ಏಕದಿನ ಕ್ರಿಕೆಟ್ ಅನ್ನು ಟಿ20 ಮಾದರಿಯಲ್ಲಿ ಆಡಿ ವಿಶ್ವ ದಾಖಲೆ ಬರೆದ ಕ್ರಿಕೆಟಿಗರು ಇವರು..!

ಕ್ರಿಕೆಟ್ ಇತಿಹಾಸದಲ್ಲಿ ಕೆಲ ಆಟಗಾರರಿದ್ದಾರೆ. ಅವರು ಏಕದಿನ ಕ್ರಿಕೆಟ್​ ಅನ್ನು ಅಂದಿನ ಕಾಲದಲ್ಲೇ ಟಿ20 ಮಾದರಿಯಲ್ಲಿ ಆಡಿ ವಿಶ್ವ ದಾಖಲೆ ಬರೆದಿದ್ದರು.

ಅಂತಹ ಕೆಲ ಆಟಗಾರರು ಯಾವತ್ತೂ ಚುಟುಕು ಕ್ರಿಕೆಟ್ ಆಡಿರಲಿಲ್ಲ. ಆದರೆ ಅವರ ಪ್ರತಿಯೊಂದು ಇನಿಂಗ್ಸ್ ಕೂಡ ಸ್ಪೋಟಕವಾಗಿತ್ತು ಎಂಬುದಕ್ಕೆ ಅವರು ಬರೆದಿಟ್ಟ ದಾಖಲೆಗಳು ಸಾಕ್ಷಿ.

ಇಂತಹ ಸರ್ವಶ್ರೇಷ್ಠ ಬ್ಯಾಟ್ಸ್​ಮನ್​ಗಳಲ್ಲಿ ಎಲ್ಲರ ಗಮನ ಸೆಳೆಯುವುದು ವೆಸ್ಟ್ ಇಂಡೀಸ್ ತಂಡದ ದಂತಕಥೆ ಬ್ರಿಯಾನ್ ಲಾರಾ. ಏಕದಿನ ಕ್ರಿಕೆಟ್​ನಲ್ಲಿ ಲಾರಾ ಸಿಡಿಸಿದ ಸೆಂಚುರಿ ಇಂದಿಗೂ ಟಾಪ್ 10 ವೇಗದ ಶತಕಗಳಲ್ಲಿ ಸ್ಥಾನ ಪಡೆದುಕೊಂಡಿದೆ.

ಹೀಗೆ ಏಕದಿನ ಕ್ರಿಕೆಟ್​ನಲ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಮೂಲಕ ಅತೀ ವೇಗದ ಶತಕ ಸಿಡಿಸಿದ ಟಾಪ್ 10 ಆಟಗಾರರು ಯಾರೆಂದು ಗಮನಿಸಿದರೆ...

#10 ಜೋಸ್ ಬಟ್ಲರ್

ಏಕದಿನ ಕ್ರಿಕೆಟ್​ನಲ್ಲಿ ಅತೀ ವೇಗದ ಶತಕ ಸಿಡಿಸಿದವರ ಪಟ್ಟಿಯಲ್ಲಿ ಇಂಗ್ಲೆಂಡ್ ಆಟಗಾರ ಬಟ್ಲರ್ 10ನೇ ಸ್ಥಾನದಲ್ಲಿದ್ದಾರೆ. 2019 ರಲ್ಲಿ ಪಾಕಿಸ್ತಾನದ ವಿರುದ್ಧ ಬಟ್ಲರ್ 50 ಎಸೆತಗಳಲ್ಲಿ ಶತಕ ಪೂರೈಸಿದ್ದರು. ಇವರ ಈ ಅಮೋಘ ಇನಿಂಗ್ಸ್​ನಲ್ಲಿ 9 ಫೋರ್ ಹಾಗೂ 6 ಭರ್ಜರಿ ಸಿಕ್ಸರ್ ಸಿಡಿಸಿದ್ದರು.

