ಕೊರೋನಾ ವಿರುದ್ಧ ಹೇಗೆ ಹೋರಾಡಬೇಕು? ಉದಾಹರಣೆಗೆ: ರಾಹುಲ್ ದ್ರಾವಿಡ್

ಜಾಗತಿಕ ಮಟ್ಟದಲ್ಲಿ ಕೊರೋನಾ ವೈರಸ್ ಹೊಸ ಘಾತುಕವಾಗಿ ಆವರಿಸಿದೆ. ಈಗಾಗಲೇ ವಿಶ್ವದಾದ್ಯಂತ 6 ಸಾವಿರಕ್ಕೂ ಅಧಿಕ ಮಂದಿ ಕೊರೋನಾ ಎಂಬ ಮಹಾಮಾರಿಗೆ ಬಲಿಯಾಗಿದ್ದಾರೆ.

ವಿಶ್ವ ಆರೋಗ್ಯ ಸಂಸ್ಥೆ ಮತ್ತು ಸರ್ಕಾರಿ ಅಧಿಕಾರಿಗಳು ಈ ಬಗ್ಗೆ ಅನೇಕ ಮುಂಜಾಗ್ರತ ಕ್ರಮಗಳನ್ನು ಮತ್ತು ಭದ್ರತಾ ಮಾರ್ಗಸೂಚಿಗಳನ್ನು ಸೂಚಿಸಿದೆ. ಇದರ ಹೊರತಾಗಿಯೂ ಕೊರೋನಾ ಬಗ್ಗೆಗಿನ ಭೀತಿ ಮಾತ್ರ ಕಡಿಮೆಯಾಗಿಲ್ಲ.

ಭಾರತದಲ್ಲಿ  110ಕ್ಕೂ ಹೆಚ್ಚು ಮಂದಿಯಲ್ಲಿ ಕೊರೋನಾ ಪಾಸಿಟಿವ್ ಫಲಿತಾಂಶ ಕಂಡು ಬಂದಿದ್ದು, ಇಬ್ಬರು COVID-19 ನಿಂದ ಮರಣ ಹೊಂದಿದ್ದಾರೆ. ನಿಯಮಿತವಾಗಿ ಕೈ ತೊಳೆಯುವುದು ಮತ್ತು ಸಾರ್ವಜನಿಕ ಸ್ಥಳಗಳಿಂದ ದೂರ ಉಳಿಯುವುದು ಸೋಂಕು ಹರಡುವುದಂತೆ ತಡೆಯಲು ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆ ಕ್ರಮಗಳು.

ಇದನ್ನೇ ಟ್ವಿಟ್ಟರ್ ಬಳಕೆದಾರರೊಬ್ಬರು ಕ್ರಿಕೆಟ್ ದಂತಕಥೆ ಗೋಡೆ ಖ್ಯಾತಿಯ ರಾಹುಲ್ ದ್ರಾವಿಡ್ ಅವರ ವೃತ್ತಿ ಜೀವನವನ್ನು ಮುಂದಿಟ್ಟು ತುಂಬಾ ಸರಳವಾಗಿ ವಿವರಿಸುವ ಪ್ರಯತ್ನ ಮಾಡಿದ್ದಾರೆ.

ಮಾರ್ಚ್ 16 ರಂದು ಸಾಗರ್ ಎಂಬುವರು ಮಾಡಿರುವ ಟ್ವೀಟ್​ಗಳಲ್ಲಿ ಕೊರೋನಾ ವೈರಸ್ ವಿರುದ್ಧ ಹೇಗೆ ಹೋರಾಡಬೇಕು: ರಾಹುಲ್ ದ್ರಾವಿಡ್ ಪಾಠಗಳು ಎಂಬ ಚಿತ್ರಗಳೊಂದಿಗೆ ವಿವರಿಸಿದ್ದಾರೆ.

