Viral News: ನಿಮ್ಮ ಮನೆಯ ನಾನ್‌ವೆಜ್‌ ಅಡುಗೆ ವಾಸನೆ ಸಹಿಸೋಕೆ ಆಗ್ತಿಲ್ಲ! ಪಕ್ಕದ ಮನೆಯವರಿಗೆ ಪತ್ರ ಬರೆದ ಸಸ್ಯಾಹಾರಿ ಕುಟುಂಬ

ಸಸ್ಯಾಹಾರಿಗಳು ಮತ್ತು ಮಾಂಸಾಹಾರಿಗಳ ನಡುವೆ ಆರೋಗ್ಯಕರ ಜೀವನಶೈಲಿಯ ಬಗ್ಗೆ ವರ್ಷಗಳಿಂದ ಚರ್ಚೆ ನಡೆಯುತ್ತಿದೆ. ಆದರೆ ಆಸ್ಟ್ರೇಲಿಯಾದ ಪರ್ತ್‌ನಲ್ಲಿರುವ ಕುಟುಂಬವೊಂದು ಈ ಚರ್ಚೆಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ. (ಸಾಂದರ್ಭಿಕ ಚಿತ್ರ)

ಬರ್ನ್ಸ್ ಬೀಚ್​ನಲ್ಲಿರುವ ಕುಟುಂಬವೊಂದು ನೆರೆ ಮನೆಯವರಿಗೆ ಪತ್ರ ಬರೆದು ಅಡುಗೆ ಮಾಡುವಾಗ ಕಿಟಕಿಗಳನ್ನು ಮುಚ್ಚುವಂತೆ ಕೇಳಿಕೊಂಡಿದೆ. ಏಕೆಂದರೆ ಸಸ್ಯಾಹಾರಿ ಜೀವನಶೈಲಿಯನ್ನು ಅನುಸರಿಸುವ ಕುಟುಂಬ ಸದಸ್ಯರಿಗೆ ಮಾಂಸದ ಅಡುಗೆಯ ವಾಸನೆಯು ಆನಾರೋಗ್ಯ ಹಾಗೂ   ಅನಾನುಕೂಲವನ್ನುಂಟು ಮಾಡುತ್ತಿದೆ ಎಂದು ಪತ್ರದಲ್ಲಿ ಉಲ್ಲೇಖಿಸಿದೆ. (Credits: Twitter/@perthnow

' ದಯವಿಟ್ಟು ಈ ವಿಷಯವನ್ನು ಗಂಭೀರವಾಗಿ ತೆಗೆದುಕೊಳ್ಳಿ' ಎಂದು ಪತ್ರದ ಮುಂಭಾಗದಲ್ಲಿ ಬರೆಯಲಾಗಿದೆ. ಈ ಮನವಿ ಪತ್ರವನ್ನು ನೋಡಿದ ನೆರೆ ಮನೆಯವರು ದಿಗ್ಭ್ರಮೆಗೊಂಡಿದ್ದಾರೆ. (ಸಾಂದರ್ಭಿಕ ಚಿತ್ರ)

