ಸೆಹ್ವಾಗ್​ಗಿಂತಲೂ ಸಿಡಿಲಬ್ಬರದ ಬ್ಯಾಟಿಂಗ್​: ಕೇವಲ 330 ನಿಮಿಷಗಳಲ್ಲಿ 333 ರನ್ ಗಳಿಸಿದರು..!

ಟೀಮ್ ಇಂಡಿಯಾದ ಸ್ಪೋಟಕ ಬ್ಯಾಟ್ಸ್​ಮನ್ ಅಥವಾ ಸಿಡಿಲಬ್ಬರದ ಬ್ಯಾಟಿಂಗ್ ಬಗ್ಗೆ ಮಾತನಾಡುವಾಗ ವೀರೇಂದ್ರ ಸೆಹ್ವಾಗ್ ಅವರ ಹೆಸರು ಮುಂಚೂಣಿಯಲ್ಲಿ ಕಾಣಿಸುತ್ತದೆ. ಬ್ಯಾಟಿಂಗ್ ಮೂಲಕ ಅಂತಹದೊಂದು ಕಮಾಲ್ ಮಾಡಿದ್ದ ವೀರು.

ಇದಕ್ಕೆ ಸಾಕ್ಷಿ ಎಂಬಂತೆ ಟೆಸ್ಟ್​ ಕ್ರಿಕೆಟ್​ನಲ್ಲಿ ಸೆಹ್ವಾಗ್ ಬ್ಯಾಟ್​ನಿಂದ ಸಿಡಿದದ್ದು ಒಂದಲ್ಲ ಎರಡು ತ್ರಿಶತಕಗಳು. ಆದರೆ ಭಾರತದಲ್ಲಿ ಸೆಹ್ವಾಗ್ ಅವರನ್ನೂ ಮೀರಿಸುವಂತೆ ಬ್ಯಾಟ್ ಬೀಸಿದ್ದ ಮತ್ತೊಬ್ಬ ಬ್ಯಾಟ್ಸ್​ಮನ್ ಇದ್ದರು ಎಂಬುದು ಅನೇಕರಿಗೆ ತಿಳಿದಿಲ್ಲ.

ತಮ್ಮ ಬಿರುಸಿನ ಬ್ಯಾಟಿಂಗ್ ಮೂಲಕ ಇಡೀ ವಿಶ್ವವನ್ನೇ ತನ್ನತ್ತ ನೋಡುವಂತೆ ಮಾಡಿದ್ದರು ಈ ಆಟಗಾರ. ಹೀಗೆ ಕ್ರಿಕೆಟ್ ಜಗತ್ತಿನಲ್ಲಿ ಅಂದಕಾಲತ್ತಿಲ್ ಸಂಚಲನ ಸೃಷ್ಟಿಸಿದ ಆಟಗಾರ ದುಲೀಪ್​ಸಿಂಜಿ. ದೇಶೀಯ ಕ್ರಿಕೆಟ್​ನಲ್ಲಿ ಆಡಲಾಗುವ ದುಲೀಪ್ ಟ್ರೋಫಿ ಇದೆಯಲ್ವಾ, ಅದು ಇವರ ಹೆಸರಿನಲ್ಲಿ ನಡೆಸಲಾಗುತ್ತಿರುವ ಟೂರ್ನಿ.

ದುಲೀಪ್​ಸಿಂಜಿ 1905ರ ಡಿಸೆಂಬರ್ 5 ರಂದು ಕಥಿಯಾವಾರ್ನದಲ್ಲಿ ಜನಿಸಿದರು. ಇವರ ಚಿಕ್ಕಪ್ಪ ರಣಜಿತ್​ಸಿಂಜಿ ಅತ್ಯುತ್ತಮ ಕ್ರಿಕೆಟಿಗರಾಗಿದ್ದರು. ಇವರ ಗೌರವಾರ್ಥ ದೇಶೀಯ ಕ್ರಿಕೆಟ್​ಗೆ ರಣಜಿ ಟೂರ್ನಿ ಎಂದು ಹೆಸರಿಡಲಾಗಿದೆ.​

1926 ರಲ್ಲಿ ಚಿಕ್ಕಪ್ಪನ ಶಿಫಾರಸ್ಸಿನ ಮೇರೆಗೆ ದುಲೀಪ್ ಇಂಗ್ಲೆಂಡ್‌ನ ಹಳೆಯ ಕ್ಲಬ್‌ ಸಸೆಕ್ಸ್‌ ಪರ ಆಡಲು ಹೋದರು. ಈ ಹಿಂದೆ ಇದೇ ಕ್ಲಬ್ ಪರ ರಣಜಿತ್​ಸಿಂಜಿ ನಾಯಕತ್ವ ವಹಿಸಿದ್ದರು. ಹೀಗಾಗಿ ಅವಕಾಶ ಸಿಗುವುದೇನು ಕಷ್ಟವಾಗಿರಲಿಲ್ಲ.

