WPL 2023-Nita Ambani: ವುಮೆನ್ಸ್ ಪ್ರೀಮಿಯರ್ ಲೀಗ್ ಅನೇಕ ಯುವತಿಯರಿಗೆ ಸ್ಫೂರ್ತಿ ನೀಡುತ್ತಿದೆ; ನೀತಾ ಅಂಬಾನಿ ಮೆಚ್ಚುಗೆಯ ಮಾತು

ಚೊಚ್ಚಲ ವುಮೆನ್ಸ್ ಪ್ರೀಮಿಯರ್ ಲೀಗ್​ಗೆ ಮಾರ್ಚ್​ 4ರಂದು ಅದ್ದೂರಿ ಆರಂಭ ಸಿಕ್ಕಿದೆ. ಮುಂಬೈ ಇಂಡಿಯನ್ಸ್ ತಂಡ ತಮ್ಮ ಉದ್ಘಾಟನಾ ಪಂದ್ಯದಲ್ಲಿ ಒಡತಿ ನೀತಾ ಅಂಬಾನಿ  ಸಮ್ಮುಖದಲ್ಲಿ ಭವ್ಯ ಪ್ರದರ್ಶನ ನೀಡಿದೆ. ಡಿವೈ ಪಾಟೀಲ್ ಕ್ರೀಡಾಂಗಣದಲ್ಲಿ ಮಾರ್ಚ್ 4 ರಂದು ನಡೆದ ಪಂದ್ಯದಲ್ಲಿ ಗುಜರಾತ್ ಜೈಂಟ್ಸ್ ವಿರುದ್ಧ ಮುಂಬೈ ಇಂಡಿಯನ್ಸ್ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಅದ್ಭುತ ಪ್ರದರ್ಶನ ತೋರಿ 143 ರನ್​ಗಳ ಭರ್ಜರಿ ಜಯ ದಾಖಲಿಸಿದೆ.

ಉದ್ಘಾಟನಾ ಪಂದ್ಯದಲ್ಲಿ ಕ್ರೀಡಾಂಗಣ ಮಹಿಳೆಯರು ಮತ್ತು ಪುರುಷ ಕ್ರಿಕೆಟ್ ಅಭಿಮಾನಿಗಳಿಂದ ತುಂಬಿತ್ತು. ಮಹಿಳಾ ಕ್ರಿಕೆಟ್​ ಸೇರಿದಂತೆ ಹಲವು ಕ್ರೀಡೆಗಳಲ್ಲಿ ಮಹಿಳೆಯರ ಉನ್ನತಿಯನ್ನು ಸದಾ ಬಯಸುವ ಮುಂಬೈ ಇಂಡಿಯನ್ಸ್​ ಒಡತಿ ನೀತಾ ಅಂಬಾನಿ ನಿನ್ನೆಯ ಪಂದ್ಯದ ಪ್ರತಿಯೊಂದು ಎಸೆತವನ್ನು ಸಖತ್​ ಎಂಜಾಯ್ ಮಾಡಿದ್ದರು.

ಪಂದ್ಯದ ನಂತರ ನೀತಾ ಅಂಬಾನಿ ಅವರು ಸಂಪ್ರದಾಯದಂತೆ ಮುಂಬೈ ಇಂಡಿಯನ್ಸ್ ತಂಡದ ಡ್ರೆಸಿಂಗ್​ ರೂಮ್​ ಸಂಭ್ರಮಾಚರಣೆಯಲ್ಲಿ ಪಾಲ್ಗೊಂಡು ತಂಡದ ಆಟಗಾರ್ತಿಯರನ್ನ ಅಭಿನಂದಿಸಿದರು. ಈ ಸಂದರ್ಭದಲ್ಲಿ ಇದು ಮಹಿಳಾ ಕ್ರಿಕೆಟ್​ಗೆ ಅಪ್ರತಿಮ ದಿನ ಮತ್ತು ಅಪ್ರತಿಮ ಕ್ಷಣ. ನಾನು ಮಹಿಳಾ ಪ್ರೀಮಿಯರ್ ಲೀಗ್​ ಭಾಗವಾಗಿದ್ದಕ್ಕೆ ತುಂಬಾ ಹೆಮ್ಮೆ ಅನ್ನಿಸುತ್ತಿದೆ ಎಂದು ಪಂದ್ಯ ಮುಗಿದ ನಂತರ ನಡೆದ ಸಂದರ್ಶನದಲ್ಲಿ ನೀತಾ ಅಂಬಾನಿ ಹೇಳಿದ್ದಾರೆ.

