ಇಂಗ್ಲೆಂಡ್ ವಿಶ್ವಕಪ್ ಗೆಲುವಿನ ಹಿಂದಿತ್ತು ಒಂದು 'ಸಿಗರೇಟ್'​..!

2019ರ ವಿಶ್ವಕಪ್​ ಫೈನಲ್ ಯಾರು ತಾನೆ ಮರೆಯಲು ಸಾಧ್ಯ. ಕ್ರಿಕೆಟ್ ಕಾಶಿ ಲಾರ್ಡ್ಸ್​ ಮೈದಾನದಲ್ಲಿ ನಡೆದ ಇಂಗ್ಲೆಂಡ್-ನ್ಯೂಜಿಲೆಂಡ್ ನಡುವಣ ಕದನದಲ್ಲಿ ಕೊನೆಗೂ ಆಂಗ್ಲರು ಗೆಲುವು ದಾಖಲಿಸಿದ್ದರು.

ಇದಕ್ಕೂ ಮುನ್ನ ಟಾಸ್ ಗೆದ್ದ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಬ್ಯಾಟಿಂಗ್ ಆಯ್ದುಕೊಂಡರು. ಇಂಗ್ಲೆಂಡ್ ಬೌಲರುಗಳ ಎದುರು ರನ್​ಗಾಗಿ ಪರದಾಡಿದ ಕಿವೀಸ್ ಬ್ಯಾಟ್ಸ್​​ಮನ್​ಗಳು ನಿಗದಿತ 50 ಓವರ್​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 241 ರನ್ ಗಳಿಸಿತ್ತು.

ಈ ಸಾಧಾರಣ ಮೊತ್ತವನ್ನು ಇಂಗ್ಲೆಂಡ್ ಸುಲಭವಾಗಿ ಚೇಸ್ ಮಾಡಲಿದ್ದಾರೆ ಎಂದು ಎಲ್ಲರೂ ಅಂದುಕೊಂಡಿದ್ದರು. ಈ ಊಹೆ 190ರ ಗಡಿವರೆಗೆ ಸರಿಯಾಗಿಯೇ ಇತ್ತು. ಏಕೆಂದರೆ ಕೇವಲ 4 ವಿಕೆಟ್ ಕಳೆದುಕೊಂಡು ಇಂಗ್ಲೆಂಡ್  190 ರನ್ ಬಾರಿಸಿತ್ತು.

ಆದರೆ ಆ ಬಳಿಕ ಕಿವೀಸ್ ಬೌಲರ್​ಗಳ ಪಾರುಪತ್ಯದ ಮುಂದೆ ಇಂಗ್ಲೆಂಡ್ ಬ್ಯಾಟ್ಸ್​ಮನ್​ಗಳು ತರಗೆಲೆಗಳಂತೆ ಉದುರಿದರು. ಪರಿಣಾಮ 241 ರನ್​ಗಳಿಗೆ ಆಂಗ್ಲ ಪಡೆ ಆಲೌಟ್. ಪಂದ್ಯ ಟೈ. ವಿಶ್ವಕಪ್ ಇತಿಹಾಸದಲ್ಲಿ ರೋಮಾಂಚಕ ಹೋರಾಟಕ್ಕೆ ಈ ಪಂದ್ಯ ಸಾಕ್ಷಿಯಾಯಿತು.

ಆ ಬಳಿಕ ನಡೆದ ಸೂಪರ್ ಓವರ್​ನಲ್ಲೂ ಉಭಯ ತಂಡಗಳು 15 ರನ್​ಗಳು ಬಾರಿಸುವ ಮೂಲಕ ಸಮಬಲ ಸಾಧಿಸಿತು. ಆದರೆ ಐಸಿಸಿ ನಿಯಮದ ಪ್ರಕಾರ ಬೌಂಡರಿಗಳ ಲೆಕ್ಕಾಚಾರದಾಟದಲ್ಲಿ ಇಂಗ್ಲೆಂಡ್ ತಂಡ ಚೊಚ್ಚಲ ಬಾರಿ ವಿಶ್ವಕಪ್​ಗೆ ಮುತ್ತಿಟ್ಟರು.

