Jonny bairstow: 7 ರಲ್ಲಿ 5 ಡಕ್: ಭಾರತದ ವಿರುದ್ದ 'ಮೊಟ್ಟೆ'ಯ ಕಥೆ ಮುಂದುವರೆಸಿದ ಬೈರ್​ಸ್ಟೋ..!

ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ಭಾರತ ವಿರುದ್ಧದ ಮೂರನೇ ಟೆಸ್ಟ್​ನ ಎರಡೂ ಇನಿಂಗ್ಸ್​ನಲ್ಲೂ ಇಂಗ್ಲೆಂಡ್ ಬ್ಯಾಟ್ಸ್‌ಮನ್ ಜಾನಿ ಬೈರ್‌ಸ್ಟೋ ಶೂನ್ಯಕ್ಕೆ ಔಟಾಗಿದ್ದರು. ಎರಡೂ ಬಾರಿ ಅವರ ವಿಕೆಟ್ ಪಡೆದಿರುವುದು ಅಕ್ಷರ್ ಪಟೇಲ್ ಎಂಬುದು ವಿಶೇಷ.

ಮೊದಲ ಇನ್ನಿಂಗ್ಸ್‌ನಲ್ಲಿ ಬೈರ್‌ಸ್ಟೋ ಅವರನ್ನು ಬೌಲ್ಡ್ ಮಾಡಿದ್ದ ಅಕ್ಷರ್ ಪಟೇಲ್, ದ್ವಿತೀಯ ಇನಿಂಗ್ಸ್​ನಲ್ಲೂ ಕ್ಲೀನ್ ಬೌಲ್ಡ್ ಮಾಡಿದರು. ಇದರೊಂದಿಗೆ ಭಾರತದ ವಿರುದ್ಧ ಬೈರ್​ಸ್ಟೋ 'ಶೂನ್ಯ'​ ಪಯಣ ಮುಂದುವರೆಯಿತು.

ಏಕೆಂದರೆ ಬೈರ್​ಸ್ಟೋ ಭಾರತದ ವಿರುದ್ಧ ಕಳೆದ 7 ಇನ್ನಿಂಗ್ಸ್‌ಗಳಲ್ಲಿ 5 ಬಾರಿ ಖಾತೆಯನ್ನೇ ತೆರೆದಿಲ್ಲ. ಅಂದರೆ ಟೀಮ್ ಇಂಡಿಯಾ ವಿರುದ್ಧದ ಕಳೆದ 7 ಇನಿಂಗ್ಸ್​ನಲ್ಲಿ 5 ಇನ್ನಿಂಗ್ಸ್‌ಗಳಲ್ಲಿ ಬೈರ್​ಸ್ಟೋ ಕಲೆಹಾಕಿದ್ದು 24 ರನ್​ ಮಾತ್ರ. ಅದರಲ್ಲಿ ಒಂದು ಇನಿಂಗ್ಸ್​ನಲ್ಲಿ 18 ಹಾಗೂ ಮತ್ತೊಂದು ಇನಿಂಗ್ಸ್​ 6 ರನ್​ ಬಾರಿಸಿದ್ದರು. ಇದಾಗಿ ಉಳಿದ 5 ಇನಿಂಗ್ಸ್​ನಲ್ಲಿ ಶೂನ್ಯಕ್ಕೆ ಔಟಾಗಿದ್ದರು.

ಇನ್ನು ಟೆಸ್ಟ್ ಕ್ರಿಕೆಟ್‌ನಲ್ಲಿ ಬೈರ್‌ಸ್ಟೋ ಅವರ ಬ್ಯಾಟಿಂಗ್ ಸರಾಸರಿ 34.45. ಆದರೆ ಭಾರತದ ವಿರುದ್ಧ ಕೇವಲ 29.55 ಸರಾಸರಿ ಹೊಂದಿದ್ದಾರೆ. ಹಾಗೆಯೇ 72 ಟೆಸ್ಟ್ ಪಂದ್ಯಗಳನ್ನಾಡಿರುವ ಬೈರ್‌ಸ್ಟೋ ಭಾರತದ ವಿರುದ್ಧ ಇದುವರೆಗೆ ಒಂದೇ ಒಂದು ಶತಕ ಬಾರಿಸಿಲ್ಲ.

2018 ರಲ್ಲಿ ಲಾರ್ಡ್ಸ್​ನಲ್ಲಿ ನಡೆದ ಭಾರತದ ವಿರುದ್ಧದ ಟೆಸ್ಟ್‌ನಲ್ಲಿ ತಮ್ಮ ಕೊನೆಯ ಅರ್ಧಶತಕವನ್ನು ಬಾರಿಸಿದ್ದರು. ಮೂರು ವರ್ಷಗಳ ಹಿಂದೆ ಟೀಮ್ ಇಂಡಿಯಾ ವಿರುದ್ದ 93 ರನ್ ಬಾರಿಸಿದ ಬಳಿಕ ಬೈರ್ ಸ್ಟೋ ಮತ್ತೆ ಹಾಫ್ ಸೆಂಚುರಿ ಬಾರಿಸಿಲ್ಲ ಎಂಬುದೇ ಅಚ್ಚರಿ. ಅದರಲ್ಲೂ ಟೀಮ್ ಇಂಡಿಯಾ ವಿರುದ್ಧ ಕೊನೆಯ 7 ಇನಿಂಗ್ಸ್​ನಲ್ಲಿ 5 ರಲ್ಲಿ ಶೂನ್ಯಕ್ಕೆ ಔಟಾಗಿರುವುದು ದೊಡ್ಡ ಅಚ್ಚರಿ.