IPL 2023 Mini Auction: ಡಿಸೆಂಬರ್​ 23ಕ್ಕೆ ಐಪಿಎಲ್​ 2023 ಮಿನಿ ಹರಾಜು, 991 ಆಟಗಾರರಿಂದ ಅರ್ಜಿ ಸಲ್ಲಿಕೆ!

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್ 16 ಮಿನಿ ಹರಾಜು ಡಿಸೆಂಬರ್ 23 ರಂದು ಕೇರಳದ ಕೊಚ್ಚಿನ್​ನಲ್ಲಿ ನಡೆಯಲಿದೆ. ಈ ಹರಾಜಿಗಾಗಿ ಒಟ್ಟು 991 ಆಟಗಾರರು ಹೆಸರು ನೋಂದಾಯಿಸಿಕೊಂಡಿದ್ದಾರೆ.

ಹೆಸರು ನೊಂದಾಯಿಸಿಕೊಂಡಿರವವರಲ್ಲಿ 714 ಭಾರತೀಯ ಆಟಗಾರರಿದ್ದರೆ, 277 ವಿದೇಶಿ ಆಟಗಾರರಿದ್ದಾರೆ. ಡಿಸೆಂಬರ್‌ 23ರಂದು ಕೇರಳದ ಕೊಚ್ಚಿಯಲ್ಲಿ ಐಪಿಎಲ್‌ ಆಟಗಾರರ ಹರಾಜು ಪ್ರಕ್ರಿಯೆ ನಡೆಸುತ್ತಿರುವುದಾಗಿ ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಗುರುವಾರ (ಡಿಸೆಂಬರ್‌ 1) ಅಧಿಕೃತವಾಗಿ ಘೋಷಣೆ ಮಾಡಿದೆ.

ಇದು ಸಣ್ಣ ಮಟ್ಟದ ಹರಾಜು ಪ್ರಕ್ರಿಯೆ ಆದ ಕಾರಣ ಫ್ರಾಂಚೈಸಿಗಳು ತಮ್ಮ ತಮ್ಮ ತಂಡಗಳಲ್ಲಿ ಖಾಲಿ ಇರುವ ಜಾಗಗಳನ್ನು ಭರ್ತಿ ಮಾಡಲಷ್ಟೇ ಪ್ರಯತ್ನ ನಡೆಸಲಿವೆ.

ಆದರೂ ಹೆಚ್ಚಿನ ಆಟಗಾರರ ಖರೀದಿ ಕಡೆಗೆ ಕಣ್ಣಿಟ್ಟಿರುವ ಪಂಜಾಬ್‌ ಕಿಂಗ್ಸ್‌ ಮತ್ತು ಸನ್‌ರೈಸರ್ಸ್‌ ಹೈದರಾಬಾದ್‌ ತಂಡಗಳ ಖಾತೆಯಲ್ಲಿ ಹೆಚ್ಚು ಹಣವಿದೆ.

ಅರ್ಜಿ ಸಲ್ಲಿಸಿರುವ 991 ಆಟಗಾರರ ಪೈಕಿ 185 ಆಟಗಾರರು ಈಗಾಗಗಲೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಡಿದ್ದು, 786 ಆಟಗಾರರು ಈವರೆಗೆ ರಾಷ್ಟ್ರೀಯ ತಂಡಗಳಲ್ಲಿ ಕಾಣಿಸಿಕೊಂಡಿಲ್ಲ. ಅಸೋಸಿಯೇಟ್‌ ರಾಷ್ಟ್ರಗಳಿಂದ 20 ಆಟಗಾರರ ಅರ್ಜಿ ಬಂದಿದೆ.

ಇನ್ನು 277 ವಿದೇಶಿ ಆಟಗಾರರ ಪೈಕಿ, ಆಸ್ಟ್ರೇಲಿಯಾದಿಂದಲೇ ಒಟ್ಟಾರೆ 57 ಆಟಗಾರರು ಅರ್ಜಿ ಸಲ್ಲಿಸಿದ್ದಾರೆ.

ಅಫಘಾನಿಸ್ತಾನ: 14, ಆಸ್ಟ್ರೇಲಿಯಾ: 57, ಬಾಂಗ್ಲಾದೇಶ: 06, ಇಂಗ್ಲೆಂಡ್‌: 31, ಐರ್ಲೆಂಡ್‌: 08, ನಮಿಬಿಯಾ: 05, ನೆದರ್ಲೆಂಡ್ಸ್‌: 07, ನ್ಯೂಜಿಲೆಂಡ್‌: 27, ಸ್ಕಾಟ್ಲೆಂಡ್‌: 02, ದಕ್ಷಿಣ ಆಫ್ರಿಕಾ: 52, ಶ್ರೀಲಂಕಾ: 23, ಯುಎಇ: 06, ವೆಸ್ಟ್‌ ಇಂಡೀಸ್‌: 33, ಜಿಂಬಾಬ್ವೆ: 06 ಆಟಗಾರರು ಹೆಸರು ನೊಂದಾಯಿಸಿಕೊಂಡಿದ್ದಾರೆ.

ಭಾರತದ ಪರ ಆಡಿದ 19 ಆಟಗಾರರು ಹಾಗೂ ರಾಷ್ಟ್ರೀಯ ತಂಡದ ಪರ ಆಡದ ಐಪಿಎಲ್​ನಲ್ಲಿ ಆಡಿದ 91 ಭಾರತೀಯರಿದ್ದಾರೆ. ಇನ್ನು ಚೊಚ್ಚಲ ಐಪಿಎಲ್ ಅವಕಾಶಕ್ಕಾಗಿ 604 ಭಾರತೀಯ ಆಟಗಾರರು ಹೆಸರು ನೋಂದಾಯಿಸಿಕೊಂಡಿದ್ದಾರೆ.