ನೀನು ಮಾತ್ರವಲ್ಲ, ಆತನೂ ಕೂಡ ತಂಡಕ್ಕಾಗಿ ಆಡುತ್ತಿದ್ದಾನೆ, ನೆನಪಿರಲಿ..!

ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರ ಕ್ಲಾಸ್ ಇನಿಂಗ್ಸ್​ಗಳಿಗೆ 1998 ರಲ್ಲಿ ಶಾರ್ಜಾದಲ್ಲಿ ನಡೆದ ಕೊಕಕೊಲ ಕಪ್ ಸಾಕ್ಷಿಯಾಗಿತ್ತು.

ಭಾರತ-ಆಸ್ಟ್ರೇಲಿಯಾ-ನ್ಯೂಜಿಲೆಂಡ್ ನಡುವಣ ಈ ತ್ರಿಕೋನಾ ಸರಣಿಯಲ್ಲಿ ಸಚಿನ್ ತೆಂಡೂಲ್ಕರ್ ಏಕಾಂಗಿಯಾಗಿ ಅಬ್ಬರಿಸಿದ್ದರು. ಬ್ಯಾಕ್ ಟು ಬ್ಯಾಕ್ ಸೆಂಚುರಿ ಸಿಡಿಸಿ ಭಾರತಕ್ಕೆ ಜಯ ತಂದುಕೊಟ್ಟಿದ್ದರು.

ಅದರಲ್ಲೂ ಏಪ್ರಿಲ್​ 22 ರಂದು ನಡೆದ ಆಸ್ಟ್ರೇಲಿಯಾ ವಿರುದ್ಧ ಪಂದ್ಯವು ರೋಚಕ ಹೋರಾಟಕ್ಕೆ ಸಾಕ್ಷಿಯಾಗಿತ್ತು. ಟಾಸ್ ಗೆದ್ದ ಆಸೀಸ್ ನಾಯಕ ಸ್ಟೀವ್ ವಾ ಬ್ಯಾಟಿಂಗ್ ಆಯ್ದುಕೊಂಡರು.

ಆರಂಭಿಕ ಆಟಗಾರ ಮಾರ್ಕ್ ವಾ ಅವರ 81 ರನ್​ ಹಾಗೂ ಮೈಕೆಲ್ ಬೆವನ್​ರ ಅಜೇಯ ಶತಕದ ನೆರವಿನಿಂದ ಆಸ್ಟ್ರೇಲಿಯಾ ಟೀಮ್ ಇಂಡಿಯಾಗೆ 284 ರನ್​ಗಳ ಗುರಿ ನೀಡಿತು.

ಈ ಬೃಹತ್ ಮೊತ್ತವನ್ನು ಸೌರವ್ ಗಂಗೂಲಿ ಹಾಗೂ ಸಚಿನ್ ತೆಂಡೂಲ್ಕರ್ ಕಣಕ್ಕಿಳಿದರು. 17 ರನ್ ಗಳಿಸಿ ದಾದಾ ವಿಕೆಟ್ ಒಪ್ಪಿಸಿದರು. ನಂತರ ಬಂದ ನಯನ್ ಮೊಂಗಿಯಾ 35 ರನ್ ಗಳಿಸಿ ಹೊರ ನಡೆದರು.

ಆದರೆ ಫೈನಲ್ ಪ್ರವೇಶಿಸಲು ಭಾರತಕ್ಕೆ ಈ ಪಂದ್ಯವನ್ನು ಗೆಲ್ಲಲೇಬೇಕಾದ ಅನಿವಾರ್ಯತೆ ಇತ್ತು. ಇದರ ಹೊರತಾಗಿ ರನ್​ರೇಟ್ ಮೂಲಕ ಅಂತಿಮ ಹಂತಕ್ಕೇರುವ ಪ್ಲ್ಯಾನ್ ರೂಪಿಸಿತ್ತು ಟೀಮ್ ಇಂಡಿಯಾ.

ಕೆಲ ಹೊತ್ತು ಪಂದ್ಯಕ್ಕೆ ಅಡಚಣೆ ಉಂಟಾದ ಕಾರಣದಿಂದ ಡಕ್​ವರ್ತ್ ನಿಯಮದ ಪ್ರಕಾರ ಭಾರತಕ್ಕೆ 46 ಓವರ್​ಗಳಲ್ಲಿ 276 ರನ್​ಗಳ ಟಾರ್ಗೆಟ್ ನೀಡಲಾಯಿತು. ಅಜರುದ್ದೀನ್, ಜಡೇಜಾ ಬಂದ ವೇಗದಲ್ಲೇ ನಿರ್ಗಮಿಸುವುದರೊಂದಿಗೆ ತಂಡದ ಸಂಪೂರ್ಣ ಜವಾಬ್ದಾರಿ ಸಚಿನ್ ಹೆಗಲೇರಿತು.

ಒಂದೆಡೆ ಆಸೀಸ್​ ವೇಗಿಗಳನ್ನು ದಂಡಿಸುತ್ತಾ ಮಾಸ್ಟರ್ ಬ್ಲಾಸ್ಟರ್ ಕ್ರೀಸ್ ಕಚ್ಚಿ ನಿಂತಿದ್ದರು. ಆದರೆ ಮತ್ತೊಂದೆಡೆ ವಿಕೆಟ್ ಉರುಳುತ್ತಿತ್ತು. ಕೊನೆಗೆ ವಿವಿಎಸ್ ಲಕ್ಷ್ಮನ್ ಜೊತೆ ಇನಿಂಗ್ಸ್​ ಕಟ್ಟುವ ಜವಾಬ್ದಾರಿವಹಿಸಿಕೊಂಡರು ಸಚಿನ್.

