ಮಂದಾನ ಮಿಂಚಿನ ಆಟದಿಂದ ದಾಖಲೆ ಬರೆದ ಭಾರತೀಯ ಮಹಿಳೆಯರು; ರೋಚಕ ಪಂದ್ಯದಲ್ಲಿ ಸೋತ ಆಸೀಸ್!

ಭಾರತ, ಇಂಗ್ಲೆಂಡ್ ಹಾಗೂ ಆತಿಥೇಯ ಆಸ್ಟ್ರೇಲಿಯಾ ಒಳಗೊಂಡ ಮಹಿಳೆಯರ ತ್ರಿಕೋನ ಟಿ-20 ಸರಣಿ ರೋಚಕ ಘಟ್ಟಕ್ಕೆ ಬಂದು ತಲುಪಿದೆ.

ಇಂದು ನಡೆದ ಆಸ್ಟ್ರೇಲಿಯಾ ವಿರುದ್ಧದ ಪಂದ್ಯದಲ್ಲಿ ಭಾರತೀಯ ವನಿತೆಯರು ದಾಖಲೆಯ ಜಯ ಸಾಧಿಸಿ ಸರಣಿಯನ್ನ ಜವಂತವಾಗಿರಿಸಿದೆ.

ಸ್ಮೃತಿ ಮಂದಾನ ಅವರ ಅಮೋಘ ಆಟದ ನೆರವಿನಿಂದ ಭಾರತ 7 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿತು.

ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾ 20 ಓವರ್​ನಲ್ಲಿ 5 ವಿಕೆಟ್ ನಷ್ಟಕ್ಕೆ ಬರೋಬ್ಬರಿ 173 ರನ್ ಬಾರಿಸಿದರು.

ಆಸೀಸ್ ಪರ ಆಶ್ಲೆಗ್ ಗಾರ್ಡನರ್ 57 ಎಸೆತಗಳಲ್ಲಿ 11 ಬೌಂಡರಿ, 3 ಸಿಕ್ಸರ್ ಬಾರಿಸಿ 93 ರನ್ ಚಚ್ಚಿದರು. ನಾಯಕಿ ಮೆಗ್ ಲನ್ನಿಂಗ್ 22 ಎಸೆತಗಳಲ್ಲಿ 37 ರನ್ ಬಾರಿಸಿದರು.

ಭಾರತ ಪರ ದೀಪ್ತಿ ಶರ್ಮಾ 2 ವಿಕೆಟ್ ಕಿತ್ತರೆ, ರಾಜೇಶ್ವರಿ ಗಾಯಕ್ವಾಡ್, ರಾಧಾ ಯಾದವ್ ಹಾಗೂ ಹರ್ಲೀನ್ ಡೊಲ್ ತಲಾ 1 ವಿಕೆಟ್ ಪಡೆದರು.

174 ರನ್​ಗಳ ಕಠಿಣ ಟಾರ್ಗೆಟ್ ಬೆನ್ನಟ್ಟಿದ ಭಾರತ 19.4 ಓವರ್​ನಲ್ಲೇ 3 ವಿಕೆಟ್ ನಷ್ಟಕ್ಕೆ 177 ರನ್ ಬಾರಿಸಿ ಗೆಲುವು ಸಾಧಿಸಿದತು.

ಭಾರತ ಪರ ಸ್ಮೃತಿ ಮಂದಾನ 48 ಎಸೆತಗಳಲ್ಲಿ 55 ರನ್ ಚಚ್ಚಿದರೆ, ಶಫಾಲಿ ವರ್ಮಾ ಕೇವಲ 28 ಎಸೆತಗಳಲ್ಲಿ 49 ರನ್ ಬಾರಿಸಿ ಭಾರತದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು.

19.4 ಓವರ್​ನಲ್ಲಿ ಭಾರತದ ವನಿತೆಯರು 177 ರನ್ ಚೇಸ್ ಮಾಡಿ ದಾಖಲೆ ಬರೆದರು. 177 ರನ್ ಟೀಂ ಇಂಡಿಯಾ ವನಿತೆಯರು ಟಿ-20 ಅಂತರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಈವರೆಗೆ ಚೇಸ್ ಮಾಡಿದ ಗರಿಷ್ಠ ಮೊತ್ತವಾಗಿದೆ.

ಈ ಗೆಲುವಿನೊಂದಿಗೆ ಆಡಿರುವ ನಾಲ್ಕು ಪಂದ್ಯಗಳಲ್ಲಿ ತಲಾ ಎರಡು ಗೆಲುವು ಹಾಗೂ ಸೋಲು ದಾಖಲಿಸಿರುವ ಭಾರತ ಒಟ್ಟು 4 ಅಂಕಗಳನ್ನು ಸಂಪಾದಿಸಿದೆ.

ಈ ಮೂಲಕ ತನ್ನ ಫೈನಲ್ ಆಸೆಯನ್ನು ಹರ್ಮನ್​ಪ್ರೀತ್​ ಪಡೆ ಜೀವಂತವಾಗಿರಿಸಿದೆ. ಆದರೂ ರನ್ ರೇಟ್ ನೆಗೆಟಿವ್ ಆಗಿರುವುದು ಹಿನ್ನೆಡೆಗೆ ಕಾರಣವಾಗಿದೆ.

ಇದೀಗ ಫೈನಲ್ ಪ್ರವೇಶಿಸಲು ಅಂತಿಮ ಲೀಗ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ದ ಆಸೀಸ್ ಸೋಲಿಗಾಗಿ ಭಾರತದ ಮಹಿಳೆಯರು ಕಾಯಬೇಕಿದೆ.