India vs New Zealand: ಪಾಂಡೆ ಸಮಯೋಚಿತ ಆಟ; ಧೋನಿ ಜೊತೆಗೆ ವಿಶೇಷ ದಾಖಲೆ ಹಂಚಿಕೊಂಡ ಮನೀಶ್!

ನ್ಯೂಜಿಲೆಂಡ್ ವಿರುದ್ಧದ 4ನೇ ಟಿ-20 ಪಂದ್ಯ ರೋಚಕ ಸೂಪರ್ ಓವರ್​​ನಲ್ಲಿ ಅಂತ್ಯಕಂಡಿತು. ಭಾರತ ಭರ್ಜರಿ ಗೆಲುವು ಸಾಧಿಸುವ ಮೂಲಕ ಐದು ಟಿ-20 ಸರಣಿಯಲ್ಲಿ 4-0 ಅಂತರದ ಮುನ್ನಡೆ ಸಾಧಿಸಿತು.

20 ಓವರ್​ನಲ್ಲಿ ಭಾರತ 8 ವಿಕೆಟ್ ನಷ್ಟಕ್ಕೆ 165 ರನ್ ಗಳಿಸಿದರೆ, ನ್ಯೂಜಿಲೆಂಡ್ ಕೂಡ 20 ಓವರ್​ನಲ್ಲಿ 7 ವಿಕೆಟ್ ಕಳೆದುಕೊಂಡು 165 ರನ್ ಕಲೆಹಾಕಿತು.

ಹೀಗಾಗಿ ನಡೆದ ಸೂಪರ್ ಓವರ್​​ನಲ್ಲಿ ಮೊದಲು ಬ್ಯಾಟ್ ಮಾಡಿದ ನ್ಯೂಜಿಲೆಂಡ್ 13 ರನ್ ಬಾರಿಸಿತು.

14 ರನ್​ಗಳ ಟಾರ್ಗೆಟ್ ಅನ್ನು ಭಾರತ 5 ಎಸೆತದಲ್ಲೇ ಪೂರ್ಣಗೊಳಿಸಿ ಅಮೋಘ ಗೆಲುವು ಕಂಡಿತು.

ಇಂದಿನ ಪಂದ್ಯಕ್ಕೆ ಭಾರತ ಕೆಲವು ಬದಲಾವಣೆಯೊಂದಿಗೆ ಕಣಕ್ಕಿಳಿಯಿತು. ಆದರೆ, ಬ್ಯಾಟಿಂಗ್​ನಲ್ಲಿ ಕೊಹ್ಲಿ ಪಡೆ ಸಂಪೂರ್ಣ ವೈಫಲ್ಯ ಅನುಭವಿಸಿತು.

ಮನೀಶ್ ಪಾಂಡೆ ಸಮಯೋಚಿತ ಆಟ ತಂಡಕ್ಕೆ ನೆರವಾಯಿತಷ್ಟೆ. ಪಾಂಡೆ 36 ಎಸೆತಗಳಲ್ಲಿ ಅಜೇಯ 50 ರನ್ ಬಾರಿಸಿದರು.

ಇದರೊಂದಿಗೆ ಪಾಂಡೆ ಅಂತರಾಷ್ಟ್ರೀಯ ಟಿ-20 ಕ್ರಿಕೆಟ್​ನಲ್ಲಿ ಮೂರನೇ ಅರ್ಧಶತಕದ ಸಾಧನೆ ಮಾಡಿದರು. ಜೊತೆಗೆ ಹೊಸ ದಾಖಲೆಯನ್ನೂ ಬರೆದರು.

ಟಿ-20 ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಆರು ಅಥವಾ ಅದಕ್ಕಿಂತಲೂ ಕೆಳ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗಿಳಿದು ಅರ್ಧಶತಕ ಸಾಧನೆ ಮಾಡಿರುವ ಭಾರತದ ಎರಡನೇ ಬ್ಯಾಟ್ಸ್​ಮನ್​ ಎಂಬ ಸಾಧನೆಯನ್ನು ಪಾಂಡೆ ಮಾಡಿದ್ದಾರೆ.

ಇದಕ್ಕೂ ಮುನ್ನ ಎಂಎಸ್ ಧೋನಿ 2018ರಲ್ಲಿ ಸೆಂಚುರಿಯನ್ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಅಜೇಯ 52 ರನ್ ಗಳಿಸಿ ಈ ಸಾಧನೆ ಮಾಡಿದ್ದರು. ಸದ್ಯ ಪಾಂಡೆ ಕೂಡ ಅಪರೂಪದ ದಾಖಲೆ ಮಾಡಿದ್ದಾರೆ.

ಭಾರತ ಆರಂಭದಲ್ಲೇ ಪ್ರಮುಖ ವಿಕೆಟ್ ಕಳೆದುಕೊಂಡಿತು. 11.3 ಓವರ್​ಗಳಲ್ಲೇ 88 ರನ್​ಗೆ ಆರು ವಿಕೆಟುಗಳನ್ನು ಕಳೆದುಕೊಂಡು ಸಂಕಷ್ಟದಲ್ಲಿ ಸಿಲುಕಿದ್ದ ಸಂದರ್ಭ ತಂಡಕ್ಕೆ ಆಸರೆಯಾಗಿದ್ದು ಮನೀಶ್ ಪಾಂಡೆ.

ಆರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಬಂದ ಪಾಂಡೆ, ಬಾಲಂಗೋಚಿಗಳ ಜೊತೆಗೆ ಸೇರಿ ಅಮೂಲ್ಯ ಇನ್ನಿಂಗ್ಸ್ ಕಟ್ಟಿದರು. ಹೆಚ್ಚೇನು ಬೌಂಡರಿ-ಸಿಕ್ಸರ್​ಗಳು ಬಾರಿಸಿದೆ ಒಂದು-ಎರಡು ರನ್ ಕಲೆಹಾಕಿಯೇ ತಂಡದ ಮೊತ್ತವನ್ನು 150ರ ಗಡಿ ದಾಟಿಸಿದರು.

ಅಂತಿಮವಾಗಿ ಭಾರತ ಸೂಪರ್ ಓವರ್​ನಲ್ಲಿ ಗೆಲುವು ಕಾಣುವ ಮೂಲಕ ಐದು ಟಿ-20 ಸರಣಿಯಲ್ಲಿ 4-0 ಅಂತರದಿಂದ ಸರಣಿಯಲ್ಲಿ ಮುನ್ನಡೆ ಸಾಧಿಸಿದೆ.

ಅಂತಿಮ ಐದನೇ ಟಿ-20 ಪಂದ್ಯ ಫೆಬ್ರವರಿ 2 ಭಾನುವಾರದಂದು ಮೌಂಟ್ ಮೌಂಗನಿಯಲ್ಲಿ ನಡೆಯಲಿದೆ.