ಲವ್ಲಿನಾ ಬಾಕ್ಸಿಂಗ್ ಗ್ಲೌವ್ಸ್​ಗೆ ಭರ್ಜರಿ ಬೇಡಿಕೆ; ಪಿಎಂಗೆ ಕ್ರೀಡಾಪಟುಗಳು ಕೊಟ್ಟ ಗಿಫ್ಟ್​ಗಳ ಹರಾಜು

ಟೋಕಿಯೋ ಒಲಿಂಪಿಕ್ಸ್ ಮತ್ತು ಪ್ಯಾರಾಲಿಂಪಿಕ್ಸ್ ಕ್ರೀಡಾಕೂಟಗಳಲ್ಲಿ ಭಾರತೀಯ ಕ್ರೀಡಾಪಟುಗಳು ಅದ್ವಿತೀಯ ಸಾಧನೆ ಮಾಡಿದ್ಧಾರೆ. ಪದಕ ಗೆದ್ದ ಕ್ರೀಡಾಪಟುಗಳೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಭೇಟಿ ಮಾಡಿ ಸಂವಾದ ನಡೆಸಿದರು. ಈ ವೇಳ, ಕೆಲ ಕ್ರೀಡಾಪಟುಗಳು ಪ್ರಧಾನಿಗೆ ಗಿಫ್ಟ್ಗಳನ್ನ ನೀಡಿದರು. ಪ್ರಧಾನಿ ಆದ ಬಳಿಕ ತಮಗೆ ಬಂದ ಉಡುಗೊರೆಗಳನ್ನ ಹರಾಜಿಗೆ ಇಟ್ಟು ಅದರಿಂದ ಬರುವ ಹಣವನ್ನು ಪಿಎಂ ಕೇರ್ ಫಂಡ್ಗೆ ಬಳಸುವ ಸಂಪ್ರದಾಯವನ್ನು ಮೋದಿ ಬೆಳೆಸಿಕೊಂಡಿದ್ದಾರೆ. ಅದರಂತೆ ಒಲಿಂಪಿಕ್ಸ್ ಸ್ಟಾರ್ಗಳು ಕೊಟ್ಟ ಉಡುಗೊರೆಯೂ ಹರಾಜಿಗೆ ಇಡಲಾಗಿದೆ. ಅಕ್ಟೋಬರ್ 7ರವರೆಗೂ ಈ ವಿಶೇಷ ವಸ್ತುಗಳಿಗೆ ಬಿಡ್ಡಿಂಗ್ ಚಾಲನೆಯಲ್ಲಿರುತ್ತದೆ. ಯಾವ್ಯಾವ ವಸ್ತುಗಳಿಗೆ ಸದ್ಯ ಎಷ್ಟು ಬಿಡ್ ನಡೆದಿದೆ ಎಂಬ ಮಾಹಿತಿ ಇಲ್ಲಿದೆ.

Boxing Gloves- ಟೋಕಿಯೋ ಒಲಿಂಪಿಕ್ಸ್​ನಲ್ಲಿ ಕಂಚಿನ ಪದಕ ಪಡೆದ ಲವ್ಲಿನಾ ಬೋರ್ಗೋಹೇನ್ ಅವರು ತಮ್ಮ ಬಾಕ್ಸಿಂಗ್ ಗ್ಲೋವ್​ಗಳನ್ನ ಪ್ರಧಾನಿಗೆ ಉಡುಗೊರೆಯಾಗಿ ನೀಡಿದ್ದರು. ಇದೇ ಗ್ಲೌಸ್ ಬಳಸಿ ಅವರು ಒಲಿಂಪಿಕ್ಸ್​ನಲ್ಲಿ ಸೆಣಸಿದ್ದರು. ಈ ಗ್ಲೌಸ್​ನಲ್ಲಿ ಅವರ ಸಹಿಯೂ ಇದೆ. ಹರಾಜಿನಲ್ಲಿ ಈ ಗ್ಲೌಸ್​ಗೆ ಮೂಲಬೆಲೆಯಾಗಿ 80 ಲಕ್ಷ ಇಡಲಾಗಿದೆ. ಸದ್ಯ ಇದಕ್ಕೆ 1.92 ಕೋಟಿ ರೂಗೆ ಗರಿಷ್ಠ ಬಿಡ್ಡಿಂಗ್ ಆಗಿದೆ.