[caption id="attachment_2933" align="alignnone" width="875"] #9 ಸನತ್ ಜಯಸೂರ್ಯ

1996 ರಲ್ಲಿ ಶ್ರೀಲಂಕಾ ತಂಡದ ಎಡಗೈ ದಾಂಡಿಗ ಸನತ್ ಜಯಸೂರ್ಯ ಸಿಡಿಲಬ್ಬರದ ಬ್ಯಾಟಿಂಗ್ ನಡೆಸಿದ್ದರು. ಸಿಂಗಾಪುರದಲ್ಲಿ ನಡೆದ ಈ ಪಂದ್ಯದಲ್ಲಿ ಪಾಕ್ ಬೌಲರುಗಳನ್ನು ಮನಸೋ ಇಚ್ಛೆ ದಂಡಿಸಿದ್ದ ಜಯಸೂರ್ಯ ಕೇವಲ 48 ಎಸೆತಗಳಲ್ಲಿ ಸೆಂಚುರಿ ಪೂರೈಸಿದ್ದರು. ಈ ಸ್ಪೋಟಕ ಇನಿಂಗ್ಸ್​ನಲ್ಲಿ 11 ಬೌಂಡರಿ, 11 ಸಿಕ್ಸ್​ ಮೂಡಿಬಂದಿದ್ದವು.

#8 ಜೋಸ್ ಬಟ್ಲರ್

ಇಂಗ್ಲೆಂಡ್ ಬಲಗೈ ಬ್ಯಾಟ್ಸ್​ಮನ್​ 2015 ರಲ್ಲೂ ಸಿಡಿಲಬ್ಬರ ಶತಕ ಸಿಡಿಸಿ ಮಿಂಚಿದ್ದರು. ಪಾಕಿಸ್ತಾನ್ ವಿರುದ್ಧ ದುಬೈನಲ್ಲಿ ನಡೆದ ಪಂದ್ಯದಲ್ಲಿ ಕೇವಲ 46 ಎಸೆತಗಳಲ್ಲಿ ಶತಕ ಪೂರೈಸಿ ಬ್ಯಾಟ್ ಮೇಲೆಕ್ಕೆತ್ತಿದ್ದರು. ಅಲ್ಲದೆ ಈ ಪಂದ್ಯದಲ್ಲಿ 8 ಸಿಕ್ಸ್, 10 ಬೌಂಡರಿಯೊಂದಿಗೆ 116 ರನ್ ಬಾರಿಸಿ ಅಜೇಯರಾಗಿ ಉಳಿದಿದ್ದರು.

#7 ಜೆಸ್ಸಿ ರೈಡರ್

2014 ರಲ್ಲಿ ನ್ಯೂಜಿಲೆಂಡ್ ತಂಡದ ಸ್ಪೋಟಕ ಬ್ಯಾಟ್ಸ್​ಮನ್ ಆಗಿ ಗುರುತಿಸಿಕೊಂಡಿದ್ದ ಜೆಸ್ಸಿ ರೈಡರ್ ವೆಸ್ಟ್ ಇಂಡೀಸ್ ವಿರುದ್ಧ ಅಮೋಘ ಶತಕ ಸಿಡಿಸಿದ್ದರು. ಕೆರಿಬಿಯನ್ ಬೌಲರುಗಳನ್ನು ಮನಸೋ ಇಚ್ಛೆ ದಂಡಿಸಿದ್ದ ರೈಡರ್ 5 ಸಿಕ್ಸರ್ ಹಾಗೂ 12 ಬೌಂಡರಿಗಳೊಂದಿಗೆ ಕೇವಲ 46 ಎಸೆತಗಳಲ್ಲಿ ಸೆಂಚುರಿ ಬಾರಿಸಿದ್ದರು.

