R Ashwin: ಕುಂಬ್ಳೆ, ಭಜ್ಜಿ ದಾಖಲೆ ಮುರಿದು, ಐತಿಹಾಸಿಕ ಸಾಧನೆ ಮಾಡಿದ ರವಿಚಂದ್ರನ್ ಅಶ್ವಿನ್

ಅಹಮದಾಬಾದ್​ನಲ್ಲಿ ನಡೆದ ಭಾರತ-ಇಂಗ್ಲೆಂಡ್​ ನಡುವಣ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಆಫ್ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ 400 ಟೆಸ್ಟ್ ವಿಕೆಟ್ ಸಾಧನೆ ಮಾಡಿದ್ದಾರೆ. ದ್ವಿತೀಯ ಇನಿಂಗ್ಸ್​ನಲ್ಲಿ 4 ವಿಕೆಟ್ ಪಡೆಯುವುದರೊಂದಿಗೆ ಅಶ್ವಿನ್ 400 ವಿಕೆಟ್​ಗಳ ಗಡಿದಾಟಿದರು.

ಇಂಗ್ಲೆಂಡ್ ವಿರುದ್ದ ದ್ವಿತೀಯ ಇನಿಂಗ್ಸ್​ನಲ್ಲಿ ವೇಗಿ ಜೋಫ್ರಾ ಆರ್ಚರ್​ ಅವರನ್ನು ಎಲ್​ಬಿಡಬ್ಲ್ಯೂ ಬಲೆಗೆ ಬೀಳಿಸಿದ ಅಶ್ವಿನ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ತಮ್ಮ 400 ವಿಕೆಟ್‌ಗಳನ್ನು ಪೂರೈಸಿದರು. ಇದರೊಂದಿಗೆ ಭಾರತದ ಪರ ಅತೀ ವೇಗವಾಗಿ 400 ವಿಕೆಟ್ ಪಡೆದ ಬೌಲರ್​ ಎಂಬ ಹಿರಿಮೆಗೆ ಅಶ್ವಿನ್ ಪಾತ್ರರಾಗಿದ್ದಾರೆ.

ಅಶ್ವಿನ್ ಕೇವಲ 77 ಟೆಸ್ಟ್ ಪಂದ್ಯಗಳಿಂದ ಈ ಸಾಧನೆ ಮಾಡಿದರೆ, ಅನಿಲ್ ಕುಂಬ್ಳೆ 400 ವಿಕೆಟ್‌ ಪಡೆಯಲು 85 ಟೆಸ್ಟ್ ಪಂದ್ಯಗಳನ್ನಾಡಿದ್ದರು. ಹಾಗೆಯೇ, ಹರ್ಭಜನ್ ಸಿಂಗ್ 96 ಟೆಸ್ಟ್ ಪಂದ್ಯಗಳಿಂದ 400 ವಿಕೆಟ್ ಪೂರೈಸಿದ್ದರು.

ಇನ್ನು ಈ ಸಾಧನೆ ಮಾಡಿದ ಭಾರತ ನಾಲ್ಕನೇ ಬೌಲರ್ ಎಂಬ ಹೆಗ್ಗಳಿಕೆಗೂ ಅಶ್ವಿನ್ ಪಾತ್ರರಾಗಿದ್ದರು. ಇದಕ್ಕೂ ಮುನ್ನ ಟೆಸ್ಟ್​ ಕ್ರಿಕೆಟ್​ನಲ್ಲಿ ಕಪಿಲ್ ದೇವ್, ಅನಿಲ್ ಕುಂಬ್ಳೆ ಮತ್ತು ಹರ್ಭಜನ್ ಸಿಂಗ್ ಅವರು ಈ ಸಾಧನೆ ಮಾಡಿದ್ದರು.

ಕೇವಲ 72 ಪಂದ್ಯಗಳಲ್ಲಿ 400 ಟೆಸ್ಟ್ ವಿಕೆಟ್‌ಗಳ ಕಬಳಿಸಿರುವ ಶ್ರೀಲಂಕಾದ ಮುತ್ತ ಮುರಳೀಧರನ್ ಮೊದಲ ಸ್ಥಾನದಲ್ಲಿದ್ದರೆ, ನಂತರ ಸ್ಥಾನವು 77 ಪಂದ್ಯಗಳಿಂದ ಅಶ್ವಿನ್ ಪಾಲಾಗಿದೆ. ಈ ಮೂಲಕ ಸರ್ ರಿಚರ್ಡ್ ಹೆಡ್ಲಿ ಮತ್ತು ಡೇಲ್ ಸ್ಟೇನ್ ಮತ್ತು ರಂಗನಾ ಹೆರಾತ್ ಅವರನ್ನು ಟೀಮ್ ಇಂಡಿಯಾ ಸ್ಪಿನ್ನರ್ ಹಿಂದಿಕ್ಕಿದ್ದಾರೆ.

ಇನ್ನು ಟೀಮ್ ಇಂಡಿಯಾ ಪರ ಟೆಸ್ಟ್​ ಕ್ರಿಕೆಟ್​ನ ಅತ್ಯಂತ ಯಶಸ್ವಿ ಬೌಲರ್ ಎಂಬ ದಾಖಲೆ ಅಶ್ವಿನ್ ಮುಂದಿದೆ. ಈ ಪಟ್ಟಿಯಲ್ಲಿ 619 ವಿಕೆಟ್ ಉರುಳಿಸಿರುವ ಅನಿಲ್ ಕುಂಬ್ಳೆ ಅಗ್ರಸ್ಥಾನದಲ್ಲಿದ್ದಾರೆ. ನಂತರದ ಸ್ಥಾನದಲ್ಲಿ 417 ವಿಕೆಟ್​ ಕಬಳಿಸಿರುವ ಹರ್ಭಜನ್ ಸಿಂಗ್ ಇದ್ದು, ಭಜ್ಜಿಯ ಈ ದಾಖಲೆ ಮುರಿಯಲು ಸದ್ಯ ಅಶ್ವಿನ್​ಗೆ ಕೇವಲ 17 ವಿಕೆಟ್​ಗಳ ಅವಶ್ಯಕತೆಯಿದೆ.