India vs Sri Lanka: ಕೊಹ್ಲಿ ಕಾಲಿಟ್ಟ ಬಳಿಕ ನಡೆದ ಭಾರತ- ಲಂಕಾ ಪಂದ್ಯ ಅಚ್ಚರಿ ಮೂಡಿಸುವಂತಿದೆ!

ಟೀಂ ಇಂಡಿಯಾ ಹೊಸ ವರ್ಷದ ಮೊದಲ ಸರಣಿಯನ್ನು ಆಡಲು ಸಜ್ಜಾಗಿದೆ. ಶ್ರೀಲಂಕಾ ವಿರುದ್ಧ ಮೂರು ಪಂದ್ಯಗಳ ಟಿ-20 ಸರಣಿ ಪೈಕಿ ನಾಳೆ (ಜ. 05) ಗುವಾಹಟಿಯಲ್ಲಿ ಮೊದಲ ಪಂದ್ಯ ನಡೆಯಲಿದೆ.

ಇತ್ತೀಚಿನ ದಿನಗಳಲ್ಲಿ ಟೀಂ ಇಂಡಿಯಾ ಮೂರು ಮಾದರಿಯ ಕ್ರಿಕೆಟ್​ನಲ್ಲಿ ಸೋಲಿಲ್ಲದ ಸರದಾರನಾಗಿ ಮರೆಯುತ್ತಿದೆ. ಇತ್ತ ಶ್ರೀಲಂಕಾ ದುರ್ಬಲ ತಂಡದ ಎದುರೇ ಗೆಲುವಿಗಾಗಿ ಪರದಾಡುತ್ತಿದೆ.

ಈ ಸರಣಿಯನ್ನು ಗೆಲ್ಲಲೇ ಬೇಕೆಂದು ಲಂಕಾ ಈಗಾಗಲೇ 18 ತಿಂಗಳ ಕಾಲ ಟಿ-20 ಯಿಂದ ದೂರವಿದ್ದ ಅನುಭವಿ ಆಟಗಾರ ಆ್ಯಂಜಲೋ ಮ್ಯಾಥ್ಯೂಸ್ ಅವರನ್ನು ಮತ್ತೆ ತಂಡಕ್ಕೆ ಸೇರಿಸಿಕೊಂಡಿದೆ.

ಭಾರತ- ಶ್ರೀಲಂಕಾ ನಡುವಣ ಪಂದ್ಯಗಳ ಅಂಕಿಅಂಶವನ್ನು ಗಮನಿಸುವುದಾದರೆ ಟೀಂ ಇಂಡಿಯಾವೆ ಪ್ರತಿ ಪಂದ್ಯದಲ್ಲಿ ಮೇಲುಗೈ ಸಾಧಿಸಿದೆ.

ವಿಶೇಷ ಎಂದರೆ ಕಳೆದ 12 ವರ್ಷಗಳಲ್ಲಿ ಶ್ರೀಲಂಕಾ ತಂಡ ಭಾರತ ವಿರುದ್ಧ ಒಂದೇ ಒಂದು ಸರಣಿ ಗೆದ್ದುಕೊಂಡಿಲ್ಲ.

ಟೆಸ್ಟ್, ಏಕದಿನ ಹಾಗೂ ಟಿ-20 ಸೇರಿ 2008 ಆಗಸ್ಟ್ ಬಳಿಕ ಭಾರತ- ಲಂಕಾ ಒಟ್ಟು 59 ಪಂದ್ಯಗಳನ್ನಾಡಿದೆ. ಇದರಲ್ಲಿ ಭಾರತ 44 ಪಂದ್ಯಗಳಲ್ಲಿ ಗೆದ್ದರೆ, 10 ರಲ್ಲಿ ಮಾತ್ರ ಸೋಲುಂಡಿದೆ.

12 ವರ್ಷಗಳ ಸರಣಿಯಲ್ಲಿ ಟೀಂ ಇಂಡಿಯಾ ಲಂಕಾ ವಿರುದ್ಧ 16-0 ಅಂತರದಿಂದ ಮೇಲುಗೈ ಸಾಧಿಸಿದೆ.

ವಿರಾಟ್ ಕೊಹ್ಲಿ ಕಾಲಿಟ್ಟ ಬಳಿಕವಂತು ಭಾರತ, ಶ್ರೀಲಂಕಾ ವಿರುದ್ಧ ಸಂಪೂರ್ಣ ಮೇಲುಗೈ ಸಾಧಿಸಿದೆ. ಆಡಿದ 7 ಸರಣಿಯಲ್ಲಿ ಏಳನ್ನೂ ಗೆದ್ದು ಬೀಗಿದೆ. ಆಡಿದ 6 ಟಿ-20 ಪಂದ್ಯಗಳಲ್ಲಿ 5 ರಲ್ಲಿ ಗೆದ್ದರೆ ಒಂದು ಡ್ರಾ ಆಗಿದೆ.

