Gautam Gambhir: ಕಾಶ್ಮೀರಕ್ಕಾಗಿ ನಾವು ಟಾಸ್ ಗೆಲ್ಲುತ್ತೇವೆ ಎಂದಿದ್ದ ಅಫ್ರಿದಿ: 2011ರ ಘಟನೆ ಮೆಲುಕು ಹಾಕಿದ ಗಂಭೀರ್

ಟೀಮ್ ಇಂಡಿಯಾ ಮಾಜಿ ಕ್ರಿಕೆಟಿಗ ಗೌತಮ್ ಗಂಭೀರ್ ಮತ್ತು ಪಾಕಿಸ್ತಾನದ ಮಾಜಿ ಆಟಗಾರ ಶಾಹಿದ್ ಅಫ್ರಿದಿ ನಡುವಣ ಶೀತಲ ಸಮರ ಮುಂದುವರೆದಿದೆ. 2007ರಲ್ಲಿ ನಾಗ್ಪುರದಲ್ಲಿ ನಡೆದ ಭಾರತ ಮತ್ತು ಪಾಕ್ ನಡುವಣ ಪಂದ್ಯದಿಂದ ಆರಂಭವಾದ ಈ ಕಿತ್ತಾಟ ನಿವೃತ್ತಿ ಬಳಿಕ ಕೂಡ ಮುಂದುವರೆದಿರುವುದು ವಿಶೇಷ. ಇಬ್ಬರು ಆಟಗಾರರ ಆರೋಪ ಪ್ರತ್ಯಾರೋಪಗಳಿಗೆ ಹಲವು ಬಾರಿ ಸೋಷಿಯಲ್ ಮೀಡಿಯಾ ಸಾಕ್ಷಿಯಾಗಿತ್ತು.

ಶಾಹಿದ್ ಅಫ್ರಿದಿ​ 'ಜಂಟಲ್‌ಮ್ಯಾನ್ಸ್ ಗೇಮ್' ಅನ್ನು ರಾಜಕೀಯಗೊಳಿಸುವುದರಲ್ಲಿ ನಿರತರಾಗಿದ್ದಾರೆ ಎಂದು ಗಂಭೀರ್ ಹಲವು ಬಾರಿ ಆರೋಪಿಸಿದ್ದಾರೆ. ಇದಕ್ಕೆ ಸಾಕ್ಷಿಯಾಗಿ ಭಾರತ, ಶ್ರೀಲಂಕಾ ಮತ್ತು ಬಾಂಗ್ಲಾದೇಶದಲ್ಲಿ ನಡೆದ 2011 ರ ವಿಶ್ವಕಪ್ ಪಂದ್ಯಾವಳಿಯ ಘಟನೆಯನ್ನು ಟೀಮ್ ಇಂಡಿಯಾ ಮಾಜಿ ಆರಂಭಿಕ ಆಟಗಾರ ಮುಂದಿಟ್ಟಿದ್ದಾರೆ.

ಭಾರತ-ಪಾಕಿಸ್ತಾನ ನಡುವಣ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕ್ರಿಕೆಟ್ ಪುನರಾರಂಭಿಸುವ ಬಗ್ಗೆ ಮಾತನಾಡಿದ ಗಂಭೀರ್, ಹಳೆಯ ಘಟನೆಯನ್ನು ಉಲ್ಲೇಖಿಸಿದರು. ಐಸಿಸಿ ವಿಶ್ವಕಪ್ 2011 ರಲ್ಲಿ ಶಾಹಿದ್ ಅಫ್ರಿದಿ ಅವರು ನೀಡಿದ ವಿವಾದಾತ್ಮಕ ಹೇಳಿಕೆಯನ್ನು ಗಂಭೀರ್ ನೆನಪಿಸಿದ್ದಾರೆ.

ಅದು 2011 ಸೆಮಿ ಫೈನಲ್ ಪಂದ್ಯ. ನಾಯಕ ಮಹೇಂದ್ರ ಸಿಂಗ್ ಧೋನಿ ಹಾಗೂ ಅಫ್ರಿದಿ ತಂಡಗಳ ನಾಯಕರಾಗಿದ್ದರು. ಈ ವೇಳೆ ಸೆಮಿಫೈನಲ್​ನಲ್ಲಿ, ಕಾಶ್ಮೀರಕ್ಕಾಗಿ ಟಾಸ್ ಗೆಲ್ಲಲು ಬಯಸುತ್ತೇನೆ ಎಂದು ಅಫ್ರಿದಿ ಹೇಳಿದ್ದರು. ಇದೊಂದು ಹಾಸ್ಯಾಸ್ಪದ ಹೇಳಿಕೆಯಾಗಿತ್ತು.

ಏಕೆಂದರೆ ನಾವು ಪಾಕಿಸ್ತಾನದ ಸಮಸ್ಯೆಗಳ ಬಗ್ಗೆ ಮಾತನಾಡುತ್ತಿಲ್ಲ. ಹಾಗೆಯೇ ಅವರು ನಮ್ಮ ಸಮಸ್ಯೆಗಳ ಬಗ್ಗೆಯೂ ಮಾತನಾಡಬಾರದು. ಅವರೇಕೆ ನಮ್ಮ ದೇಶದ ಬಗ್ಗೆ ಮಾತನಾಡಬೇಕು? ಅಲ್ಲವೇ, ಆದರೆ ಈ ಪಂದ್ಯಕ್ಕೂ ಮುನ್ನ ಅಫ್ರಿದಿ ಟಾಸ್​​ ವಿಷಯಕ್ಕೂ ರಾಜಕೀಯ ಬಣ್ಣ ನೀಡಿದ್ದರು ಎಂದು ಗೌತಮ್ ಗಂಭೀರ್ ತಿಳಿಸಿದರು.

ಅಂದು ನಾವು ವಿಶ್ವಕಪ್ ಗೆದ್ದು 26/11 ರ ಮುಂಬೈ ದಾಳಿಯಲ್ಲಿ  ಹುತಾತ್ಮರಾದವರಿಗೆ ಅರ್ಪಿಸಿದೆವು. ಆದರೆ ಅಫ್ರಿದಿ ಟಾಸ್ ಅನ್ನು ರಾಜಕೀಯಗೊಳಿಸಿದ್ದರು. ನನ್ನ ನಿಲುವು ಇನ್ನೂ ಒಂದೇ ಆಗಿರುತ್ತದೆ. ಅದನ್ನೇ ಬಹಿರಂಗವಾಗಿ ಹೇಳಬಯಸುತ್ತೇನೆ.

ನನ್ನ ಪ್ರಕಾರ ಭಾರತ-ಪಾಕಿಸ್ತಾನ ಸರಣಿಯನ್ನು ಪ್ರಾರಂಭಿಸುವ ಯಾವುದೇ ಅಗತ್ಯವಿಲ್ಲ. ಕಾಶ್ಮೀರದಲ್ಲಿ ಭಯೋತ್ಪಾದನೆ ಮುಗಿಯುವವರೆಗೂ ನಾವು ಪಾಕ್​ನೊಂದಿಗೆ ಸರಣಿ ಆಡಬಾರದು ಎಂಬುದು ನನ್ನ ಸ್ಪಷ್ಟ ನಿಲುವು ಎಂದು ಗೌತಮ್ ಗಂಭೀರ್ ಹೇಳಿದ್ದಾರೆ.

ಸಚಿನ್-ಅಫ್ರಿದಿ

ಸಚಿನ್-ಅಫ್ರಿದಿ