ಕ್ರಿಕೆಟ್ ಸ್ಟೇಡಿಯಂನಲ್ಲೇ ಪೂಲ್ ಬೀಚ್: ಮೋಜು ಮಸ್ತಿಯೊಂದಿಗೆ ಪಂದ್ಯ ವೀಕ್ಷಣೆ

ಟೆಸ್ಟ್ ಕ್ರಿಕೆಟ್ ಮಾದರಿಯನ್ನು ಜನಪ್ರಿಯಗೊಳಿಸುವ ಮತ್ತು ಪ್ರೇಕ್ಷಕರ ಸಂಖ್ಯೆಯನ್ನು ಅಧಿಕಗೊಳಿಸಲು ಈಗಾಗಲೇ ಡೇ-ನೈಟ್ ಟೆಸ್ಟ್​ಗೆ ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ಚಾಲನೆ ನೀಡಿದೆ.

ಇದರ ನಡುವೆ ಆಸ್ಟ್ರೇಲಿಯನ್ ಕ್ರಿಕೆಟ್ ಮಂಡಳಿ ಮತ್ತೊಂದು ಹೆಜ್ಜೆ ಮುಂದಿಟ್ಟಿದ್ದು, ಕ್ರಿಕೆಟ್​ ವೀಕ್ಷಣೆಯನ್ನು ಮತ್ತಷ್ಟು ರೋಮಾಂಚನಗೊಳಿಸಲು ವಿಭಿನ್ನ ಮಾರ್ಗದ ಮೊರೆ ಹೋಗಿದೆ.

ಅದರಂತೆ ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್ ನಡುವೆ ಪರ್ತ್‌ನಲ್ಲಿ ನಡೆಯುತ್ತಿರುವ ಪಂದ್ಯದ ವೇಳೆ ಸ್ಟೇಡಿಯಂನಲ್ಲೇ ಪೂಲ್​ ವ್ಯವಸ್ಥೆ ಮಾಡಲಾಗಿದೆ.

ಪರ್ತ್​ನಲ್ಲಿ ಪ್ರಸ್ತುತ ತಾಪಮಾನವು 40C ಗಿಂತ ಹೆಚ್ಚಾಗಿದ್ದು, ಇದರಿಂದ ಪಂದ್ಯ ವೀಕ್ಷಕರ ಸಂಖ್ಯೆಯಲ್ಲಿ ಕಡಿಮೆಯಾಗುವ ಸಾಧ್ಯತೆಯಿತ್ತು. ಆದರೆ ಸ್ಟೇಡಿಯಂ ಆಡಳಿತ ಮಂಡಳಿ ತೆಗೆದುಕೊಂಡಿರುವ ಹೊಸ ಯೋಜನೆಯಿಂದ ಕ್ರಿಕೆಟ್​ ಪ್ರೇಮಿಗಳು ಹೊಸ ರೋಮಾಂಚನ ನೀಡುತ್ತಿದೆ.

ಸ್ಟೇಡಿಯಂ ಭಾಗದಲ್ಲಿ ಪೂಲ್ ಗ್ಯಾಲರಿಯನ್ನು ನಿರ್ಮಿಸಿರುವ ಆಸ್ಟ್ರೇಲಿಯನ್ ಕ್ರಿಕೆಟ್ ಮಂಡಳಿ, ಕ್ರಿಕೆಟ್ ಪ್ರೇಮಿಗಳಿಗಾಗಿ ಹೊಸ ವ್ಯವಸ್ಥೆಯನ್ನು ಮಾಡಿಕೊಟ್ಟಿದೆ. ಅದರಂತೆ ಇದೀಗ ಬಿಸಿಲಿನ ಝಳವಿದ್ದರೂ ಕ್ರಿಕೆಟ್​ ಪ್ರೇಮಿಗಳು ಸ್ಟೇಡಿಯಂ ಭಾಗದಲ್ಲಿರುವ ಪೂಲ್​ನಲ್ಲಿ ಕುಳಿತು ಆರಾಮವಾಗಿ ಪಂದ್ಯ ವೀಕ್ಷಿಸುತ್ತಿದ್ದಾರೆ.

ಈ ವಿಶೇಷ ಪೂಲ್ ಟಿಕೆಟ್​ ದರ  250 ಆಸ್ಟ್ರೇಲಿಯನ್ ಡಾಲರ್‌. ಅಂದರೆ ಸುಮಾರು 12 ಸಾವಿರ ರೂಪಾಯಿಗಳು. ಈ ಮೂಲಕ ಕ್ರಿಕೆಟ್​ನೊಂದಿಗೆ ಮೋಜು ಮಸ್ತಿಯಲ್ಲಿ ತೊಡಗಿಕೊಳ್ಳಬಹುದು.

ಸದ್ಯ ಈ ಕ್ರೀಡಾಂಗಣದ ಪೂಲ್​ಗೆ ಬೌಂಡರಿ ಬೀಚ್ ಕ್ಲಬ್ ಎಂದು ಹೆಸರಿಡಲಾಗಿದೆ. 14 ಮೀಟರ್ ಉದ್ದದ ಈ ಕೊಳದಲ್ಲಿ 100 ಜನರು ಒಟ್ಟಿಗೆ ಕುಳಿತು ಪಂದ್ಯವನ್ನು ವೀಕ್ಷಿಸಬಹುದು.

ಹಾಗೆಯೇ ಪ್ರತಿ ಎರಡು ಗಂಟೆಗಳ ನಂತರ ಕೊಳವನ್ನು ಸ್ವಚ್ಛಗೊಳಿಸಲಾಗುತ್ತದೆ. ಅಲ್ಲದೆ ಸೆಕ್ಯುರಿಟಿ ಗಾರ್ಡ್​ಗಳನ್ನು ಕೂಡ ಬೌಂಡರಿ ಬೀಚ್​ ಕ್ಲಬ್​ ಬಳಿ ನೇಮಿಸಲಾಗಿದೆ ಎಂದು ಆಯೋಜಕರು ತಿಳಿಸಿದ್ದಾರೆ.