ಮೊದಲ ಟ್ವೀಟ್, "ಕೊರೋನಾ ಅಪಾಯವನ್ನು ತಪ್ಪಿಸಲು ಉತ್ತಮ ಮಾರ್ಗವೆಂದರೆ ದೂರ ಇರುವುದು". ಇಲ್ಲಿ ಚೆಂಡನ್ನು ಕೊರೋನಾಗೆ ಹೋಲಿಸಿ ದ್ರಾವಿಡ್ ಹೇಗೆ ಅಪಾಯಕಾರಿ ಎಸೆತಗಳನ್ನು ಎದುರಿಸುತ್ತಿದ್ದರು ಎಂದು ವಿವರಿಸಿದ್ದಾರೆ.

ಎರಡನೇ ಚಿತ್ರದಲ್ಲಿ, ದ್ರಾವಿಡ್ ಚೆಂಡನ್ನು ಹಿಡಿಯಲು ಡೈವ್ ಮಾಡಿರುವುದನ್ನು ತೋರಿಸಲಾಗಿದೆ. ಇಲ್ಲಿ ನಿಮ್ಮ ಕೈಗಳು ಸ್ವಚ್ಛೆಯಿಂದ ಇದ್ದರೆ ಜೀವನ ಸುರಕ್ಷಿತವಾಗಿರಲಿದೆ ತಿಳಿಸಲಾಗಿದೆ.

ಗೋಡೆ ಖ್ಯಾತಿಯ ದ್ರಾವಿಡ್ ಅವರ ತಾಳ್ಮೆ ಮತ್ತು ರಕ್ಷಣಾತ್ಮಕ ಆಟಕ್ಕೆ ಹೆಸರುವಾಸಿ. ನಿರ್ಣಾಯಕ ಟೆಸ್ಟ್ ಪಂದ್ಯಗಳಲ್ಲಿ, ಅವರು ನಿಧಾನವಾಗಿ ಆಡುತ್ತಿದ್ದರು. ಹಾಗೆಯೇ ತಮ್ಮ ವಿಕೆಟ್​ ಅನ್ನು ಬಿಟ್ಟು ಕೊಡುತ್ತಿರಲಿಲ್ಲ.

ದ್ರಾವಿಡ್ ಕ್ರೀಸ್​ನಲ್ಲಿದ್ದರೆ ಇತರೆ ಆಟಗಾರರಿಗೆ ಯಾವುದೇ ಭಯವಿರುತ್ತಿರಲಿಲ್ಲ. ಹೀಗಾಗಿ ಯಾರೂ ಭಯಪಡಬೇಡಿ. ಇಂದಿನ ಪರಿಸ್ಥಿತಿಗಳನ್ನು ತಾಳ್ಮೆಯಿಂದ ಜಯಿಸಬಹುದು ಎಂದು ತಿಳಿಸಲಾಗಿದೆ. ಇದಕ್ಕಾಗಿ ಟೆಸ್ಟ್​ ಕ್ರಿಕೆಟ್​ನ ತಾಳ್ಮೆಯ ಪ್ರತಿರೂಪಗಳಾಗಿರುವ ದ್ರಾವಿಡ್ ಮತ್ತು ವಿವಿಎಸ್ ಲಕ್ಷ್ಮಣ್ ಅವರ ಫೋಟೋವನ್ನು ಶೇರ್ ಮಾಡಿದ್ದಾರೆ.

ಕಠಿಣ ಸಂದರ್ಭಗಳನ್ನು ಅತ್ಯಂತ ಅತೀ ಸ್ಟ್ರಾಂಗ್ ಇರುವ ವ್ಯಕ್ತಿಗಳು ಮಾತ್ರ ಎದುರಿಸುತ್ತಾರೆ. ಧೃತಿಗೆಡದಿರಿ ಇಲ್ಲಿ ಕಠಿಣ ಸಮಯ ಎಂಬುದು ಶಾಶ್ವತವಲ್ಲ ಎಂದು ದ್ರಾವಿಡ್ ಅವರ ಏಕಾಂಗಿ ಹೋರಾಟದ ಚಿತ್ರದ ಮೂಲಕ ತಿಳಿಸಿದ್ದಾರೆ.

