ಪಾಕಿಸ್ತಾನ ಪ್ರಧಾನಿ ಇಮ್ರಾನ್ ಖಾನ್‌ಗಿಂತ ಪಾಕ್​ ನೆಲದಲ್ಲಿ ಟೀಮ್ ಇಂಡಿಯಾದ ಈ ಬೌಲರ್ ಹೆಚ್ಚು ಖ್ಯಾತಿಗಳಿಸಿದ್ದ..!

ಅದು 2004. ಕಾರ್ಗಿಲ್ ಯುದ್ಧದ ಬಳಿಕ ಮೊದಲ ಬಾರಿಗೆ ಭಾರತ ಪಾಕ್ ನೆಲದಲ್ಲಿ ಸರಣಿಯನ್ನಾಡಲು ತೆರಳಿತ್ತು. ಸೌರವ್ ಗಂಗೂಲಿ ನೇತೃತ್ವದ ಟೀಮ್​ ಇಂಡಿಯಾ ಅನುಭವಿ-ಯುವ ಪಡೆಗಳ ಸಮ್ಮಿಲನದಿಂದ ಕೂಡಿತ್ತು.

ಇದೇ ವೇಳೆ ತಂಡದಲ್ಲಿದ್ದ ಯುವ ವೇಗಿ ಪಾಕಿಸ್ತಾನದ ಖ್ಯಾತ ಕ್ರಿಕೆಟಿಗ ಹಾಗೂ ಈಗಿನ ಪ್ರಧಾನಿ ಇಮ್ರಾನ್ ಖಾನ್​ಗಿಂತಲೂ ಪಾಕ್​ ನೆಲದಲ್ಲಿ ಪ್ರಸಿದ್ದಿ ಪಡೆದಿದ್ದನು ಎಂದು ಭಾರತ ತಂಡದ ಮಾಜಿ ವೇಗಿ ಆಶಿಶ್ ನೆಹ್ರಾ ಹೇಳಿದ್ದಾರೆ.

ಪಾಕ್​ ನೆಲದಲ್ಲಿಯೇ ಏಕದಿನ ಮತ್ತು ಟೆಸ್ಟ್ ಸರಣಿಯಲ್ಲಿ ಗೆದ್ದು ಬೀಗಿದ ಭಾರತಕ್ಕೆ ಅದು ಅವಿಸ್ಮರಣೀಯ ಕ್ಷಣವಾಗಿತ್ತು. ಈ ಸರಣಿ ಟೀಮ್ ಇಂಡಿಯಾ ಅನೇಕ ಆಟಗಾರರ ಪಾಲಿಗೆ ನೆನಪಿನ ಬುತ್ತಿ ಎನ್ನಬಹುದು.

ಮುಲ್ತಾನ್‌ನಲ್ಲಿ ಇರ್ಫಾನ್ ಪಠಾಣ್ ಅವರ ಹ್ಯಾಟ್ರಿಕ್ ಮತ್ತು ವೀರೇಂದ್ರ ಸೆಹ್ವಾಗ್ ಅವರ ಟ್ರಿಪಲ್ ಸೆಂಚುರಿ ಸೇರಿದಂತೆ ಹಲವು ದಾಖಲೆಗಳು ಮೂಡಿಬಂದಿದ್ದವು. ಅದರೊಂದಿಗೆ ಅತ್ಯಂತ ಪ್ರಭಾವಶಾಲಿಯಾಗಿ ಹೊರಹೊಮ್ಮಿದ್ದು ಲಕ್ಷ್ಮೀಪತಿ ಬಾಲಾಜಿ.

ವಿಶ್ವದ ಅತ್ಯಂತ ವೇಗದ ಬೌಲರ್ ಶೋಯೆಬ್ ಅಖ್ತರ್ ಅವರ ಎಸೆತದಲ್ಲಿ ಸಿಕ್ಸರ್ ಸಿಡಿಸಿದ್ದು, ಬ್ಯಾಟಿಂಗ್ ಮಾಡುವಾಗ ತನ್ನ ಬ್ಯಾಟ್ ಅನ್ನು ಮುರಿಯುವುದು, ಹಾಗೆಯೇ ಪ್ರತಿ ಪಂದ್ಯದಲ್ಲೂ ಅದ್ಭುತ ಬೌಲಿಂಗ್ ಮಾಡಿರುವುದು. ಆ ನಗು ಮುಖ ಎಲ್ಲವೂ ಬಾಲಾಜಿಯನ್ನು ಪಾಕ್​ ನೆಲದಲ್ಲಿ ಜನಪ್ರಿಯರನ್ನಾಗಿಸಿತು.