ದುಲೀಪ್ ಸಸೆಕ್ಸ್ ಪರವಾಗಿ ಕಣಕ್ಕಿಳಿಯಲಾರಂಭಿಸಿದರು. ಅವುಗಳಲ್ಲಿ ಅತ್ಯಂತ ವಿಶೇಷವಾದದ್ದು ಮೇ 7, 1930 ರಂದು ಹೋವ್ ಮೈದಾನದಲ್ಲಿ ನಡೆದ ಪಂದ್ಯ. ನಾರ್ಥಾಂಟ್ಸ್ ಕ್ಲಬ್ ವಿರುದ್ಧದ ಈ ಪಂದ್ಯದ ಮೂಲಕ ಹೊಸ ಇತಿಹಾಸ ರಚಿಸಿದ್ದರು ಭಾರತೀಯ ಕ್ರಿಕೆಟಿಗ.

ಸೆಸೆಕ್ಸ್ ಪರ ಇನಿಂಗ್ಸ್ ಆರಂಭಿಸಿದ್ದ ಬೊಯೆಲ್ ಮತ್ತು ಪಾರ್ಕ್ಸ್ ಕೇವಲ 1 ಮತ್ತು 9 ರನ್ ಗಳಿಸಿ ಪೆವಿಲಿಯನ್‌ಗೆ ಮರಳಿದ್ದರು. ಮೂರನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ದುಲೀಪ್ ಆರಂಭದಲ್ಲೇ ಬಿರುಸಿನ ಬ್ಯಾಟಿಂಗ್​ ಶುರು ಮಾಡಿದರು.

ನೋಡು ನೋಡುತ್ತಿದ್ದಂತೆ ದುಲೀಪ್ ಮೊದಲ ಶತಕ, ನಂತರ ದ್ವಿಶತಕ ಮತ್ತು ಅದರ ಬೆನ್ನಲ್ಲೇ ಟ್ರಿಪಲ್ ಶತಕವನ್ನು ದಾಟಿದರು. ನಾರ್ಥಾಂಟ್ಸ್ ಕ್ಲಬ್ ಬೌಲರುಗಳನ್ನು ಹಿಗ್ಗಾಮುಗ್ಗಾ ದಂಡಿಸಿದ ದುಲೀಪ್​ ಕೇವಲ 330 ನಿಮಿಷಗಳಲ್ಲಿ 333 ರನ್ ಚಚ್ಚಿ ಬಿಸಾಕಿದ್ದರು. ಇದರಲ್ಲಿ 33 ಬೌಂಡರಿ ಮತ್ತು ಒಂದು ಸಿಕ್ಸರ್​ ಮೂಡಿ ಬಂದಿದ್ದವು.

ಕುತೂಹಲಕಾರಿಯಾಗಿ ವಿಷಯವೆಂದರೆ ಈ ಪಿಚ್‌ನಲ್ಲಿ ಬ್ಯಾಟ್ಸ್‌ಮನ್‌ಗಳು ಕ್ರೀಸ್‌ನಲ್ಲಿ ಉಳಿಯುವುದೇ ಕಷ್ಟಸಾಧ್ಯ ಎನ್ನುವಂತಿತ್ತು. ಇದಕ್ಕೆ ಪ್ರತಿಯಾಗಿ, ನಾರ್ಥಾಂಟ್ಸ್ ತಂಡವನ್ನು ಮೊದಲ ಇನ್ನಿಂಗ್ಸ್‌ನಲ್ಲಿ 187 ಮತ್ತು ಎರಡನೇ ಇನ್ನಿಂಗ್ಸ್‌ನಲ್ಲಿ 125 ರನ್‌ಗಳಿಸಲಷ್ಟೇ ಶಕ್ತರಾದರು.

ದುಲೀಪ್​ಸಿಂಜಿ ಇಂಗ್ಲೆಂಡ್ ಪರ ಕೂಡ ಟೆಸ್ಟ್ ಕ್ರಿಕೆಟ್ ಆಡಿದ್ದಾರೆ. ಆಂಗ್ಲರ ಪರ 12 ಟೆಸ್ಟ್ ಪಂದ್ಯಗಳಲ್ಲಿ 58.52 ಸರಾಸರಿಯಲ್ಲಿ 995 ರನ್ ಗಳಿಸಿದ್ದರು. ಇದರಲ್ಲಿ 3 ಶತಕಗಳು ಮತ್ತು 5 ಅರ್ಧಶತಕಗಳು ಸೇರಿವೆ.

ಅನಾರೋಗ್ಯದಿಂದಾಗಿ ಅವರ ವೃತ್ತಿಜೀವನ ಆರಂಭದಲ್ಲಿಯೇ ಕೊನೆಗೊಂಡಿತು. ಆ ಬಳಿಕ ಭಾರತಕ್ಕೆ ಮರಳಿದ ದುಲೀಪ್​ಸಿಂಜಿ 1959, ಡಿಸೆಂಬರ್ 5 ರಂದು ಮುಂಬೈಯಲ್ಲಿ ಹೃದಯಾಘಾತದಿಂದ ನಿಧನರಾದರು.