Walking Tree: ಇದು 1300 ವರ್ಷಕ್ಕಿಂತ ಹಿಂದಿನ ನಡೆದಾಡುವ ಮಾವಿನ ಮರ!

ನೀವು ವಿವಿಧ ಮರಗಳನ್ನು ನೋಡಿರುತ್ತೀರಿ. ನೂರಾರು ವರ್ಷಗಳಷ್ಟು ಹಳೆಯದಾದ ಬೃಹತ್ ಮರಗಳನ್ನು ಸಹ ನೋಡಿರಬಹುದು. ಆದರೆ ಚಲಿಸುವ ಮರವನ್ನು ಎಂದಾದರೂ ನೋಡಿದ್ದೀರಾ? ಇಲ್ಲಿದೆ ನೋಡಿ ಹೀಗೊಂದು ವಿಶೇಷ ಮರ.

ಒಂದೆಡೆ ಗಿಡ ನೆಟ್ಟರೆ ಅಲ್ಲೇ ಉಳಿಯುತ್ತದೆ. ಅಲ್ಲೇ ಮರವಾಗಿ ಬೆಳೆಯುತ್ತದೆ. ಯಾರೂ ಹಾನಿ ಮಾಡದಿದ್ದರೆ ಮರ ಅಲ್ಲಿಂದ ಒಂದು ಇಂಚು ಕೂಡ ಅತ್ತಿತ್ತ ಚಲಿಸುವುದಿಲ್ಲ. ಆದರೆ ಗುಜರಾತ್ ನಲ್ಲಿ ಮಹಾವೃಕ್ಷವೊಂದು ಚಲಿಸುತ್ತಿದೆ!

ಗುಜರಾತಿನ ವಲ್ಸಾದ್ ಜಿಲ್ಲೆಯ ಉಮರ್ಗಾಮ್ ತಾಲೂಕಿನ ಸಂಜನ್ ಗ್ರಾಮದಲ್ಲಿದೆ ಈ ಅದ್ಭುತವಾದ ಚಲಿಸುವ ಮಾವಿನ ಮರ. ಈ ಮರ ಸಾವಿರ ವರ್ಷಗಳಿಗಿಂತ ಹೆಚ್ಚು ಹಳೆಯದಂತೆ!

ಈ ಮಾವಿನ ಮರವು ಗುಜರಾತ್ನ 50 ಪಾರಂಪರಿಕ ಮರಗಳಲ್ಲಿ ಒಂದಾಗಿದೆ. ಹೀಗಾಗಿ ಅಧಿಕಾರಿಗಳು ಈ ಮಾವಿನ ಮರದ ರಕ್ಷಣೆಗೆ ವಿಶೇಷ ಮುತುವರ್ಜಿ ನಡೆಸುತ್ತಿದ್ದಾರೆ. ದೇಶಾದ್ಯಂತದ ಅನೇಕ ಪ್ರವಾಸಿಗರು ವಲ್ಸಾದ್ ಜಿಲ್ಲೆಗೆ ಆಗಮಿಸಿ ಪೌರಾಣಿಕ ಮಾವಿನ ಮರದ ದರ್ಶನ ಮಾಡುತ್ತಾರೆ.

ಸಂಜನ್ ಹಳ್ಳಿಗರ ಪ್ರಕಾರ ಕಳೆದ ಎರಡು ಶತಮಾನಗಳಲ್ಲಿ ಈ ಮಾವಿನ ಮರವು ತನ್ನ ಮೂಲ ಸ್ಥಳದಿಂದ ಸುಮಾರು 200 ಮೀಟರ್ ದೂರಕ್ಕೆ ಚಲಿಸಿದೆಯಂತೆ!

ಆದರೆ ಮರದ ಮುಖ್ಯ ಕಾಂಡದಿಂದ ಕೊಂಬೆಗಳು ನೆಲಕ್ಕೆ ಸಮಾನಾಂತರವಾಗಿ ಬೆಳೆಯುತ್ತಿವೆ. ಹೀಗಾಗಿ ಈ ಮರ ನಡೆದಾಡುತ್ತಿರುವಂತೆ ಭಾಸವಾಗುತ್ತದೆ.

1300 ವರ್ಷಗಳ ಹಿಂದೆ ನಮ್ಮ ದೇಶಕ್ಕೆ ಬಂದ ಮೊದಲ ಪಾರ್ಸಿ ವಸಾಹತುಗಾರರು ಸಂಜನ್ ಗ್ರಾಮದಲ್ಲಿ ಈ ಮರವನ್ನು ನೆಟ್ಟರು. 936 ರಲ್ಲಿ ಗುಜರಾತ್ನಲ್ಲಿ ಆಶ್ರಯ ಪಡೆದ ಝೋರಾಸ್ಟ್ರಿಯನ್ ನಿರಾಶ್ರಿತರು ಕರಾವಳಿ ಪ್ರದೇಶದಲ್ಲಿ ಸಂಜನ್ ಗ್ರಾಮವನ್ನು ಸ್ಥಾಪಿಸಿದರು ಎಂದು ಸ್ಥಳೀಯರು ಹೇಳುತ್ತಾರೆ.

ಈ ಪುರಾತನ ಮಾವಿನ ಮರವು ಸಂಜಾನ್ ಎಂಬ ಹಳ್ಳಿಯ ವಾಲಿ ಅಹ್ಮದ್ ಅಚ್ಚು ಎಂಬ ರೈತರ ಜಮೀನಿನಲ್ಲಿದೆ. ಈ ಹಳೆಯ ಮಾವಿನ ಮರವು ಪೂರ್ವಾಭಿಮುಖವಾಗಿ ಚಲಿಸುತ್ತಿದೆ ಎಂದು ಸ್ಥಳೀಯರು ಹೇಳುತ್ತಾರೆ. ಸ್ಥಳೀಯ ನಿವಾಸಿಗಳು ಈ ಮಾವಿನ ಮರವನ್ನು ಬಹಳ ಪವಿತ್ರವೆಂದು ಪರಿಗಣಿಸಿ ಪೂಜಿಸುತ್ತಾರೆ. ಹಿಂದೂಗಳ ಮನೆಗಳಲ್ಲಿ ತುಳಸಿಯನ್ನು ಹೇಗೆ ಪೂಜಿಸುತ್ತಾರೋ.ಇಲ್ಲಿ ಈ ಮಾವಿನ ಮರವನ್ನೂ ಅದೇ ರೀತಿಯಲ್ಲಿ ಗೌರವಿಸಲಾಗುತ್ತಿದೆ.