4 ವಿಶ್ವಕಪ್ ಗೆದ್ದ ತಂಡದ ಆಟಗಾರರಿಗೆ ಪಂದ್ಯ ಶುಲ್ಕ ಪಾವತಿಸಲು ಹಣವಿಲ್ಲ..!

2 ಬಾರಿ ಏಕದಿನ ಕ್ರಿಕೆಟ್​ನಲ್ಲಿ ವಿಶ್ವ ಚಾಂಪಿಯನ್. ಮತ್ತೆರಡು ಸಲ ಟಿ20 ವರ್ಲ್ಡ್​ ಚಾಂಪಿಯನ್. ಕ್ರಿಕೆಟ್ ಅಂಗಳ ದೈತ್ಯ ತಂಡ ಎನಿಸಿಕೊಂಡಿರುವ ವೆಸ್ಟ್​ ಇಂಡೀಸ್ ಕ್ರಿಕೆಟ್ ಭಾರಿ ಆರ್ಥಿಕ ಬಿಕ್ಕಟ್ಟನ್ನು ಎದುರಿಸುತ್ತಿದೆ.

ಒಂದೆಡೆ ಕೊರೋನಾದಿಂದ ಕ್ರಿಕೆಟ್ ಅಂಗಳ ಸ್ಥಬ್ಧವಾಗಿದ್ದರೆ, ಇತ್ತ ವೆಸ್ಟ್​ ಇಂಡೀಸ್ ತಂಡದ ಆಟಗಾರರಿಗೆ ಕಳೆದ ನಾಲ್ಕು ತಿಂಗಳಿನಿಂದ ಪಂದ್ಯ ಶುಲ್ಕವನ್ನು ಪಾವತಿ ಮಾಡಿಲ್ಲ ಎಂದು ವರದಿಯಾಗಿದೆ.

ಆಟಗಾರರೊಂದಿಗೆ ಸದಾ ವಿವಾದದಲ್ಲಿ ವಿಂಡೀಸ್ ಕ್ರಿಕೆಟ್ ಮಂಡಳಿ ಜನವರಿಯಿಂದ ಯಾವುದೇ ಆಟಗಾರನಿಗೆ ಪಂದ್ಯದ ಶುಲ್ಕ ಮೊತ್ತ ನೀಡಿಲ್ಲ. ಇದಕ್ಕೆ ಕಾರಣ ಪ್ರಸ್ತುತ ಆಡಳಿತ ಮಂಡಳಿಗೆ ತಲೆದೂರಿರುವ ಆರ್ಥಿಕ ಸಮಸ್ಯೆ ಎನ್ನಲಾಗಿದೆ.

ವೆಸ್ಟ್ ಇಂಡೀಸ್​ ಪುರುಷರ ತಂಡ ಜನವರಿಯಲ್ಲಿ ಐರ್ಲೆಂಡ್ ವಿರುದ್ಧದ ಸರಣಿ (ಮೂರು ಏಕದಿನ ಮತ್ತು ಮೂರು ಟಿ 20) ಆಡಿತ್ತು. ಹಾಗೆಯೇ ಫೆಬ್ರವರಿ-ಮಾರ್ಚ್​ನಲ್ಲಿ ಶ್ರೀಲಂಕಾ ಪ್ರವಾಸದಲ್ಲಿ ಮೂರು ಏಕದಿನ ಮತ್ತು ಎರಡು ಟಿ20 ಪಂದ್ಯಗಳನ್ನಾಡಿತ್ತು. ಆದರೆ ಈ ಪಂದ್ಯಗಳಲ್ಲಿ ಆಡಿದ ವೇತನವನ್ನು ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿ ಪಾವತಿಸದಿರುವುದು ಆಟಗಾರರ ಚಿಂತೆಗೆ ಕಾರಣವಾಗಿದೆ.

