IPL 2020 Meeting: ಸಭೆಯಲ್ಲಿ ಚರ್ಚೆಯಾಗಲಿದೆ ಈ 4 ಪ್ರಮುಖ ವಿಚಾರಗಳು..!

ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಆವೃತ್ತಿಗೆ ಇನ್ನೇನು ಕೆಲವು ತಿಂಗಳುಗಳಷ್ಟೆ ಬಾಕಿಯಿದೆ. ಈ ಪ್ರಯುಕ್ತ ಇಂದು ಐಪಿಎಲ್ ಆಡಳಿತ ಸಮಿತಿ ಸಭೆ ನಡೆಸಲಿದೆ.

ಈ ಮೀಟಿಂಗ್​ನಲ್ಲಿ 13ನೇ ಆವೃತ್ತಿಯ ಐಪಿಎಲ್ ಟೂರ್ನಿಯಲ್ಲಿ ಪಂದ್ಯಗಳ ಸಮಯವನ್ನು ಮರುಪರಿಷ್ಕರಣೆ ಮಾಡುವ ಕುರಿತು ಚರ್ಚೆ ನಡೆಯಲಿದೆ.

ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ, ಕಾರ್ಯದರ್ಶಿ ಜಯ್ ಶಾ, ಐಪಿಎಲ್ ಆಡಳಿತ ಸಮಿತಿ ಮುಖ್ಯಸ್ಥ ಬ್ರಿಜೇಶ್ ಪಟೇಲ್ ಸೇರಿದಂತೆ ಪ್ರಮುಖರು ಈ ಕುರಿತು ಚರ್ಚೆ ನಡೆಸಿ ಅಂತಿಮ ತೀರ್ಮಾನ ಕೈಗೊಳ್ಳಲಿದ್ದಾರೆ.

ಪ್ರಮುಖವಾಗಿ ಈ ಬಾರಿಯ ಐಪಿಎಲ್ ಟೂರ್ನಿಯ ಪಂದ್ಯಗಳನ್ನು ರಾತ್ರಿ ಎಂಟು ಗಂಟೆಯ ಬದಲಾಗಿ, 7:30ಕ್ಕೆ ಆರಂಭಿಸುವ ಕುರಿತು ನಿರ್ಧಾರವನ್ನು ತೆಗೆದುಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಆದರೆ, ಕೆಸಲ ಮುಗಿಸಿ ಕ್ರಿಕೆಟ್ ನೋಡುವ ಅಭಿಮಾನಿಗಳಿಗೆ ಬೇಗನೆ ಪಂದ್ಯ ಆರಂಭಿಸಿದರೆ ಕಷ್ಟವಾಗಲಿದೆ. 8 ಗಂಟೆ ಸರಿಯಾದ ಸಮಯ ಎಂದು ಫ್ರಾಂಚೈಸಿಗಳು ಪಟ್ಟು ಹಿಡಿದಿವೆ.

ಪಂದ್ಯಗಳು ಮೊದಲೇ ಪ್ರಾರಂಭವಾಗಬೇಕೆಂದು ಲೀಗ್​ನ ಪ್ರಸಾರಕರು ಬಯಸಿದ್ದರು. ಪಂದ್ಯ 8 ಗಂಟೆಗೆ ಆರಂಭವಾದರೆ ಕೆಲವೊಂದು ಬಾರಿ ಮುಗಿಯುವಾಗ ತಡವಾಗುತ್ತದೆ. ಇದರಿಂದ ಟಿಆರ್​​ಪಿ ಕಡಿಮೆಯಾಗುತ್ತದೆ ಎಂಬುವುದು ಪ್ರಸಾರಕರ ವಾದವಾಗಿದೆ.

