ಮ್ಯಾಚ್ ಫಿಕ್ಸಿಂಗ್ ನಿಷೇಧ: 14 ವರ್ಷಗಳ ಬಳಿಕ ಕ್ರಿಕೆಟಿಗನಿಗೆ 1 ಕೋಟಿ ರೂ. ನೀಡಿದ ಬಿಸಿಸಿಐ

1999-2000ನೇ ಇಸವಿಯಲ್ಲಿ ಟೀಮ್ ಇಂಡಿಯಾದ ಮ್ಯಾಚ್ ಫಿಕ್ಸಿಂಗ್ ಹಗರಣ ಬೆಳಕಿಗೆ ಬಂದಿತ್ತು. ಈ ಕಳ್ಳಾಟದಲ್ಲಿ ಅನೇಕ ಆಟಗಾರರ ಹೆಸರುಗಳು ಕೇಳಿ ಬಂದಿದ್ದವು.

ಅದರಲ್ಲೂ ತಂಡದ ಕೆಲ ಸ್ಟಾರ್ ಆಟಗಾರರು ಹೆಸರುಗಳು ಕೇಳಿ ಬಂದಿದ್ದರಿಂದ ಕ್ರಿಕೆಟ್ ಮೇಲೆ ಭಾರತೀಯರಲ್ಲಿ ಅವಿಶ್ವಾಸ ಮೂಡಿತ್ತು. ಈ ಕಠಿಣ ಪರಿಸ್ಥಿತಿಯಲ್ಲಿ ಸೌರವ್ ಗಂಗೂಲಿ ಟೀಮ್ ಇಂಡಿಯಾ ನಾಯಕತ್ವವನ್ನು ವಹಿಸಿದ್ದರು.

ಅಲ್ಲಿಂದ ಬಳಿಕ ಯುವ ತಂಡವನ್ನು ಕಟ್ಟುವ ಮೂಲಕ ಟೀಮ್ ಇಂಡಿಯಾದ ಅತ್ಯಂತ ಯಶಸ್ವಿ ನಾಯಕರಾಗಿ ಹೊರಹೊಮ್ಮಿದ್ದರು. ಆದರೆ ಇದಕ್ಕೂ ಮುನ್ನ ಫಿಕ್ಸಿಂಗ್ ಆರೋಪದಲ್ಲಿ ಮನೋಜ್ ಪ್ರಭಾಕರ್ ಅವರ ಮೇಲೆ 5 ವರ್ಷ ನಿಷೇಧ ಹೇರಲಾಯಿತು.

2005ರಲ್ಲಿ ಶಿಕ್ಷೆ ಪೂರ್ಣಗೊಳಿಸಿದ ಮನೋಜ್ ಪ್ರಭಾಕರ್ ನಂತರ ಯಾವುದೇ ವಿವಾದಕ್ಕೀಡಾಗಿರಲಿಲ್ಲ. ಹೀಗಾಗಿ ದೆಹಲಿ ತಂಡದ ಕೋಚ್ ಹುದ್ದೆ ಸ್ಥಾನ ಮಾಜಿ ಆಟಗಾರನಿಗೆ ಲಭಿಸಿತು.

ಆದರೆ 2011ರಲ್ಲಿ ಆಯ್ಕೆಗಾರರನ್ನು ಬಹಿರಂಗವಾಗಿ ಟೀಕಿಸಿದ ಆರೋಪದಲ್ಲಿ ದೆಹಲಿ ಕ್ರಿಕೆಟ್ ತಂಡದ ಕೋಚ್ ಸ್ಥಾನದಿಂದ ವಜಾಗೊಳಿಸಲಾಯಿತು. ನಿಷೇಧ, ಬಿಸಿಸಿಐ ಜೊತೆಗಿನ ಜಟಾಪಟಿ ಎಲ್ಲಾ ಮುಗಿದ ಬಳಿಕ ಇದೀಗ ಮಾಜಿ ಆಟಗಾರನಿಗೆ ಪಿಂಚಣಿ ಸೇರಿದಂತೆ ಉಳಿದ ಹಣ ನೀಡಲಾಗಿದೆ.

ಹೌದು, 14 ವರ್ಷಗಳ ಬಳಿಕ ಮನೋಜ್ ಪ್ರಭಾಕರ್ ಅವರಿಗೆ ಪಿಂಚಣಿ ಮೊತ್ತ, ಹಾಗೂ ಉಳಿದ ಹಣ ಸೇರಿದಂತೆ ಒಟ್ಟು 1 ಕೋಟಿ ರೂ. ಬಿಸಿಸಿಐ ಪಾವತಿಸಿದೆ.

ವೆಸ್ಟ್ ಇಂಡೀಸ್ ವಿರುದ್ಧದ ಪಂದ್ಯದಲ್ಲಿ ಮನೋಜ್ ಪ್ರಭಾಕರ್ ಫಿಕ್ಸಿಂಗ್ ಮಾಡಿಕೊಂಡಿದ್ದಾರೆ ಎಂಬ ಆರೋಪಗಳು ಕೇಳಿ ಬಂದಿದ್ದವು. ಈ ಪಂದ್ಯದಲ್ಲಿ ನಿಧಾನಗತಿ ಶತಕ ಬಾರಿಸುವ ಮೂಲಕ ಟೀಮ್ ಇಂಡಿಯಾ ಸೋಲಿಗೆ ಪ್ರಮುಖ ಕಾರಣರಾಗಿದ್ದರು.

ಭಾರತದ ಪರ ಭಾರತ ಪರ 39 ಟೆಸ್ಟ್‌ಗಳಲ್ಲಿ ಮನೋಜ್ ಪ್ರಭಾಕರ್  1600 ರನ್​ ಹಾಗೂ 96 ವಿಕೆಟ್ ಕಬಳಿಸಿದ್ದಾರೆ.

ಹಾಗೆಯೇ 130 ಏಕದಿನ ಪಂದ್ಯಗಳಲ್ಲಿ 1858 ರನ್ ಬಾರಿಸಿದ್ದಾರೆ. ಇನ್ನು ಬೌಲಿಂಗ್​ನಲ್ಲೂ 157 ವಿಕೆಟ್ ಉರುಳಿಸುವ ಮೂಲಕ ಗಮನ ಸೆಳೆದಿದ್ದರು.