ಫೋರ್​-ಸಿಕ್ಸ್ ಸಿಡಿಸಿ ಅತೀ ಹೆಚ್ಚು ರನ್ ಬಾರಿಸಿದ ವಿಶ್ವದ ನಂಬರ್​ 1 ಬ್ಯಾಟ್ಸ್​ಮನ್ ಯಾರು ಗೊತ್ತಾ?

ವಿಶ್ವ ಕ್ರಿಕೆಟ್​ನಲ್ಲಿ ಕೆಲ ಬ್ಯಾಟ್ಸ್​ಮನ್​ಗಳಿದ್ದಾರೆ. ಕ್ರಿಕೆಟ್ ಸ್ವರೂಪ ಬದಲಾದರೂ ಅವರ ಬ್ಯಾಟಿಂಗ್ ಅಬ್ಬರದಲ್ಲಿ ಮಾತ್ರ ಬದಲಾವಣೆ ಕಂಡು ಬರುವುದಿಲ್ಲ. ಅದು ಟೆಸ್ಟ್ ಕ್ರಿಕೆಟ್ ಆಗಿರಲಿ ಇಲ್ಲ ಒನ್​ಡೆ, ಟಿ20 ಆಗಿರಲಿ. ತಮ್ಮ ಸ್ಪೋಟಕ ಬ್ಯಾಟಿಂಗ್ ಮೂಲಕ ರಂಜಿಸಲು ಯತ್ನಿಸುತ್ತಾರೆ.

ಹೀಗೆ ಸ್ಪೋಟಕ ಆಟದ ಮೂಲಕ ಅತೀ ಹೆಚ್ಚು ರನ್ ಸಿಡಿಸಿದ ಆಟಗಾರರ ಪಟ್ಟಿಯಲ್ಲಿ ಟೀಮ್ ಇಂಡಿಯಾ ಬ್ಯಾಟ್ಸ್​ಮನ್​ಗಳಿರುವುದು ವಿಶೇಷ. ಅದರಲ್ಲೂ ಏಕದಿನ ಕ್ರಿಕೆಟ್​ನ್ನು ಟ್ವೆಂಟಿ ಮಾದರಿಯಲ್ಲಿ ಅಬ್ಬರಿಸಿ ದ್ವಿಶತಕ ಸಿಡಿಸಿದ ಇಬ್ಬರು ಭಾರತೀಯ ಬ್ಯಾಟ್ಸ್​ಮನ್​ಗಳಿದ್ದಾರೆ.

ಇವರ ಬ್ಯಾಟಿಂಗ್​ನಲ್ಲಿ ಸಿಕ್ಸ್-ಫೋರ್​ಗಳ ಸುರಿಮಳೆಯಾಗಿತ್ತು. ಹೀಗಾಗಿಯೇ ಬೌಂಡರಿ-ಸಿಕ್ಸರ್ ಮೂಲಕವೇ ಒಂದು ಇನಿಂಗ್ಸ್​ ಅತೀ ಹೆಚ್ಚು ರನ್ ಬಾರಿಸಿದ ಹೆಗ್ಗಳಿಕೆ ಇವರದ್ದಾಗಿದೆ. ಹೀಗೆ ಫೋರ್-ಸಿಕ್ಸ್ ಸಿಡಿಸುವ ಮೂಲಕ ಹೆಚ್ಚು ರನ್ ಕಲೆಹಾಕಿದ ಟೀಮ್ ಇಂಡಿಯಾದ ಇಬ್ಬರು ಆಟಗಾರರ ಪರಿಚಯ ಇಲ್ಲಿದೆ.

2. ವೀರೇಂದ್ರ ಸೆಹ್ವಾಗ್:

ಭಾರತದ ಮಾಜಿ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಈ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಸೆಹ್ವಾಗ್ ಸ್ಫೋಟಕ ಬ್ಯಾಟಿಂಗ್‌ಗೆ ಹೆಸರುವಾಸಿಯಾಗಿದ್ದರು. ಟಿ20 ಕ್ರಿಕೆಟ್ ಪರಿಚಯವಾಗುವ ಮೊದಲೇ ಅವರು ಏಕದಿನ ಅಥವಾ ಟೆಸ್ಟ್ ಪಂದ್ಯಗಳಲ್ಲಿ ಅದೇ ಶೈಲಿಯಲ್ಲಿ ಬ್ಯಾಟ್ ಬೀಸಿದ್ದರು.

ಅದರ ಪರಿಣಾಮ 2011ರ ಡಿಸೆಂಬರ್ 8 ರಂದು ಇಂದೋರ್​ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ನಡೆದ ಏಕದಿನ ಪಂದ್ಯದಲ್ಲಿ ಸೆಹ್ವಾಗ್ ದ್ವಿಶತಕ ಬಾರಿಸಿದ್ದರು. 149 ಎಸೆತಗಳನ್ನು ಎದುರಿಸಿದ್ದ ವೀರು ಈ ಪಂದ್ಯದಲ್ಲಿ 219 ರನ್ ಚಚ್ಚಿದ್ದರು.