ಹಾಗೆಯೇ ಆಸ್ಟ್ರೇಲಿಯಾದಲ್ಲಿ ಫೆಬ್ರವರಿ-ಮಾರ್ಚ್‌ನಲ್ಲಿ ನಡೆದ ಟಿ20 ವಿಶ್ವಕಪ್‌ನಲ್ಲಿ ಆಡಿದ ನಾಲ್ಕು ಪಂದ್ಯಗಳಿಗಾಗಿ ಮಹಿಳಾ ಆಟಗಾರರಿಗೂ ಯಾವುದೇ ಪಂದ್ಯ ಶುಲ್ಕವನ್ನು ಪಾವತಿಸಲಾಗಿಲ್ಲ ಎಂದು ತಿಳಿದು ಬಂದಿದೆ.

ಕಳೆದ ಎರಡು ವರ್ಷಗಳಿಂದ ವೆಸ್ಟ್ ಇಂಡೀಸ್​ನ ಆರ್ಥಿಕ ಸ್ಥಿತಿ ಹೀನಾಯ ಮಟ್ಟದಲ್ಲಿದೆ. 2018 ರಲ್ಲಿ ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ವಿರುದ್ಧದ ತವರಿನಲ್ಲಿ ಆಯೋಜಿಸಿದ್ದ ಪಂದ್ಯಗಳಿಂದ ಮಂಡಳಿ ಅಪಾರ ನಷ್ಟವನ್ನು ಅನುಭವಿಸಿದೆ. ವೆಸ್ಟ್ ಇಂಡೀಸ್ ಆಯೋಜಿಸಿದ ಸರಣಿಗಳಿಂದ ಒಟ್ಟು 22 ಮಿಲಿಯನ್ ಡಾಲರ್ ಕಳೆದುಕೊಂಡಿದೆ ಎಂದು ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಅಲ್ಲದೆ ಆಟಗಾರರಿಗೆ ಪಂದ್ಯ ಶುಲ್ಕ ನೀಡಲು ವಿಳಂಬ ಮಾಡಲಾಗುವುದಿಲ್ಲ. ಜೂನ್​ವರೆಗೆ ಎಲ್ಲಾ ಪಂದ್ಯ ಶುಲ್ಕವನ್ನು ಪಾವತಿಸಲು ನಾವು ಪ್ರಯತ್ನಿಸುತ್ತೇವೆ. ಕಳೆದ ವರ್ಷ ಕೂಡ ನಾವು ತಡವಾಗಿ ಪಂದ್ಯ ಶುಲ್ಕವನ್ನು ನೀಡಿದ್ದೇವೆ. ಹಾಗೆಯೇ ವರ್ಷದ ಅಂತ್ಯದವರೆಗಿನ ಸಂಪೂರ್ಣ ಬಾಕಿ ಶುಲ್ಕವನ್ನು ಪಾವತಿಸಲಾಗಿತ್ತು ಎಂದು ಎಂದು ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿಯ ಅಧಿಕಾರಿ ತಿಳಿಸಿದರು.

ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿಯಲ್ಲಿ ವೇತನ ವಿವಾದ ಇದೇ ಮೊದಲೇನಲ್ಲ. 2014ರಲ್ಲಿ ವೇತನದ ವಿಷಯವಾಗಿ ವೆಸ್ಟ್ ಇಂಡೀಸ್​ನ ಸ್ಟಾರ್​ ಆಟಗಾರರು ಭಾರತ ಪ್ರವಾಸದಿಂದ ಹಿಂದೆ ಸರಿದಿದ್ದರು.

ಅಲ್ಲದೆ ಕ್ರಿಸ್ ಗೇಲ್, ಆಂಡ್ರೆ ರಸೆಲ್, ಡ್ವೇನ್ ಬ್ರಾವೋ, ಸುನಿಲ್ ನರೇನ್ ನಂತಹ ಅನುಭವಿ ಆಟಗಾರರು ರಾಷ್ಟ್ರೀಯ ತಂಡದಿಂದ ಹೊರಗುಳಿದು, ಐಪಿಎಲ್​, ಬಿಗ್ ಬ್ಯಾಷ್ ಲೀಗ್, ಬಿಪಿಎಲ್, ಪಿಎಸ್​ಎಲ್​ನಂತಹ ಟೂರ್ನಿಗಳಲ್ಲಿ ಹೆಚ್ಚಾಗಿ ಭಾಗವಹಿಸುತ್ತಿರುವುದು ಕೂಡ ಇದೇ ಕಾರಣದಿಂದ.