ವುಮೆನ್ಸ್ ಪ್ರೀಮಿಯರ್ ಲೀಗ್ ಹೆಚ್ಚಿನ ಮಹಿಳೆಯರಿಗೆ ಕ್ರೀಡೆಯನ್ನು ಆಯ್ಕೆ ಮಾಡಿಕೊಳ್ಳುವುದಕ್ಕೆ ಹಾಗೂ ಕ್ರೀಡೆಯಲ್ಲಿ ವೃತ್ತಿಜೀವನ ಕಂಡುಕೊಳ್ಳುವುದಕ್ಕೆ ನೆರವಾಗುತ್ತದೆ ಎಂದರು.

ಇದು ಇಡೀ ದೇಶದ ಯುವತಿಯರಿಗೆ ಕ್ರೀಡೆಯನ್ನು ಆಯ್ಕೆ ಮಾಡಿಕೊಳ್ಳಲು, ತಮ್ಮ ಕನಸನ್ನು ನನಸಾಗಿಸಲು ಮತ್ತು ಅವರ ಹೃದಯದ ಮಾತನ್ನು ಅನುಸರಿಸಲು ಪ್ರೇರಣೆಯಾಗಲಿದೆ ಎಂದು ನಾನು ಭಾವಿಸುತ್ತೇನೆ ಎಂದು ತಿಳಿಸಿದ್ದಾರೆ.

ಇನ್ನು ಉದ್ಘಾಟನಾ ಪಂದ್ಯದಲ್ಲಿ ಟಾಸ್​ ಸೋತು ಬ್ಯಾಟಿಂಗ್ ಇಳಿದಿದ್ದ ಮುಂಬೈ ಇಂಡಿಯನ್ಸ್ ತಂಡ 20 ಓವರ್​ಗಳಲ್ಲಿ 5 ವಿಕೆಟ್​ ಕಳೆದುಕೊಂಡು 207 ರನ್​ಗಳ ಬೃಹತ್​ ಮೊತ್ತ ದಾಖಲಿಸಿದೆ. ನಾಯಕಿ ಹರ್ಮನ್ ಪ್ರೀತ್​ ಕೌರ್ 30 ಎಸೆತಗಳಲ್ಲಿ 65, ಅಮೆಲಿಯಾ ಕೆರ್ 24 ಎಸೆತಗಳಲ್ಲಿ 45, ಹೇಲಿ ಮ್ಯಾಥ್ಯೂಸ್​ 31 ಎಸೆತಗಳಲ್ಲಿ 47 ರನ್​, ಸೀವರ್ ​ 18 ಎಸೆತಗಳಲ್ಲಿ 23 ರನ್​ಗಳಿಸಿ ಮೊದಲ ಪಂದ್ಯದಲ್ಲೇ ತಂಡ ದ್ವಿಶತಕ ದಾಖಲಿಸಲು ನೆರವಾಗಿದ್ದಾರೆ. ಗುಜರಾತ್ ಪರ ಸ್ನೇಹ್ ರಾಣಾ 2, ಜಾರ್ಜಿಯಾ ವೇರ್ಹ್ಯಾಮ್, ತನ್ವರ್​ ಹಾಗೂ ಗಾರ್ಡ್ನರ್​ ತಲಾ ಒಂದು ವಿಕೆಟ್ ಪಡೆದರು.

ಮುಂಬೈ ನೀಡಿದ 208 ರನ್​ಗಳ ಗುರಿಯನ್ನು ಬೆನ್ನಟ್ಟಿದ ಗುಜರಾತ್ ಯಾವುದೇ ಅಂತದಲ್ಲಿ ಪ್ರತಿರೋಧ ತೋರದೆ 15.1 ಓವರ್​ಗಳಲ್ಲಿ ಕೇವಲ 64 ರನ್​ಗಳಿಗೆ ಸರ್ವಪತನ ಕಂಡು 143 ರನ್​ಗಳ ಸೋಲು ಕಂಡಿತು. ಸೈಕಾ ಇಶಾಕ್ 11ಕ್ಕೆ 4, ಅಮೆಲಿಯಾ ಕೆರ್ 12ಕ್ಕೆ 2, ಸೀವರ್​ 5ಕ್ಕೆ2 ಹಾಗೂ ಇಸ್ಸಿ ವಾಂಗ್ 7ಕ್ಕೆ 1 ವಿಕೆಟ್ ಪಡೆದುಕೊಂಡು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.