T20 World Cup- ಡೆಲಿವರಿ ಬಾಯ್ ಆಗಿದ್ದ ಕ್ರಿಸ್ ಗ್ರೀವ್ಸ್ ಈಗ ಟಿ20 ವಿಶ್ವಕಪ್​ನಲ್ಲಿ ಮ್ಯಾಚ್ ವಿನ್ನರ್

2021 ಟಿ20 ವಿಶ್ವಕಪ್ನ ಮೊದಲ ದಿನವೇ ಶಾಕಿಂಗ್ ರಿಸಲ್ಟ್ ಕಾಣಸಿಕ್ಕಿತು. ಪ್ರಬಲ ಬಾಂಗ್ಲಾದೇಶ ವಿರುದ್ಧ ಸ್ಕಾಟ್ಲೆಂಡ್ 6 ರನ್ಗಳಿಂದ ರೋಚಕ ಗೆಲುವು ಪಡೆಯಿತು. ಸ್ಕಾಟ್ಲೆಂಡ್ ತಂಡದ 140 ರನ್ಗೆ ಪ್ರತಿಯಾಗಿ ಬಾಂಗ್ಲಾದೇಶದ ಇನ್ನಿಂಗ್ಸ್ 134 ರನ್ ಮೊತ್ತಕ್ಕೆ ನಿಂತಿತು.

ಬಾಂಗ್ಲಾದೇಶ ತಂಡದ ವಿರುದ್ಧ ಸ್ಕಾಟ್ಲೆಂಡ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದು ಕ್ರಿಸ್ ಗ್ರೀವ್ಸ್ ಎಂಬ ಆಲ್ರೌಂಡರ್. ಏಳನೇ ಕ್ರಮಾಂಕದಲ್ಲಿ ಆಡಿದ ಕ್ರಿಸ್ ಗ್ರೀವ್ಸ್ 28 ಬಾಲ್ನಲ್ಲಿ 45 ರನ್ ಗಳಿಸಿದ್ದರಿಂದ ಸ್ಕಾಟ್ಲೆಂಡ್ 140 ರನ್ ಗಳಿಸಲು ಸಾಧ್ಯವಾಯಿತು. ಬೌಲಿಂಗ್​ನಲ್ಲಿ ಗ್ರೀವ್ಸ್ 19 ರನ್​ಗೆ 2 ವಿಕೆಟ್ ಕೂಡ ಪಡೆದರು.

ಕ್ರಿಸ್ ಗ್ರೀವ್ಸ್ ಅವರಿಗೆ ಇದು ಕೇವಲ ಎರಡನೇ ಅಂತರರಾಷ್ಟ್ರೀಯ ಪಂದ್ಯ. ತಂಡ 53 ರನ್​ಗೆ 6 ವಿಕೆಟ್ ಕಳೆದುಕೊಂಡು ಶೋಚನೀಯ ಸ್ಥಿತಿಯಲ್ಲಿದ್ದಾಗ ಇವರ ಉತ್ತಮ ಬ್ಯಾಟಿಂಗ್​ನಿಂದಾಗಿ ಸ್ಕಾಟ್ಲೆಂಡ್ ಒಳ್ಳೆಯ ಮೊತ್ತ ಕಲೆಹಾಕಲು ಸಾಧ್ಯವಾಯಿತು.

31 ವರ್ಷದ ಕ್ರಿಸ್ ಗ್ರೀವ್ಸ್ ಅವರು ಅಮೇಜಾನ್ ಸಂಸ್ಥೆಯ ಪಾರ್ಸಲ್ ಸೇವೆ ಮಾಡುವ ಡ್ರೈವರ್ ಕೆಲಸವನ್ನು ಮಾಡುತ್ತಿದ್ದವರು. ಡೆಲಿವರಿ ಬಾಯ್ ಕೆಲಸ ಮಾಡುತ್ತಿದ್ದವರು. ಈಗ ಟಿ20 ವಿಶ್ವಕಪ್​ನಲ್ಲಿ ತಮ್ಮ ದೇಶಕ್ಕೆ ಮ್ಯಾಚ್ ವಿನ್ನರ್ ಆಗಿದ್ದಾರೆ. ಅವರ ಈ ಪ್ರಯಾಣ ನಿಜಕ್ಕೂ ಅದ್ಭುತವಾದುದು.

