Gautam Gambhir: ಗಂಭೀರ್ ಪ್ರಕಾರ ಐಪಿಎಲ್​ನ ಬೆಸ್ಟ್ ಕ್ಯಾಪ್ಟನ್ ಧೋನಿ ಅಲ್ಲ; ಮತ್ಯಾರು?

ಭಾರತೀಯ ಕ್ರಿಕೆಟ್​ನ ಬೆಸ್ಟ್ ಕ್ಯಾಪ್ಟನ್ ಯಾರು ಎಂದರೆ ಮೊದಲು ಬರುವ ಉತ್ತರ ಮಹೇಂದ್ರ ಸಿಂಗ್ ಧೋನಿ. 2011ರ ವಿಶ್ವಕಪ್, 2007ರ ಟಿ-20 ವಿಶ್ವಕಪ್ ಹಾಗೂ 2013ರ ಚಾಂಪಿಯನ್ಸ್ ಟ್ರೋಫಿ ಸೇರಿದಂತೆ ಐಸಿಸಿಯ ಮೂರು ಪ್ರಮುಖ ಟ್ರೋಫಿಗಳಲ್ಲಿ ಗೆಲುವು ಸಾಧಿಸಿದ ಭಾರತದ ಏಕೈಕ ನಾಯಕ.

ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲೂ ಧೋನಿ ಯಶಸ್ವಿ ನಾಯಕ ಎಂಬ ಪಟ್ಟ ತೊಟ್ಟಿದ್ದಾರೆ. ಧೋನಿಯ ರಣತಂತ್ರ, ಪಂದ್ಯವನ್ನು ಫಿನಿಶಿಂಗ್ ಮಾಡುವ ರೀತಿ ಕಂಡು ಅನೇಕರ ಪ್ರಕಾರ ಧೋನಿಯೇ ಐಪಿಎಲ್​ನ ಯಶಸ್ವಿ ನಾಯಕ.

ಆದರೆ, ಟೀಂ ಇಂಡಿಯಾ ಮಾಜಿ ಆಟಗಾರ ಗೌತಮ್ ಗಂಭೀರ್ ಪ್ರಕಾರ ಐಪಿಎಲ್​ನ ಬೆಸ್ಟ್ ನಾಯಕ ಧೋನಿ ಅಲ್ವಂತೆ. ಹಾಗಾದ್ರೆ ಯಾರು?, ಅವರು ಸೂಚಿಸಿದ್ದು ಯಾರ ಹೆಸರನ್ನ?. ಇಲ್ಲಿದೆ ಉತ್ತರ.

ಗಂಭೀರ್ ಪ್ರಕಾರ ಟೀಂ ಇಂಡಿಯಾದ ಉಪನಾಯಕ, ಮುಂಬೈ ಇಂಡಿಯನ್ಸ್ ತಂಡದ ನಾಯಕ ರೋಹಿತ್ ಶರ್ಮಾ ಐಪಿಎಲ್​ನ ಉತ್ತಮ ನಾಯಕನಂತೆ.

ಕಳೆದ 12 ಐಪಿಎಲ್ ಆವೃತ್ತಿಗಳಲ್ಲಿ ಮುಂಬೈ ಇಂಡಿಯನ್ಸ್ ತಂಡಕ್ಕೆ ದಾಖಲೆಯ ನಾಲ್ಕು ಬಾರಿ ಪ್ರಶಸ್ತಿ ಗೆದ್ದುಕೊಟ್ಟಿರುವ ರೋಹಿತ್ ಐಪಿಎಲ್​ನ ಅತ್ಯುತ್ತಮ ನಾಯಕ. ಕನಿಷ್ಠ 6-7 ಐಪಿಎಲ್ ಟ್ರೋಫಿಗಳೊಂದಿಗೆ ಅವರು ನಿವೃತ್ತಿ ಹೊಂದಲಿದ್ದಾರೆ ಎಂದು ಗಂಭೀರ್ ಭವಿಷ್ಯ ನುಡಿದಿದ್ದಾರೆ.

