IPL 2020: ಐಪಿಎಲ್​ ಆರಂಭಕ್ಕೂ ಮುನ್ನವೇ ಕೆಕೆಆರ್ ಆಟಗಾರನಿಗೆ ನಿಷೇಧ

ರಂಗು ರಂಗಿನ ಕ್ರಿಕೆಟ್ ಟೂರ್ನಿ ಇಂಡಿಯನ್‌ ಪ್ರೀಮಿಯರ್‌ ಲೀಗ್​ ಆರಂಭವಾಗಲು ತಿಂಗಳುಗಳು ಮಾತ್ರ ಉಳಿದಿವೆ. ಇದರ ಬೆನ್ನಲ್ಲೇ ಕೋಲ್ಕತ್ತಾ ನೈಟ್​ ರೈಡರ್ಸ್​ ತಂಡದ ಆಟಗಾರರೊಬ್ಬರು ಟೂರ್ನಿಯಿಂದ ಹೊರಬಿದ್ದಿದ್ದಾರೆ.

ಇಂಡಿಯನ್‌ ಪ್ರೀಮಿಯರ್‌ ಲೀಗ್​ನ ಅತ್ಯಂತ ಹಿರಿಯ ಆಟಗಾರ ಪ್ರವೀಣ್ ತಾಂಬೆ  ಅವರ ಆಯ್ಕೆ ವಿವಾದಕ್ಕೆ ಕಾರಣವಾಗಿತ್ತು.

13ನೇ ಸೀಸನ್​ನಲ್ಲಿ ಕೊಲ್ಕತ್ತಾ ನೈಟ್​ ರೈಡರ್ಸ್​ ತಂಡ 20 ಲಕ್ಷ ರೂ. ನೀಡಿ ತಾಂಬೆಯನ್ನು ಖರೀದಿಸಿತ್ತು. ಆದರೀಗ ಐಪಿಎಲ್​ನಿಂದ  ಹಿರಿಯ ಆಟಗಾರನನ್ನು ಅನರ್ಹಗೊಳಿಸಲಾಗಿದ.

48 ವರ್ಷದ ಅನುಭವಿ ಲೆಗ್‌ ಸ್ಪಿನ್ನರ್‌ ಈ ಮೊದಲು ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಸನ್‌ರೈಸರ್ಸ್ ಹೈದರಾಬಾದ್‌ ತಂಡಗಳ ಪರ ಆಡಿದ್ದರು. 2013 ರಲ್ಲಿ ಐಪಿಎಲ್​ ಪದಾರ್ಪಣೆ ಮಾಡಿದ್ದ ತಾಂಬೆ, ನಾಲ್ಕು ಸೀಸನ್​ಗಳನ್ನು ಪ್ರತಿನಿಧಿಸಿದ್ದರು.

ಕಾಪರ್ ಲೆಗ್ ಬ್ರೇಕ್ ಬೌಲಿಂಗ್ ಮೂಲಕ ಎದುರಾಳಿಗಳನ್ನು ಕಂಗೆಡಿಸುವ  ತಾಂಬೆ ಇದುವರೆಗೆ  33 ಐಪಿಎಲ್ ಪಂದ್ಯಗಳನ್ನಾಡಿದ್ದಾರೆ. ಅದರಲ್ಲಿ 28 ವಿಕೆಟ್​ ಕಬಳಿಸುವ ಮೂಲಕ ಗಮನ ಸೆಳೆದಿದ್ದರು.

61 ಟಿ 20 ಪಂದ್ಯಗಳಿಂದ  67 ವಿಕೆಟ್ ಪಡೆದು ಮಿಂಚಿರುವ ತಾಂಬೆ  2016 ರಲ್ಲಿ ಕೊನೆಯ ಬಾರಿ ಸನ್​ರೈಸರ್ಸ್ ಹೈದರಾಬಾದ್ ಪರ ಕಣಕ್ಕಿಳಿದಿದ್ದರು.

ಆ ಬಳಿಕ ಐಪಿಎಲ್​ನಿಂದ ದೂರ ಉಳಿದಿದ್ದ ತಾಂಬೆ ಕಳೆದ ವರ್ಷ ವಿದೇಶದಲ್ಲಿ ನಡೆದ ಟಿ10 ಕ್ರಿಕೆಟ್​ನಲ್ಲಿ ಅದ್ಭುತ ಬೌಲಿಂಗ್ ಮೂಲಕ  15ಕ್ಕೆ 5 ವಿಕೆಟ್‌ ಉರುಳಿಸಿ  ಗಮನ ಸೆಳೆದಿದ್ದರು. ಈ ಪ್ರದರ್ಶನದಿಂದ 2020 ಐಪಿಎಲ್ ಹರಾಜು ಪಟ್ಟಿಯಲ್ಲಿ ತಾಂಬೆಗೆ ಅವಕಾಶ ನೀಡಲಾಗಿತ್ತು.