ಕಠಿಣ ಸಂದರ್ಭಗಳನ್ನು ಅತ್ಯಂತ ಅತೀ ಸ್ಟ್ರಾಂಗ್ ಇರುವ ವ್ಯಕ್ತಿಗಳು ಮಾತ್ರ ಎದುರಿಸುತ್ತಾರೆ. ಧೃತಿಗೆಡದಿರಿ ಇಲ್ಲಿ ಕಠಿಣ ಸಮಯ ಎಂಬುದು ಶಾಶ್ವತವಲ್ಲ ಎಂದು ದ್ರಾವಿಡ್ ಅವರ ಏಕಾಂಗಿ ಹೋರಾಟದ ಚಿತ್ರದ ಮೂಲಕ ತಿಳಿಸಿದ್ದಾರೆ.

ಅಲ್ಲದೆ ಎಲ್ಲದಕ್ಕೂ ಸಿದ್ಧರಾಗಿ. ಯಾವುದೇ ಸಂದರ್ಭದಲ್ಲೂ ಧೃತಿಗೆಡದೆ ಎದುರಿಸಲು ಸಜ್ಜಾಗಿ. ಸಂದರ್ಭಕ್ಕೆ ಅನುಗುಣವಾಗಿ ಕೆಲಸ ಮಾಡಲು ತಯಾರಾಗಿ ಎಂಬ ಸಂದೇಶ ಸಾರಲು ತಂಡಕ್ಕೆ ಅಗತ್ಯ ಬಿದ್ದಾಗ ವಿಕೆಟ್ ಕೀಪರ್​ ಜವಾಬ್ದಾರಿಯನ್ನು ವಹಿಸಿಕೊಂಡ ದ್ರಾವಿಡ್ ಅವರ ಚಿತ್ರವನ್ನು ಹಂಚಿಕೊಳ್ಳಲಾಗಿದೆ.

ಇನ್ನೊಬ್ಬರ ವೈಯಕ್ತಿಕ ಮೈಲಿಗಲ್ಲುಗಳ ಬಗ್ಗೆ ಚಿಂತಿಸದೆ, ಸರಿಯಾದ ಸಂದರ್ಭಕ್ಕೆ ಉತ್ತಮ ನಿರ್ಧಾರ ತೆಗೆದುಕೊಳ್ಳಿ. ಈ ಮೂಲಕ ನಿಮ್ಮ ಆರೋಗ್ಯದಲ್ಲಿ ತೊಂದರೆ ಕಾಣಿಸಿಕೊಳ್ಳುತ್ತಿದ್ದರೆ ಚಿಂತಿಸದೇ ಆರೋಗ್ಯ ತಪಾಸಣೆಗೆ ಒಳಗಾಗಿ. ಇದನ್ನು ಚಿತ್ರ ಸಮೇತ ತಿಳಿಸಲು ಪಾಕ್ ವಿರುದ್ಧದ ಟೆಸ್ಟ್​ ಸಚಿನ್ ತೆಂಡೂಲ್ಕರ್ 191 ರನ್​ ಗಳಿಸಿದ್ದಾಗ ತಂಡದ ಒಳಿತಿಗಾಗಿ ದ್ರಾವಿಡ್ ಡಿಕ್ಲೇರ್ ನಿರ್ಧಾರದ ಫೋಟೊ ಬಳಸಲಾಗಿದೆ.

ಹೀಗೆ ವಿಶ್ವ ಕ್ರಿಕೆಟ್​ನ ಜಂಟಲ್​ಮ್ಯಾನ್ ಎಂದು ಗುರುತಿಸಿಕೊಂಡಿರುವ ರಾಹುಲ್ ದ್ರಾವಿಡ್ ಅವರ ಫೋಟೋಗಳನ್ನು ಬಳಸಿ ಕೊರೋನಾ ವೈರಸ್ ಬಗ್ಗೆ ಮಾಡಿರುವ ಟ್ವೀಟ್​ಗಳು ಇದೀಗ ಭಾರೀ ವೈರಲ್ ಆಗಿವೆ.