Sourav Ganguly: ಹೊಸ ಮನೆ ಖರೀದಿಸಿದ ಸೌರವ್ ಗಂಗೂಲಿ, 48 ವರ್ಷಗಳ ನಂತರ ವಿಳಾಸ ಬದಲಿಸಿದ ದಾದಾ

ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಕೋಲ್ಕತ್ತಾದಲ್ಲಿ ಹೊಸ ಮನೆ ಖರೀದಿಸಿದ್ದಾರೆ. ಗಂಗೂಲಿಯವರ ಎರಡು ಅಂತಸ್ತಿನ ಮನೆ ಕೋಲ್ಕತ್ತಾದ ಲೋವರ್ ರೋಡೆನ್ ಸ್ಟ್ರೆಚ್‌ನಲ್ಲಿದೆ.

ಗಂಗೂಲಿ ಕಳೆದ 48 ವರ್ಷಗಳಿಂದ ತಮ್ಮ ಪೂರ್ವಿಕರ ಮನೆಯಲ್ಲಿ ವಾಸಿಸುತ್ತಿದ್ದರು. ಆದರೆ ಇದೀಗ ಅವರು ತಮ್ಮ ಹೊಸ ಮನೆಗೆ ಶಿಫ್ಟ್ ಆಗಿದ್ದು ಕೋಲ್ಕತ್ತಾದಲ್ಲಿ ಅವರ ವಿಳಾಸ ಬದಲಾಗಿದೆ.

ಗಂಗೂಲಿ 40 ಕೋಟಿ ರೂ.ಗೆ ಮನೆ ಖರೀದಿಸಿದ್ದಾರೆ. ಇನ್ನು, ಹೊಸ ಮನೆಯನ್ನು ಖರೀದಿಸಿದ್ದಕ್ಕಾಗಿ ನನಗೆ ತುಂಬಾ ಸಂತೋಷವಾಗಿದೆ. ನಾನು ಆ ಮನೆಯಲ್ಲಿ ಚೆನ್ನಾಗಿ ಬದುಕಬಲ್ಲೆ. ಅದೇ ಸಮಯದಲ್ಲಿ ಕಳೆದ 48 ವರ್ಷಗಳಿಂದ ವಾಸವಾಗಿರುವ ಮನೆಯನ್ನು ಬಿಟ್ಟು ಹೋಗುವುದು ಕಷ್ಟವಾಗಿದೆ ಎಂದು ಗಂಗೂಲಿ ಹೇಳಿದ್ದಾರೆ.

ಮೂಲಗಳ ಪ್ರಕಾರ, ಗಂಗೂಲಿ ಅವರು ತಮ್ಮ ತಾಯಿ ನಿರುಪಾ ಗಂಗೂಲಿ, ಪತ್ನಿ ಡೊನ್ನಾ ಮತ್ತು ಮಗಳು ಸನಾ ಅವರೊಂದಿಗೆ ಈ ಹೊಸ ಮನೆಯಲ್ಲಿ ಇರಲಿದ್ದಾರಂತೆ. ಅಲ್ಲದೇ ಗಂಗೂಲಿ ಶೀಘ್ರದಲ್ಲೇ ಹೊಸ ಮನೆಗೆ ಶಿಫ್ಟ್ ಆಗಲಿದ್ದಾರೆ ಎಂದು ತಿಳಿದು ಬಂದಿದೆ.

ಸೌರವ್ ಗಂಗೂಲಿ ಅವರ ಕ್ರಿಕೆಟ್ ವೃತ್ತಿಜೀವನದಂತೆಯೇ, ಅವರ ಹಳೆಯ ಮನೆಯು ಅನೇಕ ಕಾರಣಗಳಿಂದ ವಿಶೇಷವಾಗಿತ್ತು. ಗಂಗೂಲಿ ಹುಟ್ಟಿದ್ದು ಇದೇ ಮನೆಯಲ್ಲಿ. ಅವರೂ ಇದೇ ಮನೆಯಲ್ಲಿ ಬೆಳೆದವರು. ಸಚಿನ್ ತೆಂಡೂಲ್ಕರ್ ಸೇರಿದಂತೆ ಟೀಂ ಇಂಡಿಯಾದ ಹಲವು ಆಟಗಾರರು ಗಂಗೂಲಿ ಅವರ ಹಳೆಯ ಮನೆಗೆ ಬಂದಿದ್ದರು.

ಇನ್ನು, ಗಂಗೂಲಿ ಟೀಂ ಇಂಡಿಯಾದ ಯಶಸ್ವಿ ನಾಯಕರಲ್ಲಿ ಒಬ್ಬರು. 2003ರ ವಿಶ್ವಕಪ್‌ನಲ್ಲಿ ಗಂಗೂಲಿ ನಾಯಕತ್ವದಲ್ಲಿ ಟೀಂ ಇಂಡಿಯಾ ಫೈನಲ್ ತಲುಪಿತ್ತು. ಗಂಗೂಲಿ ಭಾರತದ ಪರ 113 ಟೆಸ್ಟ್‌ಗಳಲ್ಲಿ 7212 ರನ್ ಮತ್ತು 311 ಏಕದಿನ ಪಂದ್ಯಗಳಲ್ಲಿ 11363 ರನ್ ಗಳಿಸಿದ್ದಾರೆ. ಅವರ ನಿವೃತ್ತಿಯ ನಂತರ, ಗಂಗೂಲಿ ಕೆಲವು ವರ್ಷಗಳ ಕಾಲ ಬಂಗಾಳ ಕ್ರಿಕೆಟ್ ಸಂಸ್ಥೆಯ ಅಧ್ಯಕ್ಷರಾಗಿದ್ದರು. ಪ್ರಸ್ತುತ ಬಿಸಿಸಿಐ ಅಧ್ಯಕ್ಷರಾಗಿದ್ದಾರೆ.