ನ್ಯೂಸ್ ಪೋರ್ಟಲ್ ಪರ್ತ್ ನೌ ಈ ಪತ್ರವನ್ನು ಫೇಸ್​ಬುಕ್​ನಲ್ಲಿ ಪೋಸ್ಟ್ ಮಾಡಿದೆ. ಇದರ ಪ್ರಕಾರ “ ಹಲೋ ನೇಬರ್, ನೀವು ಅಡುಗೆ ಮಾಡುವಾಗ ನಿಮ್ಮ ಅಡುಗೆ ಮನೆಯ ಕಿಟಕಿಯನ್ನು ದಯವಿಟ್ಟು ಮುಚ್ಚಿ. ನನ್ನ ಕುಟುಂಬದವರು ಸಸ್ಯಾಹಾರಿಗಳು. ನೀವು ಬೇಯಿಸುವ ಮಾಂಸದ ವಾಸನೆ ಸಹಿಸಲು ಆಗುತ್ತಿಲ್ಲ ಮತ್ತು ಅನಾರೋಗ್ಯ  ಉಂಟುಮಾಡುತ್ತಿದೆ. ನಮ್ಮ ಕಷ್ಟವನ್ನು ನೀವು ಅರ್ಥಮಾಡಿಕೊಳ್ಳಬಹುದು ಎಂದು ಭಾವಿಸುತ್ತೇವೆ. ಧನ್ಯವಾದಗಳು." ಎಂದು ಬರೆದಿರುವ ಪತ್ರವನ್ನು ಹೇ ಪರ್ತ್ ಫೇಸ್‌ಬುಕ್ ಪುಟದಲ್ಲಿ ಹಂಚಿಕೊಳ್ಳಲಾಗಿದೆ. ಆದರೆ ನಂತರ ಅದನ್ನು ಡಿಲೀಟ್ ಮಾಡಲಾಗಿದೆ. ಆದರೂ ಇದು ಸಿಕ್ಕಾಪಟ್ಟೆ ವೈರಲ್ ಆಗಿದೆ. (Credits: Twitter/@perthnow

ಈ ಪತ್ರವು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಬಿಸಿಬಿಸಿ ಚರ್ಚೆಯನ್ನು ಹುಟ್ಟುಹಾಕಿದೆ. ಅನೇಕರು ಸಸ್ಯಾಹಾರಿ ಕುಟುಂಬದ ವಿನಂತಿಯನ್ನು ಅಸಮಂಜಸವೆಂದು ಟೀಕಿಸಿದ್ದಾರೆ. (ಸಾಂದರ್ಭಿಕ ಚಿತ್ರ)

'' ನಾವೆಲ್ಲರೂ ಆ ಮನೆಯ ಸುತ್ತಲೂ ಹೋಗಿ ಮಾಂಸದ ಅಡುಗೆಯ ಪಾರ್ಟಿ ಮಾಡೋಣವೆ? 100 ಜನರನ್ನು ಸೇರಿಸಿ, ಬಿರುಗಾಳಿ ಎಬ್ಬಿಸೋಣ'' ಎಂದು ಪತ್ರಕ್ಕೆ ಪ್ರತಿಕ್ರಿಯೆಯಾಗಿ ವ್ಯಕ್ತಿಯೊಬ್ಬ ಆಕ್ರೋಶದ ಕಮೆಂಟ್ ಮಾಡಿದ್ದಾರೆ.

ಮತ್ತೊಬ್ಬ ನೆಟ್ಟಿಗ, " ಸಸ್ಯಾಹಾರಿ ಜೀವನಶೈಲಿ ಪರಿಸರಕ್ಕೆ ಹಾನಿಕರ ಎಂದು ಹೇಳಿದ್ದಾರೆ. ಸಸ್ಯಾಹಾರಿಗಳಿಗೆ ಅವರು ಮಾಡುತ್ತಿರುವ ಹಾನಿಯ ಬಗ್ಗೆ ತಿಳಿಸಬೇಕಿದೆ. ಸಸ್ಯಾಹಾರಿಗಳು ಭೂಮಿಯ ಮೇಲೆ ಆಮ್ಲಜನಕ ಉತ್ಪಾದಿಸುವ ಸಸ್ಯಗಳನ್ನು ತಿನ್ನುತ್ತಾರೆ, ಆದ್ದರಿಂದ ಸಸ್ಯಾಹಾರಿಗಳು ಇದನ್ನು ಮುಂದುವರೆಸಿದರೆ, ಅವರು ಪ್ರಾಣಿಗಳು ಸೇರಿದಂತೆ ನಮ್ಮೆಲ್ಲರನ್ನೂ ಕೊಲ್ಲುತ್ತಾರೆ  '"ಎಂದಿದ್ದಾರೆ. (ಸಾಂದರ್ಭಿಕ ಚಿತ್ರ)