#6 ಶಾಹಿದ್ ಅಫ್ರಿದಿ

ಸ್ಪೋಟಕ ಇನಿಂಗ್ಸ್​ಗೆ ಹೆಸರುವಾಸಿಯಾಗಿರುವ ಪಾಕಿಸ್ತಾನ್ ತಂಡದ ಮಾಜಿ ನಾಯಕ ಶಾಹಿದ್ ಅಫ್ರಿದಿ ಕೇವಲ 45 ಎಸೆತಗಳಲ್ಲಿ ಶತಕ ಸಿಡಿಸಿ ಮಿಂಚಿದ್ದರು. ಅದು ಕೂಡ ಭಾರತದ ವಿರುದ್ದ. 2005 ರಲ್ಲಿ ಕಾನ್ಪುರದಲ್ಲಿ ನಡೆದ ಪಂದ್ಯದಲ್ಲಿ ಅಫ್ರಿದಿ ಅಕ್ಷರಶಃ ಅಬ್ಬರಿಸಿದ್ದರು. ಟೀಂ ಇಂಡಿಯಾ ವಿರುದ್ಧ 9 ಸಿಕ್ಸ್ ಹಾಗೂ 10 ಬೌಂಡರಿ ಬಾರಿಸಿ 45 ಎಸೆತಗಳಲ್ಲಿ ಶತಕ ಪೂರೈಸಿದ್ದರು.

#5 ಬ್ರಿಯಾನ್ ಲಾರಾ

1999 ರಲ್ಲಿ ವೆಸ್ಟ್​ ಇಂಡೀಸ್​ ತಂಡದ ಎಡಗೈ ಬ್ಯಾಟ್ಸ್​ಮನ್​ ಬಾಂಗ್ಲಾದೇಶದ ಬೌಲರುಗಳನ್ನು ಚೆಂಡಾಡಿದ್ದರು. ಢಾಕಾದಲ್ಲಿ ನಡೆದ ಈ ಪಂದ್ಯದಲ್ಲಿ ಲಾರಾ ಬ್ಯಾಟ್​ನಿಂದ ಸಿಡಿದದ್ದು ಬರೋಬ್ಬರಿ 18 ಬೌಂಡರಿ ಹಾಗೂ 4 ಸಿಕ್ಸರ್. ಇದರ ಫಲವಾಗಿ ಕೇವಲ 45 ಎಸೆತಗಳಲ್ಲಿ ಶತಕ ಪೂರೈಸಿ ದಾಖಲೆ ಬರೆದರು.

#4 ಮಾರ್ಕ್ ಬೌಚರ್

ದಕ್ಷಿಣ ಆಫ್ರಿಕಾ ತಂಡದ ವಿಕೆಟ್ ಕೀಪರ್ ಮಾರ್ಕ್ ಬೌಚರ್ 2006 ರಲ್ಲಿ ಸ್ಪೋಟಕ ಶತಕ ಸಿಡಿಸಿದ್ದರು. ಜಿಂಬಾಬ್ವೆ ವಿರುದ್ಧದ ಪಂದ್ಯದಲ್ಲಿ ಕೇವಲ 44 ಎಸೆತಗಳಲ್ಲಿ ಸೆಂಚುರಿ ಸಿಡಿಸಿ ಬ್ಯಾಟ್ ಮೇಲೆಕ್ಕೆತ್ತಿದ್ದರು. ಈ ಇನಿಂಗ್ಸ್​ನಲ್ಲಿ ಬೌಚರ್ 10 ಸಿಕ್ಸ್, 8 ಬೌಂಡರಿ ಬಾರಿಸಿದ್ದರು.

#3 ಶಾಹಿದ್ ಅಫ್ರಿದಿ

ಪಾಕಿಸ್ತಾನ್ ತಂಡದ ಹೊಡಿಬಡಿ ದಾಂಡಿಗ ಶಾಹಿದ್ ಅಫ್ರಿದಿ 1996 ರಲ್ಲಿ ಬರೆದ ದಾಖಲೆ ದಶಕಗಳ ಕಾಲ ಅಚ್ಚಳಿಯದೇ ಉಳಿದಿತ್ತು. ಶ್ರೀಲಂಕಾ ವಿರುದ್ಧ ಸಿಡಿಲಬ್ಬರ ಬ್ಯಾಟಿಂಗ್ ನಡೆಸಿದ್ದ ಅಫ್ರಿದಿ 11 ಸಿಕ್ಸರ್ ಹಾಗೂ 6 ಬೌಂಡರಿಗಳೊಂದಿಗೆ 37 ಎಸೆತಗಳಲ್ಲಿ ಶತಕ ಪೂರೈಸಿದ್ದರು.