ಸಿಂಹಳೀಯರ ವಿರುದ್ಧ ಕೊಹ್ಲಿ ದಾಖಲೆಯಂತು ಅದ್ಭುತವಾಗಿದೆ. ಒಟ್ಟು 3507 ರನ್ ಕಲೆಹಾಕಿದ್ದು, 13 ಶತಕ ಹಾಗೂ 17 ಅರ್ಧಶತಕ ಲಂಕಾ ವಿರುದ್ಧ ಸಿಡಿಸಿದ್ದಾರೆ.

ಇನ್ನು ಪೌರತ್ವ ಕಾಯ್ದೆ ವಿರೋಧಿ ಗಲಭೆಯಿಂದ ಕರ್ಫ್ಯೂಗೆ ತುತ್ತಾಗಿದ್ದ ಗುವಾಹಾಟಿಯಲ್ಲಿ ಭಾರತ-ಶ್ರೀಲಂಕಾ ಮೊದಲ ಟಿ-20 ಪಂದ್ಯಕ್ಕೆ ಯಾವುದೇ ತೊಂದರೆಯಿಲ್ಲ ಎಂದು ಅಸ್ಸಾಮ್ ಕ್ರಿಕೆಟ್ ಮಂಡಳಿಯ (ಎಸಿಎ) ಅಧ್ಯಕ್ಷ ರೊಮೇನ್ ದತ್ತ ಹೇಳಿದ್ದಾರೆ.

ನಾಳಿನ ಹೈವೋಲ್ಟೇಜ್ ಪಂದ್ಯಕ್ಕೆ ಈಗಾಗಲೇ ಉಭಯ ತಂಡಗಳು ಬರಾಸ್ಪರಾ ಕ್ರೀಡಾಂಗಣದಲ್ಲಿ ಭರ್ಜರಿ ಅಭ್ಯಾಸ ನಡೆಸುತ್ತಿದೆ.

ಭಾರತ ತಂಡ: ವಿರಾಟ್ ಕೊಹ್ಲಿ(ನಾಯಕ), ಶಿಖರ್ ಧವನ್, ಕೆಎಲ್ ರಾಹುಲ್, ಶ್ರೇಯಸ್ ಅಯ್ಯರ್, ಮನೀಶ್ ಪಾಂಡೆ, ಸಂಜು ಸ್ಯಾಮ್ಸನ್, ರಿಷಭ್ ಪಂತ್(ವಿಕೆಟ್ ಕೀಪರ್), ಶಿವಂ ದುಬೇ, ಯುಜವೇಂದ್ರ ಚಹಲ್, ಕುಲದೀಪ್ ಯಾದವ್, ರವೀಂದ್ರ ಜಡೇಜಾ, ಶಾರ್ದೂಲ್ ಠಾಕೂರ್, ನವದೀಪ್ ಸೈನಿ, ಜಸ್ಪ್ರೀತ್ ಬುಮ್ರಾ, ವಾಷಿಂಗ್ಟನ್ ಸುಂದರ್.

ಶ್ರೀಲಂಕಾ ತಂಡ: ಲಸಿತ್ ಮಲಿಂಗಾ (ನಾಯಕ), ಕುಸಲ್ ಪೆರೇರಾ, ಧನುಷ್ಕಾ ಗುಣತಿಲಕ, ಆವಿಷ್ಕಾ ಫೆರ್ನಾಂಡೊ, ಭಾನುಕ ರಾಜಪಕ್ಸ, ಓಶಾಡ ಫೆರ್ನಾಂಡೊ, ಡಸನ್ ಶನಕಾ, ಆ್ಯಂಜಲೊ ಮ್ಯಾಥ್ಯೂಸ್, ನಿರೋಶನ್ ಡಿಕ್ವೆಲ್, ಕುಸಲ್ ಮೆಂಡಿಸ್, ವನಿಂದು ಹಸರಂಗ, ಲಕ್ಷನ್ ಸಂದಕನ್, ಧನಂಜಯ್ ಡಿ ಸಿಲ್ವಾ, ಲಹಿರು ಕುಮಾರ, ಇಸುರು ಉದಾನ.

ಜ. 7 ರಂದು ಇಂದೋರ್​ನ ಹೊಲ್ಕಾರ್ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಎರಡನೇ ಪಂದ್ಯ ಹಾಗೂ ಜ. 10 ರಂದು ಪುಣೆ ಮಹಾರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಕ್ರೀಡಾಂಗಣದಲ್ಲಿ ಅಂತಿಮ ಟಿ-20 ಪಂದ್ಯ ನಡೆಯಲಿದೆ.