ಇದರ ಜೊತೆ ಐಪಿಎಲ್ ಟೂರ್ನಿಯ ಫೈನಲ್ ಪಂದ್ಯದ ನಂತರ ಭಾರತವು ಆಡಲಿರುವ ಅಂತರರಾಷ್ಟ್ರೀಯ ಟೂರ್ನಿಗೆ ಕನಿಷ್ಠ 15 ದಿನಗಳ ಅಂತರವಿರಬೇಕು ಎಂದು ಲೋಧಾ ಸಮಿತಿಯ ಶಿಫಾರಸಿನ ಕುರಿತು ಚರ್ಚೆ ನಡೆಯುವ ಸಾಧ್ಯತೆ ಇದೆ.

2021ರಲ್ಲಿ ಐಪಿಎಲ್ ತಂಡಗಳ ಸಂಖ್ಯೆಯನ್ನು ಹತ್ತಕ್ಕೆ ಹೆಚ್ಚಿಸುವ ಕುರಿತೂ ಮಾತುಕತೆ ನಡೆಯಬಹುದು ಎಂದು ಮೂಲಗಳು ಹೇಳಿವೆ.

ಮಾರ್ಚ್ 29 ರಿಂದ ವಾಂಖೆಡೆಯಲ್ಲಿ ಐಪಿಎಲ್ ಉದ್ಘಾಟನೆ ಪಂದ್ಯ, ಮೇ 24ರಂದು ಐಪಿಎಲ್ ಫೈನಲ್ ಪಂದ್ಯ ನಡೆಯಲಿದೆ ಎಂಬುದನ್ನು ಬಿಸಿಸಿಐ ಈಗಾಗಲೇ ಖಾತ್ರಿಪಡಿಸಿದೆ.

ವಿಶೇಷ ಎಂದರೆ ಈ ಬಾರಿ ಐಪಿಎಲ್ 45 ದಿನಗಳ ಬದಲಾಗಿ 57 ದಿನಗಳ ಕಾಲ ನಡೆಯಲಿದೆ ಎಂಬ ಹೊಸ ವಿಚಾರ ಕೇಳಿಬರುತ್ತಿದೆ.

ಒಂದು ವೇಳೆ 57 ದಿನಗಳು ಐಪಿಎಲ್ ನಡೆಯಲಿದೆ ಎಂದರೆ 2020ರ ಆವೃತ್ತಿಯಲ್ಲಿ ದಿನಕ್ಕೆ ಒಂದೇ ಪಂದ್ಯ ನಡೆಯಲಿದೆ ಎಂಬ ವಿಚಾರ ಬಿಸಿಸಿಐ ಮೂಲಗಳಿಂದ ತಿಳಿದುಬಂದಿದೆ.

ಈ ಬಾರಿಯ ಐಪಿಎಲ್​ನ ಆರಂಭದ ಕೆಲವೊಂದು ಪಂದ್ಯಗಳಿಗೆ ಆಸ್ಟ್ರೆಲಿಯಾ, ಇಂಗ್ಲೆಂಡ್ ಹಾಗೂ ನ್ಯೂಜಿಲ್ಯಾಂಡ್ ಆಟಗಾರರು ಅಲಭ್ಯರಿದ್ದಾರೆ.

ಐಪಿಎಲ್ ಪ್ರಾರಂಭದ ವೇಳೆ ಆಸ್ಟ್ರೇಲಿಯಾ-ನ್ಯೂಜಿಲ್ಯಾಂಡ್ ನಡುವೆ ಹಾಗೂ ಇಂಗ್ಲೆಂಡ್-ಶ್ರೀಲಂಕಾ ನಡುವೆ ಕ್ರಿಕೆಟ್ ಸರಣಿ ನಡೆಯಲಿದೆ. ಹೀಗಾಗಿ ಪ್ರಮುಖ ಆಟಗಾರರು ಐಪಿಎಲ್ ಆರಂಭವಾಗಿ ಮೊದಲ  ವಾರ ಕಳೆದ ನಂತರ ತಂಡ ಸೇರಿಕೊಳ್ಳಲಿದ್ದಾರೆ.