ಸೆಹ್ವಾಗ್ ಮಾತು ಕೇಳಿದ್ರೆ ನಾನು ಕೂಡ ತಂಡದಲ್ಲಿ ಉಳಿಯುತ್ತಿದ್ದೆ: ಆಕಾಶ್ ಚೋಪ್ರಾ

ಅದು 2003, ಟೀಮ್ ಇಂಡಿಯಾ ಪರ ವಿರೇಂದ್ರ ಸೆಹ್ವಾಗ್ ಮತ್ತು ಆಕಾಶ್ ಚೋಪ್ರಾ ಆರಂಭಿಕರಾಗಿ ಕಣಕ್ಕಿಳಿಯುತ್ತಿದ್ದರು. ಆದರೆ ಒಂದೇ ವರ್ಷದಲ್ಲಿ ಚೋಪ್ರಾ ತಂಡದಿಂದ ಹೊರಬಿದ್ರೆ ಸೆಹ್ವಾಗ್ ಮಾತ್ರ ಭಾರತ ತಂಡದ ಖಾಯಂ ಸದಸ್ಯರಾಗಿ ಉಳಿದರು.

ಈ ಬಗ್ಗೆ ಖುದ್ದು ಆಕಾಶ್ ಚೋಪ್ರಾ ಮಾತನಾಡಿದ್ದಾರೆ. ಅಂದು ನಾನು ಸೆಹ್ವಾಗ್ ಅವರ ಮಾತು ಕೇಳಿದ್ರೆ ನಾನು ಕೂಡ ತಂಡದಲ್ಲಿ ಉಳಿಯುತ್ತಿದ್ದೇನೋ ಎಂದು ಟೀಮ್ ಇಂಡಿಯಾ ಮಾಜಿ ಕ್ರಿಕೆಟಿಗ ತಿಳಿಸಿದ್ದಾರೆ.

ಏಕೆಂದರೆ ನಾನು ಭಾರತದ ಪರ ಕೇವಲ 10 ಟೆಸ್ಟ್ ಪಂದ್ಯಗಳನ್ನು ಮಾತ್ರ ಆಡಿದ್ದೇನೆ. ಅದು ಕೂಡ ಸೆಹ್ವಾಗ್ ಜೊತೆ ಆರಂಭಿಕನಾಗಿ ಎಂಬುದು ವಿಶೇಷ. ಆದರೆ ನನಗೆ ತಂಡದಲ್ಲಿ ನೆಲೆಯೂರಲು ಸಾಧ್ಯವಾಗಿರಲಿಲ್ಲ.

ಇದೇ ವೇಳೆ ಖುದ್ದು ಸೆಹ್ವಾಗ್ ಕೂಡ ನನ್ನ ಎಚ್ಚರಿಸಿದ್ದರು. ಅದೊಂದು ದಿನ ಬಂದು ಚೋಪ್ರಾಜಿ ನೀವು ಹೀಗೆ ಪಂದ್ಯಗಳಲ್ಲಿ 40-40 ರನ್​ಗಳನ್ನು ಮಾತ್ರ ಗಳಿಸುತ್ತಿದ್ರೆ ಖಂಡಿತವಾಗಿಯೂ ತಂಡದಿಂದ ಕೈ ಬಿಡುತ್ತಾರೆ. ಹಾಗೆಯೇ ದೊಡ್ಡ ಮೊತ್ತ ಕಲೆಹಾಕದೇ ತಂಡದಲ್ಲಿ ಉಳಿಯಲಾಗುವುದಿಲ್ಲ ಎಂದಿದ್ದರು.

ಅವರು ಹೇಳಿದಂತೆ ನಡೆಯಿತು. ಅಂದು ಸೆಹ್ವಾಗ್ ನೀಡಿದ ಸಲಹೆಯನ್ನು ಗಂಭೀರವಾಗಿ ತೆಗೆದುಕೊಂಡಿದ್ರೆ ನಾನು ಕೂಡ ಟೀಮ್ ಇಂಡಿಯಾ ಪರ ದೀರ್ಘಕಾಲ ಆಡುತ್ತಿದ್ದೆ ಎಂದು ಆಕಾಶ್ ಚೋಪ್ರಾ ಅಭಿಪ್ರಾಯಪಟ್ಟಿದ್ದಾರೆ.

ಇನ್ನು ಸೆಹ್ವಾಗ್ ಬ್ಯಾಟಿಂಗ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಚೋಪ್ರಾ, ಆತನಲ್ಲಿ ವಿಶೇಷವಾದ ದೈರ್ಯವಿತ್ತು. ಆಕ್ರಮಣಕಾರಿಯಾಗಿ ಬ್ಯಾಟಿಂಗ್ ಮಾಡುತ್ತಿದ್ದರು. ಅದರಲ್ಲೂ ಬೌನ್ಸರ್​ ಸಿಕ್ಕರಂತು ಪ್ರತಿ ದಿಕ್ಕಿಗೂ ಬಾರಿಸುತ್ತಿದ್ದರು. ಸೆಹ್ವಾಗ್ ಏನೇ ಮಾಡಿದರೂ ಅದನ್ನು ಪ್ರಾಮಾಣಿಕವಾಗಿ ಮಾಡುತ್ತಿದ್ದರು ಎಂದಿದ್ದಾರೆ.

ಅವರಿಗೆ ಅವರ ಸಾಮರ್ಥ್ಯ ಮತ್ತು ದೌರ್ಬಲ್ಯದ ಬಗ್ಗೆ ಚೆನ್ನಾಗಿ ಗೊತ್ತಿತ್ತು. ಹೀಗಾಗಿ ಯಾವಾಗ ಹೇಗೆ ಆಡಬೇಕೆಂದು ನಿರ್ಧರಿಸುತ್ತಿದ್ದರು. ವೀರು ಆಯ್ಕೆ ಮಾಡಿಕೊಳ್ಳುವ ಶಾಟ್‌ಗಳಲ್ಲಿ ಅಪಾರವಾದ ವಿಶ್ವಾಸವನ್ನಿಡುತ್ತಿದ್ದರು ಎಂದು ಚೋಪ್ರಾ ತಿಳಿಸಿದರು.