#2 ಕೋರೆ ಅಂಡರ್ಸನ್

2014 ರಲ್ಲಿ ನ್ಯೂಜಿಲೆಂಡ್ ಕ್ರಿಕೆಟಿಗ ಕೋರೆ ಅಂಡರ್ಸನ್ ಅಫ್ರಿದಿಯ 37 ಎಸೆತಗಳ ಅತೀ ವೇಗದ ಶತಕದ ದಾಖಲೆಯನ್ನು ಅಳಿಸಿ ಹಾಕಿ ಹೊಸ ಇತಿಹಾಸ ಬರೆದಿದ್ದರು. ವೆಸ್ಟ್ ಇಂಡೀಸ್ ವಿರುದ್ಧದ ಈ ಪಂದ್ಯದಲ್ಲಿ ಎಡಗೈ ದಾಂಡಿಗ ಸಿಕ್ಸ್​ಗಳ ಸುರಿಮಳೆಗೈದರು. ಅದರ ಫಲವಾಗಿ ಕೇವಲ 36 ಎಸೆತಗಳಲ್ಲಿ ಶತಕ ಪೂರೈಸಿ ಎರಡು ದಶಕಗಳ ಹಿಂದಿನ ದಾಖಲೆಯನ್ನು ಮುರಿದರು. ಈ ಇನಿಂಗ್ಸ್​ನಲ್ಲಿ ಅಜೇಯ 134 ರನ್​ ಬಾರಿಸಿದ್ದ ಅಂಡರ್ಸನ್ 14 ಸಿಕ್ಸರ್ ಹಾಗೂ 6 ಬೌಂಡರಿ ಬಾರಿಸಿದ್ದರು.

#1 ಎಬಿ ಡಿವಿಲಿಯರ್ಸ್

ಸ್ಪೋಟಕ ಆಟಕ್ಕೆ ಹೆಸರುವಾಸಿಯಾಗಿರುವ ಮಿಸ್ಟರ್ 360 ಖ್ಯಾತಿಯ ಎಬಿ ಡಿವಿಲಿಯರ್ಸ್ ಅವರು ಅಂಡರ್ಸನ್ ಬರೆದ ದಾಖಲೆಯನ್ನು ಒಂದೇ ವರ್ಷಕ್ಕೆ 2ನೇ ಸ್ಥಾನಕ್ಕೆ ತಳಿದ್ದರು.

2015 ರಲ್ಲಿ ಜೋಹಾನ್ಸ್​ಬರ್ಗ್​ನಲ್ಲಿ ನಡೆದ ವೆಸ್ಟ್​ ಇಂಡೀಸ್ ವಿರುದ್ಧದ ಪಂದ್ಯದಲ್ಲಿ ಎಬಿಡಿ ಸಿಡಿಲಬ್ಬರದ ಬ್ಯಾಟಿಂಗ್ ಅಂದರೆ ಏನೂ ಎಂದು ತೋರಿಸಿದ್ದರು. ಕೆರಿಬಿಯನ್ ಬೌಲರುಗಳನ್ನು ಚೆಂಡಾಡಿದ ದಕ್ಷಿಣ ಆಫ್ರಿಕಾದ ಈ ಬ್ಯಾಟ್ಸ್​ಮನ್ ಕೇವಲ 31 ಎಸೆತಗಳಲ್ಲಿ ಶತಕ ಸಿಡಿಸಿ ಹೊಸ ಇತಿಹಾಸ ಬರೆದರು. ಈ ಸ್ಪೋಟಕ ಇನಿಂಗ್ಸ್​ನಲ್ಲಿ 146 ರನ್ ಚಚ್ಚಿದ್ದ ಎಬಿಡಿ 16 ಸಿಕ್ಸರ್ ಹಾಗೂ 9 ಬೌಂಡರಿ ಬಾರಿಸಿದ್ದರು.