ಆದರೀಗ ಅದುವೇ ತಾಂಬೆಗೆ ಮುಳುವಾಗಲಿದೆ. ಏಕೆಂದರೆ ಬಿಸಿಸಿಐ ಒಪ್ಪಂದದ ನಿಯಮದ ಪ್ರಕಾರ ಭಾರತದ ಯಾವುದೇ ಕ್ರಿಕೆಟಿಗ ವಿಶ್ವದ ಬೇರೆ ಭಾಗಗಳಲ್ಲಿ ನಡೆಯುವ ಲೀಗ್​ನಲ್ಲಿ ಪಾಲ್ಗೊಳ್ಳುವಂತಿಲ್ಲ. ಹೀಗಾಗಿ 2020ರ ಐಪಿಎಲ್‌ನಲ್ಲಿ ತಾಂಬೆ ಅವರಿಗೆ ಅವಕಾಶ ನೀಡಿದ ಬಗ್ಗೆ ಪ್ರಶ್ನೆಗಳೆದ್ದಿತ್ತು.

ಬಿಸಿಸಿಐ ಒಪ್ಪಂದ ಪಡೆದಿರುವ ಯಾವುದೇ ಆಟಗಾರ ವಿಶ್ವದ ಇತರೆ ಟೂರ್ನಿಯಲ್ಲಿ ಭಾಗವಹಿಸುವಂತಿಲ್ಲ. ಅದು ಟಿ 20 ಮತ್ತು ಟಿ 10 ಲೀಗ್​ಗೂ ಅನ್ವಯಿಸುತ್ತದೆ. ಇನ್ನು ಏಕದಿನ ಕ್ರಿಕೆಟ್‌ ಅಥವಾ ಕೌಂಟಿ ಕ್ರಿಕೆಟ್‌ಗಳಲ್ಲಿ ಭಾಗವಹಿಸಲು ಬಿಸಿಸಿಐನಿಂದ ಅನುಮತಿ ಪಡೆದಿರಬೇಕು.

ಹೀಗಾಗಿ ಪ್ರವೀಣ್‌ ತಾಂಬೆ ವಿಚಾರವನ್ನು ಪರಿಶೀಲಿಸುತ್ತಿದ್ದೇವೆ ಎಂದು ಐಪಿಎಲ್‌ ಆಡಳಿತ ಮಂಡಳಿ ಈ ಹಿಂದೆ ತಿಳಿಸಿತ್ತು.

ಹೀಗಾಗಿ ತಾಂಬೆ ಅವರನ್ನು ಐಪಿಎಲ್ ನಲ್ಲಿ ಆಡುವುದನ್ನು ಬಹಿಷ್ಕರಿಸಲಾಗಿದೆ ಎಂದು ಇಂಡಿಯನ್ ಪ್ರೀಮಿಯರ್ ಲೀಗ್ ಮುಖ್ಯಸ್ಥ ಬ್ರಿಜೇಶ್ ಪಟೇಲ್ ತಿಳಿಸಿದ್ದಾರೆ.

ಕೋಲ್ಕತ್ತಾ ನೈಟ್ ರೈಡರ್ಸ್​ ತಂಡಕ್ಕೆ ತಾಂಬೆ ಬದಲಿಗೆ ಮತ್ತೋರ್ವ ಆಟಗಾರನ ಆಯ್ಕೆಗೆ ಐಪಿಎಲ್ ಆಡಳಿತ ಮಂಡಳಿ ಅವಕಾಶ ನೀಡಲಿದೆ ಎಂದು ಹೇಳಲಾಗಿದೆ.

ಹೀಗಾಗಿ ಯಾವ ಆಟಗಾರನಿಗೆ ಮತ್ತೆ ಐಪಿಎಲ್ 2020 ಆಡುವ ಅದೃಷ್ಟ ಸಿಗಲಿದೆ ಎಂಬ ಕುತೂಹಲ ಕೂಡ ಕೆಕೆಆರ್ ಅಭಿಮಾನಿಗಳಲ್ಲಿದೆ.