Neeraj’s Javelin- ನೀರಜ್ ಚೋಪ್ರಾ ಅವರಿಗೆ ಚಿನ್ನದ ಪದಕ ತಂದುಕೊಟ್ಟ ಜಾವೆಲಿನ್ (ಭರ್ಜಿ) ಇದೀಗ ಹರಾಜಿನಲ್ಲಿ ಪ್ರಮುಖ ಆಕರ್ಷಣೆ ಆಗಿದೆ. ಮೂಲ ಬೆಲೆ 1 ಕೋಟಿ ರೂ ಇದೆ. ಸದ್ಯ ಇದಕ್ಕೆ 1.55 ಕೋಟಿ ರೂ ಬಿಡ್ ಆಗಿದೆ.

Sumit Antil’s Javelin- ಟೋಕಿಯೋ ಪ್ಯಾರಾಲಿಂಪಿಕ್ಸ್ನಲ್ಲಿ ಚಿನ್ನದ ಪದಕ ಗೆದ್ದ ಜಾವೆಲಿನ್ ಪಟು ಸುಮಿತ್ ಅಂತಿಲ್ ಅವರು ವಿಶ್ವದಾಖಲೆಯನ್ನೂ ಬರೆದಿದ್ದಾರೆ. ಇವರು ತಮ್ಮ ಬರ್ಜಿಯನ್ನು ಪ್ರಧಾನಿಗೆ ಗಿಫ್ಟ್ ಆಗಿ ನೀಡಿದ್ಧಾರೆ. ಹರಾಜಿನಲ್ಲಿ ಈ ಜಾವೆಲಿನ್ನ ಮೂಲ ಬೆಲೆ 1 ಕೋಟಿ ರೂ ಇದೆ. ಸದ್ಯ 8 ಸಾವಿರ ರೂ ಹೆಚ್ಚುವರಿ ಬಿಡ್ಡಿಂಗ್ ಆಗಿದೆ.

Women’s hockey stick- ಟೋಕಿಯೋ ಒಲಿಂಪಿಕ್ಸ್ನಲ್ಲ ಭಾರತದ ಮಹಿಳಾ ಹಾಕಿ ತಂಡ ಕೆಚ್ಚೆದೆಯ ಪ್ರದರ್ಶನ ತೋರಿ ನಾಲ್ಕನೇ ಸ್ಥಾನ ಪಡೆದಿತ್ತು. ಸ್ವಲ್ಪದರಲ್ಲೇ ಕಂಚಿನ ಪದಕ ಮಿಸ್ ಆಗಿತ್ತು. ಇದೀಗ ಇಡೀ ಹಾಕಿ ತಂಡದ ಆಟಗಾರ್ತಿಯರು ಸಹಿ ಹಾಕಿದ ಹಾಕಿ ಸ್ಟಿಕ್ವೊಂದನ್ನು ಪ್ರಧಾನಿಗೆ ಉಡುಗೊರೆಯಾಗಿ ನೀಡಿದ್ದಾರೆ. ರಕ್ಷಕ್ ಬ್ರ್ಯಾಂಡ್ನ ಈ ಹಾಕಿ ಸ್ಟಿಕ್ನ ಮಾಡೆಲ್ ಹೆಸರು ರಾಣಿ 28 ಎಂದಿದೆ. ರಾಣಿ ಎಂದರೆ ಇಲ್ಲಿ ಟೀಮ್ ಇಂಡಿಯಾ ನಾಯಕಿ ರಾಣಿ ರಾಮಪಾಲ್ ಅವರ ಹೆಸರಾಗಿದೆ. ಈ ಅಮೂಲ್ಯವಾದ ಹಾಕಿ ಸ್ಟಿಕ್ ಅನ್ನು ಹರಾಜಿನಲ್ಲಿ ಮೂಲಬೆಲೆಯಾಗಿ 80 ಲಕ್ಷ ರೂ ನಿಗದಿ ಮಾಡಲಾಗಿದೆ. ಈಗಾಗಲೇ ಅದಕ್ಕೆ 1 ಕೋಟಿಗೆ ಬಿಡ್ ಆಗಿದೆ. ಮುಂದಿನ ದಿನಗಳಲ್ಲಿ ಇದು ಇನ್ನೂ ಹೆಚ್ಚಾಗುವ ಸಾಧ್ಯತೆ ಇದೆ.