ಈ ಇನ್ನಿಂಗ್ಸ್‌ನಲ್ಲಿ ಸೆಹ್ವಾಗ್ ಸಿಡಿಸಿದ್ದು ಬರೋಬ್ಬರಿ 25 ಬೌಂಡರಿ ಮತ್ತು 7 ಭರ್ಜರಿ ಸಿಕ್ಸರ್‌. ಅಂದರೆ 219 ರನ್​ನಲ್ಲಿ ಬರೀ ಬೌಂಡರಿ-ಸಿಕ್ಸರ್‌ಗಳ ಮೂಲಕ ಸೆಹ್ವಾಗ್ ಒಟ್ಟು 142 ರನ್ ಕಲೆ ಹಾಕಿ ಟೀಮ್ ಇಂಡಿಯಾ ಪರ ದಾಖಲೆ ಬರೆದಿದ್ದರು.

1. ರೋಹಿತ್ ಶರ್ಮಾ:

ಟೀಮ್ ಇಂಡಿಯಾದ ಆರಂಭಿಕ ಆಟಗಾರ ರೋಹಿತ್ ಶರ್ಮಾ ಏಕದಿನ ಕ್ರಿಕೆಟ್‌ನಲ್ಲಿ ಮೂರು ಬಾರಿ ದ್ವಿಶತಕದ ಈ ಸಾಧನೆ ಮಾಡಿದ್ದಾರೆ. ಅದರಲ್ಲೂ ಸಿಕ್ಸರ್-ಬೌಂಡರಿ ಮೂಲಕ ಅತೀ ಹೆಚ್ಚು ರನ್ ಕಲೆಹಾಕಿದ ವಿಶ್ವದ ನಂಬರ್ 1 ಬ್ಯಾಟ್ಸ್​ಮನ್ ಎಂಬ ಹೆಗ್ಗಳಿಕೆ ಕೂಡ ಹಿಟ್​ಮ್ಯಾನ್ ಪಾಲಾಗಿದೆ.

ನವೆಂಬರ್ 2, 2013 ರಂದು ಬೆಂಗಳೂರಿನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ನಡೆದ ಏಕದಿನ ಪಂದ್ಯದಲ್ಲಿ ರೋಹಿತ್ ಪ್ರಚಂಡ ದ್ವಿಶತಕ ಬಾರಿಸಿದರು. 158 ಎಸೆತಗಳನ್ನು ಎದುರಿಸಿದ್ದ ಹಿಟ್​ಮ್ಯಾನ್ 209 ರನ್ ಚಚ್ಚಿದ್ದರು. ಈ ಇನ್ನಿಂಗ್ಸ್‌ನಲ್ಲಿ ರೋಹಿತ್ 12 ಬೌಂಡರಿ ಮತ್ತು 16 ಸಿಕ್ಸರ್ ಸಿಡಿಸಿದ್ದರು. ಅಂದರೆ ತಮ್ಮ ದ್ವಿಶತಕದಲ್ಲಿ ಬೌಂಡರಿ-ಸಿಕ್ಸರ್‌ಗಳಿಂದ ರೋಹಿತ್ ಒಟ್ಟು 144 ರನ್ ಕಲೆ ಹಾಕಿದ್ದರು.

ಈ ದಾಖಲೆ ಬಳಿಕ ಮತ್ತೊಮ್ಮೆ ಅರ್ಭಟಿಸಿದ್ದರು ರೋಹಿತ್ ಶರ್ಮಾ. 13 ನವೆಂಬರ್ 2014 ರಂದು ಕೋಲ್ಕತ್ತಾದಲ್ಲಿ ಶ್ರೀಲಂಕಾ ವಿರುದ್ಧ ನಡೆದ ಪಂದ್ಯದಲ್ಲಿ ಹಿಟ್​ಮ್ಯಾನ್ ಬ್ಯಾಟ್​ನಿಂದ ಸಿಡಿದದ್ದು ಬರೋಬ್ಬರಿ 264 ರನ್. ಏಕದಿನ ಕ್ರಿಕೆಟ್ ಇತಿಹಾಸದಲ್ಲೇ ಇದು ಅತ್ಯಧಿಕ ಸ್ಕೋರ್.

ಈ ಇನ್ನಿಂಗ್ಸ್‌ನಲ್ಲಿ ರೋಹಿತ್ ಶರ್ಮಾ ಬರೋಬ್ಬರಿ 33 ಬೌಂಡರಿ ಮತ್ತು 9 ಸಿಕ್ಸರ್ ಸಿಡಿಸಿದ್ದರು. ಅಂದರೆ ತಮ್ಮ 264 ರನ್​ಗಳ ಇನಿಂಗ್ಸ್​ನಲ್ಲಿ ಸಿಕ್ಸರ್-ಬೌಂಡರಿ ಮೂಲಕ ಮೂಡಿ ಬಂದಿದ್ದು ಬರೋಬ್ಬರಿ 186 ರನ್​ಗಳು. ಇದು ಬ್ಯಾಟ್ಸ್​ಮನ್ ಒಬ್ಬರು ಸಿಕ್ಸ್-ಫೋರ್​ಗಳ ಮೂಲಕ ಇನಿಂಗ್ಸ್​ವೊಂದರಲ್ಲಿ ಕಲೆಹಾಕಿದ ಅತ್ಯಧಿಕ ರನ್​ ಆಗಿದೆ.