್ಧರಿಸಿದ್ದು, ಸೆಪ್ಟೆಂಬರ್ 19 ರಂದು ನಡೆಯಲಿರುವ ಮೊದಲ ಪಂದ್ಯದಲ್ಲೇ ಮುಂಬೈ ವಿರುದ್ಧ ಈ ಪ್ರಯೋಗ ಮಾಡಲು ಧೋನಿ ಅ್ಯಂಡ್ ಟೀಮ್ ಪ್ಲ್ಯಾನ್ ಮಾಡಿಕೊಂಡಿದೆ.