ವಿಂಡೀಸ್ ವಿರುದ್ಧದ ಸರಣಿಯಲ್ಲೂ ಕಣಕ್ಕಿಳಿಯಲ್ಲ ಸ್ಯಾಮ್ಸನ್​; ಯಾಕೆ?, ಇಲ್ಲಿವೆ ಕಾರಣ!

ಅಂತರಾಷ್ಟ್ರೀಯ ತಂಡದಲ್ಲಿನ ಸ್ಥಾನಕ್ಕಾಗಿ ಕಾದು ಕಾದು ಸಂಜು ಸ್ಯಾಮ್ಸನ್ ಕಳೆದ ತಿಂಗಳು ಬಾಂಗ್ಲಾದೇಶ ವಿರುದ್ಧದ ಟಿ-20 ಸರಣಿಗೆ ಆಯ್ಕೆಯಾದರು. ಈ ಮೂಲಕ 2014ರ ಬಳಿಕ ಮತ್ತೆ ಸ್ಯಾಮ್ಸನ್ ಟೀಂ ಇಂಡಿಯಾ ಸೇರಿದರು.

ಆದರೆ, ಸ್ಯಾಮ್ಸನ್ ತಂಡಕ್ಕೆ ಆಯ್ಕೆಯಾಗಿದ್ದು ಬಿಟ್ಟರೆ ಮೂರು ಪಂದ್ಯಗಳಲ್ಲಿ ಬೆಂಚ್ ಕಾದಿದ್ದೇ ಬಂತು. ವಿಂಡೀಸ್ ವಿರುದ್ಧದ ಟಿ-20 ಸರಣಿಗೆ ಸ್ಯಾಮ್ಸನ್​​ರನ್ನು ಆರಂಭದಲ್ಲಿ ಕೈಬಿಡಲಾಯಿತಾದರು, ಬಳಿಕ ಶಿಖರ್ ಧವನ್ ಇಂಜುರಿಗೆ ತುತ್ತಾದ ಪರಿಣಾಮ ಅವರ ಬದಲು ಸ್ಥಾನ ಪಡೆದುಕೊಂಡರು.

ನಾಳೆಯಿಂದ ವಿಡೀಸ್ ವಿರುದ್ಧ ಮೂರು ಪಂದ್ಯಗಳ ಟಿ-20 ಸರಣಿ ಪೈಕಿ ಮೊದಲ ಪಂದ್ಯ ನಡೆಯಲಿದೆ. ಆದರೆ, ಈ ಸರಣಿಯಲ್ಲೂ ಸ್ಯಾಮ್ಸನ್ ಕಣಕ್ಕಿಳಿಯುವುದು ಅನುಮಾನು ಎನ್ನಲಾಗುತ್ತಿದೆ. ಇದಕ್ಕೆ ಕಾರಣ ಇಲ್ಲಿದೆ.

ವಿರಾಟ್ ಕಮ್​ಬ್ಯಾಕ್​: ಬಾಂಗ್ಲಾ ವಿರುದ್ಧದ ಟಿ-20 ಸರಣಿಯಲ್ಲಿ ಕೊಹ್ಲಿಗೆ ವಿಶ್ರಾಂತಿ ನೀಡಿದ ಪರಿಣಾಮ ಸ್ಯಾಮ್ಸನ್ ತಂಡಕ್ಕೆ ಆಯ್ಕೆಯಾಗಿದ್ದರು. ಆದರೆ, ಕೊಹ್ಲಿ ಸ್ಥಾನದಲ್ಲಿ ಕೆ ಎಲ್ ರಾಹುಲ್​ರನ್ನು ಕಣಕ್ಕಿಳಿಸಿದರು. ರಾಹುಲ್ ಉತ್ತಮ ಪ್ರದರ್ಶನ ನೀಡಿದರು.