ಈ ಪಂದ್ಯದಲ್ಲಿ ಮ್ಯಾನ್ ಆಫ್ ದಿ ಮ್ಯಾಚ್ ಪ್ರಶಸ್ತಿ ಲಭಿಸಿದ್ದು ಇಂಗ್ಲೆಂಡ್ ಆಲ್​ರೌಂಡರ್ ಬೆನ್ ಸ್ಟೋಕ್ಸ್​ಗೆ. ಚೇಸಿಂಗ್​ ಇನಿಂಗ್ಸ್​ನಲ್ಲಿ 84 ರನ್ ಸಿಡಿಸಿ ಏಕಾಂಗಿ ಹೋರಾಟ ನಡೆಸಿದ್ದರು ಬೆನ್. ಹೀಗಾಗಿಯೇ ಸೂಪರ್ ಓವರ್​ನಲ್ಲೂ ಸ್ಟೋಕ್ಸ್​ರನ್ನು ಕಣಕ್ಕಿಳಿಸಲಾಗಿತ್ತು.

ಅಲ್ಲೂ ಕೂಡ 8 ರನ್ ಬಾರಿಸುವ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು. ಆದರೆ ಈ ಎರಡು ಇನಿಂಗ್ಸ್ ನಡುವೆ ಬೆನ್ ಸ್ಟೋಕ್ಸ್ ಅತೀ ಹೆಚ್ಚು ಒತ್ತಡ ಅನುಭವಿಸಿದ್ದರು.

ಕೊನೆಯವರೆಗೂ ಅಜೇಯರಾಗಿ ಉಳಿದಿದ್ದ ಬೆನ್​ ಸ್ಟೋಕ್ಸ್​ಗೆ ಪಂದ್ಯ ಗೆಲ್ಲಿಸಿಕೊಡಲಾಗಲಿಲ್ಲ ಎಂಬ ನೋವು ಆವರಿಸಿತ್ತು. ಇದರಿಂದ ಫುಲ್ ನರ್ವಸ್ ಆಗಿದ್ದ ಸ್ಟೋಕ್ಸ್ ಸೂಪರ್ ಓವರ್​ ನಡುವೆ ಸಿಕ್ಕಿದ ಸಣ್ಣ ಗ್ಯಾಪ್ ನಡುವೆ ಸಿಗರೇಟ್ ಸೇದಲು ತೆರಳಿದ್ದರು ಎಂಬ ವಿಚಾರ ಬಹಿರಂಗವಾಗಿದೆ.

ಪಂದ್ಯ ಟೈ ಆಗಿದ್ದರಿಂದ ಇಂಗ್ಲೆಂಡ್ ನಾಯಕ ಆಟಗಾರರನ್ನು ಉದ್ದೇಶಿಸಿ ಮಾತನಾಡುತ್ತಿದ್ದರು. ಆದರೆ ಸ್ಟೋಕ್ಸ್ ಭಾಗವಹಿಸಿರಲಿಲ್ಲ. ಏಕೆಂದರೆ 2 ಗಂಟೆ 27 ನಿಮಿಷಗಳ ಕಾಲ ಟೆನ್ಷನ್​ ಜೊತೆ ಬ್ಯಾಟಿಂಗ್ ಮಾಡಿದ್ದ ಸ್ಟೋಕ್ಸ್ ಪಂದ್ಯ ಟೈ ಆಗುತ್ತಿದ್ದಂತೆ ಇಂಗ್ಲೆಂಡ್ ಡ್ರೆಸ್ಸಿಂಗ್ ರೂಮ್​ಗೆ ತೆರಳಿ ಸ್ನಾನ ಮಾಡಿದರು. ಅಲ್ಲದೆ ಅಲ್ಲೇ ಒಂದೆರೆಡು ಧಮ್ ಎಳೆದು ಬಂದರು.

ಸಿಗರೇಟ್ ಸೇದಿ ರಿಫ್ರೆಶ್ ಆಗಿದ್ದ ಸ್ಟೋಕ್ಸ್​ ನಂತರ ತಂಡದ ತೀರ್ಮಾನದಂತೆ ಮತ್ತೆ ಬ್ಯಾಟಿಂಗ್​ಗೆ ಇಳಿದು 8 ರನ್ ಬಾರಿಸಿದರು. ಈ ಮೂಲಕ ಇಂಗ್ಲೆಂಡ್​ ತಂಡದ ವಿಶ್ವಕಪ್ ಗೆಲುವಿನಲ್ಲಿ ಬಹುಮುಖ್ಯ ಪಾತ್ರವಹಿಸಿದರು ಎಂದು ವಿಶ್ವಕಪ್ ವಿಜೇತ ತಂಡದ ಕುರಿತಾಗಿ ಹೊರಬಂದಿರುವ ಮೋರ್ಗನ್ಸ್​ ಮೆನ್ ಎಂಬ ಪುಸ್ತಕದಲ್ಲಿ ಉಲ್ಲೇಖಿಸಲಾಗಿದೆ.

ಇಂಗ್ಲೆಂಡ್ ತಂಡದ ಸೆಲೆಬ್ರೇಷನ್