2013ರಿಂದ ಮುಂಬೈ ಇಂಡಿಯನ್ಸ್ ತಂಡದ ನಾಯಕತ್ವ ವಹಿಸಿಕೊಂಡಿರುವ ರೋಹಿತ್ ಶರ್ಮಾ ಇಲ್ಲಿಯವರೆಗೆ ನಾಲ್ಕು ಬಾರಿ ಐಪಿಎಲ್ ಟ್ರೋಫಿಗೆ ಮುತ್ತಿಕ್ಕಿದ್ದಾರೆ. ನಾಯಕನಾಗಿ ಚೊಚ್ಚಲ ಟೂರ್ನಿಯಿಂದ ಆರಂಭಿಸಿ ಕಡೆಯ 2019ರ ಟೂರ್ನಿಯಲ್ಲೂ ಮುಂಬೈ ಚಾಂಪಿಯನ್ಸ್ ಎನಿಸಿದೆ.

ಒಟ್ಟಾರೆ ಫಲಿತಾಂಶ ನೋಡಿದರೆ ಚೆನ್ನೈ ಸೂಪರ್ ಕಿಂಗ್ಸ್ ನಾಯಕ ಧೋನಿ ಉತ್ತಮ ಅನಿಸಬಹುದು, ಆದರೆ ಸಂಪೂರ್ಣ ನಾಯಕನಾಗಿ ನೋಡಿದಾಗಿ ರೋಹಿತ್ ಅತ್ಯುತ್ತಮ ಎನಿಸುತ್ತಾರೆ. ಒತ್ತಡದಲ್ಲಿ ಅವರು ಸರಿಯಾದ ನಿರ್ಧಾರವನ್ನು ತೆಗೆದುಕೊಳ್ಳುತ್ತಾರೆ ಎಂಬುದು ಗಂಭೀರ್ ಅಭಿಪ್ರಾಯ.

ಐಪಿಎಲ್​ನಲ್ಲಿ ಮುಂಬೈ ಇಂಡಿಯನ್ಸ್ ತಂಡ ಜಿದ್ದಾಜಿದ್ದಿನ ಪಂದ್ಯಗಳನ್ನು ಗೆದ್ದಿರುವುದಕ್ಕೆ ರೋಹಿತ್ ನಾಯಕತ್ವವೇ ಕಾರಣ. ಒತ್ತಡದ ಸಂದರ್ಭಗಳಲ್ಲಿ ರೋಹಿತ್ ಅವರ ಆಯ್ಕೆ ಅದ್ಭುತವಾಗಿರುತ್ತದೆ ಎಂದು ಗಂಭೀರ್ ಹೇಳಿದ್ದಾರೆ.

ಅಂದುಕೊಂಡಂತೆ ಆಗಿದ್ದರೆ ಕಳೆದ ತಿಂಗಳ 29ರಿಂದ 13ನೇ ಆವೃತ್ತಿಯ ಐಪಿಎಲ್ ಟೂರ್ನಿ ಆರಂಭವಾಗಬೇಕಿತ್ತು. ಆದರೆ, ಅದಕ್ಕೂ ಒಂದು ವಾರ ಮುನ್ನ ದೇಶದಲ್ಲಿ ಲಾಕ್​ಡೌನ್​ ಘೋಷಿಸಲಾಯಿತು. ಈ ಸಂದರ್ಭ ಏಪ್ರಿಲ್ 15ರವರೆಗೆ ಟೂರ್ನಿಯನ್ನು ಮುಂದೂಡಲಾಯಿತು.

ಆದರೆ, ಏ. 14ರಿಂದ ಮತ್ತೆ ಎರಡನೇ ಹಂತದ ಲಾಕ್​ಡೌನ್​ ಮುಂದೂಡಲಾಯಿತು. ಇದರಿಂದಾಗಿ ಸದ್ಯ ಟೂರ್ನಿಯನ್ನು ಮುಂದಿನ ಆದೇಶದ ವರೆಗೆ ರದ್ದು ಮಾಡಲಾಗಿದೆ.