ಭರ್ಜರಿ ಸೆಂಚುರಿಯೊಂದಿಗೆ ಸಚಿನ್ ತಂಡದ ಮೊತ್ತವನ್ನು 200ರ ಗಡಿದಾಟಿಸಿದರು. 41ನೇ ಓವರ್​ನಲ್ಲಿ ತೆಂಡೂಲ್ಕರ್ ರನ್ ಕದಿಯಲು ಯತ್ನಿಸಿದರು. ಆದರೆ ಅತ್ತ ಲಕ್ಷ್ಮಣ್ ಕಡೆಯಿಂದ ಬೇಡವೆಂಬ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು.

ಇದರಿಂದ ಆಕ್ರೋಶಗೊಂಡ ಸಚಿನ್ ಲಕ್ಷ್ಮಣ್​ ವಿರುದ್ಧ ಕೋಪಗೊಂಡರು. ತಾಳ್ಮೆ ಕಳೆದುಕೊಂಡು ಮೈದಾನದಲ್ಲೇ ಲಕ್ಷ್ಮನ್​ಗೆ ಬೆವರಿಳಿಸಿದರು. ಏಕೆಂದರೆ ಆ ವೇಳೆ ಭಾರತ ಫೈನಲ್​ಗೆ ಕ್ವಾಲಿಫೈ ಆಗಲು 31 ಎಸೆತಗಳಲ್ಲಿ 25 ರನ್​ಗಳ ಅವಶ್ಯಕತೆಯಿತ್ತು.

ಈ ಪಂದ್ಯದಲ್ಲಿ ಸೋತರೂ 143 ರನ್​ ಸಿಡಿಸಿ ಸಚಿನ್ ಭಾರತವನ್ನು ಫೈನಲ್​ಗೆ ಪ್ರವೇಶಿಸುವಂತೆ ನೋಡಿಕೊಂಡರು. ಮತ್ತೆ ಫೈನಲ್​ನಲ್ಲಿ ಆಸೀಸ್ ವಿರುದ್ಧ ಅಬ್ಬರಿಸಿದ್ದ ಮಾಸ್ಟರ್ ಬ್ಲಾಸ್ಟರ್ ಭರ್ಜರಿ ಶತಕ (134)ದೊಂದಿಗೆ 273 ರನ್​ಗಳ ಗುರಿ ಬೆನ್ನತ್ತಿ ಟೀಮ್ ಇಂಡಿಯಾಗೆ ಜಯ ತಂದುಕೊಟ್ಟಿದ್ದರು.

ಈ ಅದ್ಭುತ ಸರಣಿ ಮುಗಿದ ಬಳಿಕ ಮನೆಗೆ ಹಿಂತಿರುಗಿದ ನನಗೆ ಶಾಕ್​ ಒಂದು ಕಾದಿತ್ತು. ಅದು ಕೂಡ ಸ್ವಂತ ಸಹೋದರ ಅಜಿತ್​ನಿಂದ ಎಂದು ತೆಂಡೂಲ್ಕರ್ ಸಂದರ್ಶನವೊಂದರಲ್ಲಿ ತಿಳಿಸಿದ್ದಾರೆ.

ಮನೆಯೊಳಗೆ ಹೋಗುತ್ತಿದ್ದಂತೆ ಅಣ್ಣ ನನ್ನನ್ನು ತರಾಟೆಗೆ ತೆಗೆದುಕೊಂಡರು. ಲಕ್ಷ್ಮಣ್ ಜೊತೆ ಮೈದಾನದಲ್ಲಿ ನೀನು ಹಾಗೆ ನಡೆದುಕೊಳ್ಳಬಾರದಿತ್ತು. ಆತ ನಿನ್ನ ಸಹ ಆಟಗಾರ. ನಿನ್ನ ಹಾಗೆ ಆತನೂ ತಂಡಕ್ಕಾಗೆ ಆಡುತ್ತಿದ್ದಾನೆ. ನೀನೊಬ್ಬನೇ ಆಡೋ ಪಂದ್ಯವಲ್ಲ ಅದು ನೆನಪಿಟ್ಟುಕೊ ಎಂದು ಅಜಿತ್ ನನಗೆ ಬುದ್ದಿವಾದ ಹೇಳಿದ್ದರು ಎಂದು ಸಚಿನ್ ತೆಂಡೂಲ್ಕರ್ ನೆನಪಿಸಿಕೊಂಡಿದ್ದಾರೆ.

ಈ ಸರಣಿಯಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದ ಸಚಿನ್ ಪಂದ್ಯ ಶ್ರೇಷ್ಠ ಮತ್ತು ಸರಣಿ ಶ್ರೇಷ್ಢ ಪ್ರಶಸ್ತಿಗಳನ್ನು ತಮ್ಮದಾಗಿಸಿಕೊಂಡಿದ್ದರು.

ಕೊಕಕೊಲಾ ಕಪ್​ನೊಂದಿಗೆ ನಾಯಕ ಅಜರುದ್ದೀನ್