ಈ ಸರಣಿಯಲ್ಲಿ ಬಾಲಾಜಿ ಮೂರು ಟೆಸ್ಟ್ ಮತ್ತು ಐದು ಏಕದಿನ ಪಂದ್ಯಗಳನ್ನು ಆಡಿದ್ದರು. ಅದರಲ್ಲೂ ರಾವಲ್ಪಿಂಡಿಯಲ್ಲಿ ನಡೆದ ನಿರ್ಣಾಯಕ ಟೆಸ್ಟ್‌ನಲ್ಲಿ ಬಾಲಾಜಿ ಪಾಕಿಸ್ತಾನದ 7 ವಿಕೆಟ್ ಕಬಳಿಸಿ ಭಾರತ ಪ್ರಮುಖ ಅಸ್ತ್ರವಾಗಿ ಗುರುತಿಸಿಕೊಂಡಿದ್ದರು ಎಂದಿದ್ದಾರೆ ಆಶಿಶ್ ನೆಹ್ರಾ.

ಏಕದಿನ ಸರಣಿಯಲ್ಲಿ ಹೆಚ್ಚಾಗಿ 10 ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ್ದ ಬಾಲಾಜಿ ಅವರ ಅಂದಿನ ಸ್ಟ್ರೈಕ್ ರೇಟ್ 160.71. ಅದರಲ್ಲೂ ಕೆಳ ಕ್ರಮಾಂಕದಲ್ಲಿ 36 ಎಸೆತಗಳಲ್ಲಿ ಬಾಲಾಜಿ 45 ರನ್ ಬಾರಿಸಿದ್ದರು.

ಇದರಲ್ಲಿ ಬಾಲಾಜಿ 6 ಬೌಂಡರಿಗಳನ್ನು ಬಾರಿಸಿದ್ದರೆ, ಅಖ್ತರ್ ಹಾಗೂ ಸಮಿ ಎಸೆತಗಳಲ್ಲಿ ಎರಡು ಸಿಕ್ಸ್ ಸಿಡಿಸಿ ಎಲ್ಲರನ್ನು ನಿಬ್ಬೆರಗಾಗಿಸಿದ್ದರು. ಅವರ ಈ ಆಟ ಇಡೀ ಪಾಕಿಸ್ತಾನದಲ್ಲಿ ಜನಪ್ರಿಯತೆಯನ್ನು ತಂದುಕೊಟ್ಟಿತು.

ಎಷ್ಟರ ಮಟ್ಟಿಗೆ ಅಂದರೆ ಪಾಕ್ ಲೆಜೆಂಡ್ ಆಟಗಾರ ಇಮ್ರಾನ್ ಖಾನ್ ಅವರಿಗಿಂತಲೂ ಲಕ್ಷ್ಮೀಪತಿ ಬಾಲಾಜಿ ಪಾಕಿಸ್ತಾನದಲ್ಲಿ ಖ್ಯಾತಿ ಪಡೆಯುವಂತೆ ಮಾಡಿತ್ತು ಎಂದು ಆಶಿಶ್ ನೆಹ್ರಾ ಹೇಳಿದರು.

ಟೀಮ್ ಇಂಡಿಯಾ ಪರ 8 ಟೆಸ್ಟ್ ಪಂದ್ಯವನ್ನಾಡಿದ ಬಾಲಾಜಿ 27 ವಿಕೆಟ್ ಉರುಳಿಸಿದ್ದಾರೆ. ಹಾಗೆಯೇ 30 ಏಕದಿನ ಪಂದ್ಯಗಳಿಂದ 34 ವಿಕೆಟ್ ಕಬಳಿಸಿದ್ದಾರೆ.

ಬಾಲಾಜಿ 5 ಟಿ20 ಪಂದ್ಯಗಳನ್ನು ಸಹ ಆಡಿದ್ದು ಇದರಲ್ಲಿ 10 ವಿಕೆಟ್ ಪಡೆದು ಮಿಂಚಿದ್ದಾರೆ.