ಸದ್ಯ ಧವನ್ ಅನುಪಸ್ಥಿಯಲ್ಲಿ ಸಂಜು ಸ್ಥಾನ ಪಡೆದುಕೊಂಡಿದ್ದಾರೆ. ಕೊಹ್ಲಿ ತಂಡಕ್ಕೆ ಮರಳಿರುವ ಕಾರಣ ರಾಹುಲ್ ಅವರು ರೋಹಿತ್ ಶರ್ಮಾ ಜೊತೆ ಓಪನರ್ ಆಗಿ ಇನ್ನಿಂಗ್ಸ್ ಆರಂಭಿಸುವ ಸಾಧ್ಯತೆಯಿದೆ.

3ನೇ ಕ್ರಮಾಂಕದಲ್ಲಿ ಕೊಹ್ಲಿ, 4ನೇ ಕ್ರಮಾಂಕದಲ್ಲಿ ಶ್ರೇಯಸ್ ಐಯರ್ ಕಣಕ್ಕಿಳಿಯುವುದು ಖಚಿತ. ಹೀಗಾಗಿ ನಂತರದ ಸ್ಥಾನದಲ್ಲಿ ಸ್ಯಾಮ್ಸನ್ ಆಡುವುದು ಅನುಮಾನ.

ಮನೀಶ್ ಪಾಂಡೆ ಫಾರ್ಮ್: ಸ್ಯಾಮ್ಸನ್​ರನ್ನು ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿಸಲು ಬಯಸಿದರೆ ಆ ಜಾಗದಲ್ಲಿ ಸದ್ಯ ಭರ್ಜರಿ ಫಾರ್ಮ್​​​ನಲ್ಲಿರುವ ಮನೀಶ್ ಪಾಂಡೆ ಅಬ್ಬರಿಸಲು ತಯಾರಾಗಿದ್ದಾರೆ.

ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಕರ್ನಾಟಕ ತಂಡವನ್ನು ಗೆಲ್ಲಿಸಿಕೊಟ್ಟ ಪಾಂಡೆ ಮೇಲೆ ಹೆಚ್ಚಿನ ನಿರೀಕ್ಷೆ ಇರುವ ಕಾರಣ ಇಲ್ಲಿಯೂ ಸ್ಯಾಮ್ಸನ್​ಗೆ ಜಾಗವಿಲ್ಲ. ಅಲ್ಲದೆ ಜಡೇಜಾ ಕೂಡ ತಂಡ ಸೇರಿದ್ದು ಆಡುವ ಬಳಗದಲ್ಲಿ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ.

ಪಂತ್​ಗೆ ಮತ್ತಷ್ಟು ಅವಕಾಶ: ಸ್ಯಾಮ್ಸನ್ ಆಡುವ ಬಳಗದಲ್ಲಿ ಕಾಣಿಸಿಕೊಳ್ಳಲು ಕೊನೆಯ ಅವಕಾಶ ರಿಷಭ್ ಪಂತ್ ಅನುಪಸ್ಥಿತಿ. ಆದರೆ, ಪಂತ್​ಗೆ ವೆಸ್ಟ್ ಇಂಡೀಸ್ ಸರಣಿ ಬಹುಮುಖ್ಯ. ಇದರಲ್ಲೂ ಪಂತ್ ವೈಫಲ್ಯ ಅನುಭವಿಸಿದರೆ ಮತ್ತೆ ತಂಡ ಸೇರುವುದು ಅನುಮಾನ.

ಪಂತ್ ಎಲ್ಲಾದರು ಕಳಪೆ ಪ್ರದರ್ಶನ ಮುಂದುವರೆಸಿದರೆ ಜನವರಿಯಲ್ಲಿ ನಡೆಯಲಿರುವ ಶ್ರೀಲಂಕಾ ವಿರುದ್ಧದ ಟಿ-20 ಸರಣಿಯಲ್ಲಿ ಸ್ಯಾಮ್ಸನ್​ಗೆ ಅವಕಾಶ ಸಿಗಬಹುದು. ಹೀಗಾಗಿ ವಿಂಡೀಸ್ ಸರಣಿಯಲ್ಲಿ ಸ್ಯಾಮ್ಸನ್ ಬೆಂಚ್ ಕಾಯಬೇಕಾದ ಸ್ಥಿತಿ ದಟ್ಟವಾಗಿದೆ.