PV Sindhu’s Badminton Racquet Bag- ಸತತ ಎರಡು ಒಲಿಂಪಿಕ್ಸ್ಗಳಲ್ಲಿ ಪದಕ ಗೆದ್ದು ಇತಿಹಾಸ ಸೃಷ್ಟಿಸಿದ ಬ್ಯಾಡ್ಮಿಂಟನ್ ಆಟಗಾರ್ತಿ ಪಿ ವಿ ಸಿಂಧು ಅವರು ಬ್ಯಾಡ್ಮಿಂಟನ್ ರಾಕೆಟನ್ನು ಪ್ರಧಾನಿಗೆ ಗಿಫ್ಟ್ ಆಗಿ ನೀಡಿದ್ದರು. ಹರಾಜಿನಲ್ಲಿ ಅದರ ಮೂಲ ಬೆಲೆ 80 ಲಕ್ಷಕ್ಕೆ ನಿಗದಿಯಾಗಿದೆ. ಈಗಾಗಲೇ ಅದಕ್ಕೆ 90 ಲಕ್ಷ ರೂ ಬಿಡ್ಡಿಂಗ್ ಪಡೆದಿದೆ.

Pramod Bhagat’s Badminton Racquet- ಟೋಕಿಯೋ ಪ್ಯಾರಾಲಿಂಪಿಕ್ಸ್ನಲ್ಲಿ ಬ್ಯಾಡ್ಮಿಂಟನ್ನಲ್ಲಿ ಚಿನ್ನದ ಪದಕ ಗೆದ್ದ ಪ್ರಮೋದ್ ಭಗತ್ ಅವರು ಉಪಯೋಗಿಸಿದ್ದ ಬ್ಯಾಡ್ಮಿಂಟನ್ ರಾಕೆಟ್ ಇದು. ಇದರ ಮೂಲ ಬೆಲೆ 80 ಲಕ್ಷ ರೂ ಇದೆ. ಸದ್ಯ 90 ಲಕ್ಷಕ್ಕೆ ಬಿಡ್ ಆಗಿದೆ.

Olympics Star’s signatures- ಟೋಕಿಯೋ ಒಲಿಂಪಿಕ್ ಕ್ರೀಡಾಕೂಟದಲ್ಲಿ ಪದಕ ಗೆದ್ದ ಕ್ರೀಡಾಪಟುಗಳೆಲ್ಲರೂ ಸಹಿ ಹಾಕಿದ ಫಲಕವನ್ನು ಪ್ರಧಾನಿಗೆ ಗಿಫ್ಟ್ ನೀಡಿದ್ದರು. ಅದನ್ನ ಹರಾಜಿಗೆ ಇಡಲಾಗಿದ್ದು, 90 ಲಕ್ಷ ನಿಗದಿ ಮಾಡಲಾಗಿದೆ.

Indian Men’s hockey stick- ನಾಲ್ಕು ದಶಕಗಳ ಬಳಿಕ ಭಾರತಕ್ಕೆ ಒಲಿಂಪಿಕ್ಸ್ ಹಾಕಿಯಲ್ಲಿ ಪದಕವೊಂದು ಸಿಕ್ಕಿತು. ಜರ್ಮನಿ ವಿರುದ್ಧ ರೋಚಕ ಗೆಲುವು ಪಡೆದು ಭಾರತದ ಪುರುಷರ ಹಾಕಿ ತಂಡ ಕಂಚಿನ ಪದಕ ಜಯಿಸಿತು. ತಂಡದ ಎಲ್ಲಾ ಆಟಗಾರರು ಸಹಿ ಹಾಕಿದ ಹಾಕಿ ಸ್ಟಿಕ್ ಪ್ರಧಾನಿಗೆ ಉಡುಗೊರೆ ಕೊಟ್ಟಿದ್ಧಾರೆ. ಅದರ ಹರಾಜಿನಲ್ಲಿ ಮೂಲ ಬೆಲೆ 80 ಲಕ್ಷ ರೂ ಇದೆ.

Krishna Nagar’s Badminton Racquet- ಟೋಕಿಯೋ ಪ್ಯಾರಾಲಿಂಪಿಕ್ಸ್ ಬ್ಯಾಡ್ಮಿಂಟನ್ನಲ್ಲಿ ಚಿನ್ನದ ಪದಕ ಪಡೆದ ಕೃಷ್ಣ ನಾಗರ್ ಅವರ ಬ್ಯಾಡ್ಮಿಂಟನ್ ರಾಕೆಟ್ ಇದು. ಹರಾಜಿನಲ್ಲಿ ಇದರ ಮೂಲ ಬೆಲೆ 80 ಲಕ್ಷ ರೂ ಇದೆ.