Shane Lee: ಕೊಹ್ಲಿ ನಾಯಕತ್ವದಲ್ಲಿ ಟೀಮ್ ಇಂಡಿಯಾ ಆಟಗಾರರು ಹೆಜ್ಜೆಯಿಡಲೂ ಭಯಪಡುತ್ತಾರೆ..!

ಆಸ್ಟ್ರೇಲಿಯಾ ವಿರುದ್ಧದ ಐತಿಹಾಸಿಕ ಟೆಸ್ಟ್ ಸರಣಿ ಗೆಲುವಿನ ಬೆನ್ನಲ್ಲೇ ಟೀಮ್ ಇಂಡಿಯಾ ನಾಯಕತ್ವದ ಚರ್ಚೆಗಳು ಶುರುವಾಗಿತ್ತು. ಅದರಲ್ಲೂ ಟೆಸ್ಟ್ ತಂಡಕ್ಕೆ ಅಜಿಂಕ್ಯ ರಹಾನೆ ಅವರನ್ನೇ ಮುಂದುವರೆಸಬೇಕೆಂಬ ಮಾತುಗಳು ಕೇಳಿ ಬಂದಿದ್ದವು.

ಏಕೆಂದರೆ ಅನಾನುಭವಿ ಪಡೆಯನ್ನು ಯಶಸ್ವಿಯಾಗಿ ಮುನ್ನಡೆಸಿ ಬಲಿಷ್ಠ ಆಸ್ಟ್ರೇಲಿಯಾವನ್ನು ಮಣಿಸುವಲ್ಲಿ ರಹಾನೆ ಅವರ ನಾಯಕತ್ವದ ಗುಣಗಳು ಕೂಡ ಪ್ರಮುಖ ಪಾತ್ರವಹಿಸಿತ್ತು. ಹೀಗಾಗಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್​ ಸರಣಿಗೆ ಕೊಹ್ಲಿ ಬದಲಿಗೆ ರಹಾನೆ ಅವರೇ ನಾಯಕರಾಗಿ ಆಯ್ಕೆಯಾಗಲಿ ಎಂದು ಹಲವರು ಅಭಿಪ್ರಾಯ ವ್ಯಕ್ತಪಡಿಸಿದ್ದರು.

ಇದೀಗ ಆಸ್ಟ್ರೇಲಿಯಾ ತಂಡದ ಮಾಜಿ ಆಲ್​ರೌಂಡರ್ ಶೇನ್ ಲೀ ಕೂಡ ಅಜಿಂಕ್ಯ ರಹಾನೆ ಪರ ಬ್ಯಾಟ್ ಬೀಸಿದ್ದಾರೆ. ನಾನು ಟೀಮ್ ಇಂಡಿಯಾ ತಂಡದ ಆಯ್ಕೆಗಾರನಾಗಿದ್ದರೆ ವಿರಾಟ್ ಕೊಹ್ಲಿಯ ಬದಲಿಗೆ ಅಜಿಂಕ್ಯ ರಹಾನೆಯನ್ನು ಕಪ್ತಾನನಾಗಿ ಆಯ್ಕೆ ಮಾಡಿರುತ್ತಿದ್ದೆ. ಅಲ್ಲದೆ ಕೊಹ್ಲಿ ಹೆಗಲಿಗೆ ಬ್ಯಾಟಿಂಗ್ ಜವಾಬ್ದಾರಿ ಮಾತ್ರ ವಹಿಸುತ್ತಿದ್ದೆ ಎಂದಿದ್ದಾರೆ.

ಏಕೆಂದರೆ ರಹಾನೆ ಕೊಹ್ಲಿಗಿಂತ ಉತ್ತಮ ನಾಯಕ. ಕೊಹ್ಲಿ ನಾಯಕತ್ವದಲ್ಲಿ ಟೀಮ್ ಇಂಡಿಯಾ ಆಟಗಾರರು ಒಂದು ಹೆಜ್ಜೆಯಿಡಲು ಭಯಪಡುತ್ತಾರೆ ಎಂಬುದು ನನ್ನ ಅನಿಸಿಕೆ. ಕೊಹ್ಲಿ ಪ್ರತಿಯೊಬ್ಬರಿಂದಲೂ ಸಂಪೂರ್ಣ ವೃತಿಪರತೆಯನ್ನು ಬಯಸುತ್ತಾರೆ. ಎಲ್ಲರೂ ಫಿಟ್ ಆಗಿರಬೇಕು. ಶ್ರೇಷ್ಠ ಪ್ರದರ್ಶನ ನೀಡಬೇಕು. ಉತ್ತಮ ಕ್ಯಾಚ್​ಗಳನ್ನು ಪಡೆಯಬೇಕು ಎಂದು ಬಯಸುತ್ತಾರೆ. ಇದು ಆಟಗಾರರಲ್ಲಿ ಚಿಂತೆಯನ್ನು ಮೂಡಿಸುತ್ತದೆ. ಆದರೆ ರಹಾನೆ ನಾಯಕತ್ವದಲ್ಲಿ ಎಲ್ಲಾ ಆಟಗಾರರು ನಿರಾಳವಾಗಿರುವಂತೆ ಕಂಡು ಬರುತ್ತಾರೆ ಎಂದು ಶೇನ್ ಲೀ ಹೇಳಿದ್ದಾರೆ.

ಇನ್ನು ಕೊಹ್ಲಿ ನಾಯಕತ್ವನ್ನು ತ್ಯಜಿಸುವುದು ಅನುಮಾನ ಎಂದಿರುವ ಶೇನ್ ಲೀ, ಅವರು ನಾಯಕತ್ವವನ್ನು ತ್ಯಜಿಸಿ ಬ್ಯಾಟಿಂಗ್ ಕಡೆ ಮತ್ತಷ್ಟು ಗಮನ ನೀಡಿದ್ರೆ ತಂಡದ ಪ್ರದರ್ಶನ ಇನ್ನಷ್ಟು ಉತ್ತಮವಾಗುತ್ತದೆ. ಇವೆಲ್ಲವೂ ಮುಂದಿನ ದಿನಗಳಲ್ಲಿ ತಿಳಿಯಲಿದೆ ಎಂದು ಶೇನ್ ಲೀನ್ ಅಭಿಪ್ರಾಯ ಪಟ್ಟರು.

ಆಸ್ಟ್ರೇಲಿಯಾ ಪರ 45 ಏಕದಿನ ಪಂದ್ಯಗಳನ್ನಾಡಿರುವ ಶೇನ್ ಲೀ, ಖ್ಯಾತ ಆಸೀಸ್ ಕ್ರಿಕೆಟಿಗ ಬ್ರೆಟ್ ಲೀ ಅವರ ಸಹೋದರ. 1995 ರಲ್ಲಿ ಪಾದಾರ್ಪಣೆ ಮಾಡಿದ್ದ ಶೇನ್ ಲೀ ಆಸ್ಟ್ರೇಲಿಯಾ ಪರ 477 ರನ್​ ಹಾಗೂ 48 ವಿಕೆಟ್ ಕಬಳಿಸಿದ್ದಾರೆ.