ಶೀಘ್ರದಲ್ಲೇ ನ್ಯೂಜಿಲೆಂಡ್ ಪರ ಕಣಕ್ಕಿಳಿಯಲಿದ್ದಾರೆ ದಕ್ಷಿಣ ಆಫ್ರಿಕಾ ಕ್ರಿಕೆಟಿಗ..!

ಕೊರೋನಾ ವೈರಸ್ ಭೀತಿ ಹಿನ್ನೆಲೆಯಲ್ಲಿ ಕ್ರಿಕೆಟ್ ಸಂಪೂರ್ಣ ಸ್ಥಗಿತಗೊಂಡಿದ್ದರೂ, ಅತ್ತ ನ್ಯೂಜಿಲೆಂಡ್ ಕ್ರಿಕೆಟ್​ಗೆ ಸಿಹಿ ಸುದ್ದಿಯೊಂದು ಒದಗಿ ಬಂದಿದೆ.

ದಕ್ಷಿಣ ಆಫ್ರಿಕಾದ ಕ್ರಿಕೆಟಿಗ ಡೆವೊನ್ ಕಾನ್ವೆ ಇದೀಗ ಬೇರೊಂದು ದೇಶದ ಪರ ಕಣಕ್ಕಿಳಿಯಲು ಅವಕಾಶ ಪಡೆದಿದ್ದಾರೆ. ಸೌತ್ ಆಫ್ರಿಕಾ ದೇಸಿ ಕ್ರಿಕೆಟ್​ನಲ್ಲಿ ಆಕ್ರಮಣಕಾರಿ ಆಟದಿಂದಲೇ ಹೆಸರುವಾಸಿಯಾಗಿದ್ದ ಕಾನ್ವೆಗೆ ಬೇರೆ ದೇಶದ ಪರ ಆಡಲು ಐಸಿಸಿ ಅನುಮೋದನೆ ನೀಡಿದೆ.

ಅದರಂತೆ ಡೆವೊನ್ ಕಾನ್ವೆ ನ್ಯೂಜಿಲೆಂಡ್ ತಂಡವನ್ನು ಆಯ್ಕೆ ಮಾಡಿಕೊಂಡಿದ್ದು, ಶೀಘ್ರದಲ್ಲೇ ಕಿವೀಸ್ ನೆಲದಲ್ಲಿ ಕ್ರಿಕೆಟ್ ವೃತ್ತಿ ಆರಂಭಿಸಲಿದ್ದಾರೆ.

ದಕ್ಷಿಣ ಆಫ್ರಿಕಾದಲ್ಲಿ ಜನಿಸಿರುವ 2017 ರಲ್ಲಿ ಬೇರೊಂದು ದೇಶದ ಪರ ಕಣಕ್ಕಿಳಿಯುವ ನಿರ್ಧಾರ ಮಾಡಿದ್ದರು. ಆಕ್ರಮಣಕಾರಿ ಆಟದಿಂದಲೇ ಲೀಸ್ಟ್​ ಎ ಕ್ರಿಕೆಟ್​ನಲ್ಲಿ ಮನೆಮಾತಾಗಿದ್ದ ಅವಕಾಶಗಳ ಕೊರತೆಯಿಂದ ಈ ತೀರ್ಮಾನಕ್ಕೆ ಬಂದಿದ್ದರು.

ಅದಾಗಲೇ ಸೌತ್ ಆಫ್ರಿಕಾ ದೇಶೀಯ ಕ್ರಿಕೆಟ್​ನಲ್ಲಿ ಆಡಿದ್ದರಿಂದ ಏಕಾಏಕಿ ಬೇರೊಂದು ದೇಶದ ಪರ ಆಡುವುದು ಸುಲಭವಾಗಿರಲಿಲ್ಲ. ಹೀಗಾಗಿ ಐಸಿಸಿ ಮೊರೆ ಹೋದ ಯುವ ಆಟಗಾರ ಇದೀಗ ನ್ಯೂಜಿಲೆಂಡ್ ಪರ ಅಂತರಾಷ್ಟ್ರೀಯ ಕ್ರಿಕೆಟ್ ಆಡುವ ಅವಕಾಶ ಪಡೆದಿದ್ದಾರೆ.