ಕ್ರಿಸ್ ಗ್ರೀವ್ಸ್ ಸ್ಕಾಟ್ಲೆಂಡ್ನಲ್ಲಿ ಗುತ್ತಿಗೆ ಪಡೆದ ಆಟಗಾರನೂ ಅಲ್ಲ. ಒಂದು ತಿಂಗಳ ಹಿಂದೆ ರಾಷ್ಟ್ರೀಯ ತಂಡಕ್ಕೆ ಅವರನ್ನ ಆಯ್ಕೆ ಮಾಡುವುದೇ ಕಷ್ಟ ಎಂಬಂತಿತ್ತು. ಆದರೆ, ಬಹಳ ಕಷ್ಟಪಟ್ಟು ಅವರು ಈ ಹಂತಕ್ಕೆ ಬಂದಿದ್ದಾರೆ. ಎರಡು ಅಭ್ಯಾಸ ಪಂದ್ಯಗಳಲ್ಲಿ ಅವರು ವಿಫಲರಾದರೂ ವಿಶ್ವಕಪ್ ಪಂದ್ಯದಲ್ಲಿ ಆಡಲು ಅವರಿಗೆ ಅವಕಾಶ ಕೊಡಲಾಗಿತ್ತು. ಈ ಅವಕಾಶವನ್ನು ಅವರು ಸರಿಯಾಗಿಯೇ ಬಳಸಿಕೊಂಡಿದ್ದಾರೆ.

“ಕ್ರಿಸ್ ಗ್ರೀವ್ಸ್ ಬಗ್ಗೆ ಹೆಮ್ಮೆ ಎನಿಸುತ್ತಿದೆ. ಅವರು ಬಹಳಷ್ಟು ತ್ಯಾಗ ಮಾಡಿದ್ದಾರೆ. ಇತ್ತೀಚಿನವರೆಗೂ ಅವರು ಅಮೇಜಾನ್ಗೆ ಪಾರ್ಸಲ್ ಡೆಲಿವರಿ ಮಾಡುತ್ತಿದ್ದರು. ಈಗ ವಿಶ್ವಕಪ್​ನಲ್ಲಿ ಬಾಂಗ್ಲಾದೇಶ ವಿರುದ್ಧ ಮ್ಯಾನ್ ಆಫ್ ದ ಮ್ಯಾಚ್ ಆಗಿದ್ದಾರೆ” ಎಂದು ಸ್ಕಾಟ್ಲೆಂಡ್ ಕ್ರಿಕೆಟ್ ತಂಡದ ನಾಯಕ ಕೈಲೆ ಕೋಟ್ಜರ್ ಅವರು ಕ್ರಿಸ್ ಗ್ರೀವ್ಸ್ ಬಗ್ಗೆ ಹೇಳುತ್ತಾರೆ.

1990, ಅಕ್ಟೋಬರ್ 12ರಂದು ಸೌಥ್ ಆಫ್ರಿಕಅದ ಜೋಹಾನ್ಸ್​​ಬರ್ಗ್​ನಲ್ಲಿ ಜನಿಸಿದ ಕ್ರಿಸ್ ಗ್ರೀವ್ಸ್ ಅವರು ಸ್ಕಾಟ್ಲೆಂಡ್ ನಿವಾಸಿಯೇ ಆಗಿದ್ದಾರೆ. ಹತ್ತು ದಿನಗಳ ಹಿಂದೆ ಅ. 8ರಂದು ಪಪುವಾ ನ್ಯೂಗಿನಿಯಾ ವಿರುದ್ಧ ಮೊದಲ ಅಂತರರಾಷ್ಟ್ರೀಯ ಟಿ20 ಪಂದ್ಯ ಆಡಿದ್ದರು.