ಈಗಾಗಲೇ ನ್ಯೂಜಿಲೆಂಡ್​ನಲ್ಲಿ ಕ್ರಿಕೆಟ್ ಆರಂಭಿಸಿರುವ ಕಾನ್ವೆ ವೆಲ್ಲಿಂಗ್ಟನ್ ಪರ  17 ಪ್ರಥಮ ದರ್ಜೆ ಪಂದ್ಯಗಳನ್ನಾಡಿದ್ದಾರೆ. ಇದರಲ್ಲಿ  1598 ರನ್​ ಚಚ್ಚುವ ಮೂಲಕ ಆಯ್ಕೆಗಾರರ ಗಮನ ಸೆಳೆದಿದ್ದಾರೆ.

ಅದರಲ್ಲೂ ಕ್ಯಾಂಟರ್​ಬರಿ ವಿರುದ್ಧ ಸ್ಪೋಟಕ ಅಜೇಯ ತ್ರಿಶತಕ ಸಿಡಿಸಿ ಎಲ್ಲರ ಗಮನ ಸೆಳೆದಿದ್ದರು ಡೆವೊನ್ ಕಾನ್ವೆ. ಈ ಪಂದ್ಯದಲ್ಲಿ 334 ಎಸೆತಗಳನ್ನು ಎದುರಿಸಿದ ಈ ಆಫ್ರಿಕನ್ ಆಟಗಾರ ಭರ್ಜರಿ 327 ರನ್ ಬಾರಿಸಿದ್ದರು.

ಆ ಬಳಿಕ ನ್ಯೂಜಿಲೆಂಡ್ ರಾಷ್ಟ್ರೀಯ ಆಯ್ಕೆದಾರರು ಕಾನ್ವೆ ಆಯ್ಕೆ ಬಗ್ಗೆ ಒಲವು ತೋರಿದ್ದರೂ, ದಕ್ಷಿಣ ಆಫ್ರಿಕಾ ಆಟಗಾರನಾಗಿರುವುದರಿಂದ ಅವಕಾಶ ಸಿಕ್ಕಿರಲಿಲ್ಲ.

ಆದರೆ ಇದೀಗ ಆಗಸ್ಟ್​ 15 ರಿಂದ ನ್ಯೂಜಿಲೆಂಡ್ ಎ ತಂಡವನ್ನು ಪ್ರತಿನಿಧಿಸುವ ಅವಕಾಶವನ್ನು ಡೆವೊನ್ ಕಾನ್ವೆಗೆ ನೀಡಲಾಗಿದ್ದು, ಆ ಬಳಿಕ ರಾಷ್ಟ್ರೀಯ ತಂಡದಲ್ಲಿ ಅವಕಾಶ ಪಡೆಯಬಹುದು ಎಂದು ಐಸಿಸಿ ತಿಳಿಸಿದೆ.

ದಕ್ಷಿಣ ಆಫ್ರಿಕಾ ಮೂಲದ ಕಾಲಿನ್ ಮನ್ರೋ ಈಗಾಗಲೇ ನ್ಯೂಜಿಲೆಂಡ್ ಕ್ರಿಕೆಟ್ ತಂಡವನ್ನು ಪ್ರತಿನಿಧಿಸುತ್ತಿದ್ದು, ಇದಕ್ಕೂ ಮುನ್ನ ಗ್ರಾಂಟ್ ಎಲಿಯೆಟ್ ಸಹ ಸೌತ್ ಆಫ್ರಿಕಾ ತೊರೆದು ಕಿವೀಸ್ ಪರ ಕಣಕ್ಕಿಳಿದಿದ್ದರು.