Vaikuntha Ekadashi: ವೈಕುಂಠ ಏಕಾದಶಿ ದಿನ ಮನೆಯಲ್ಲೇ ಕುಳಿತು ಮಾಡಿ ತಿರುಪತಿ ತಿಮ್ಮಪ್ಪನ ದರ್ಶನ!

ಕಲಿಯುಗ ವೈಕುಂಠಾಧಿಪತಿ ಶ್ರೀವೆಂಕಟೇಶ್ವರ ಸ್ವಾಮಿ ಕ್ಷೇತ್ರದಲ್ಲಿ ವೈಕುಂಠ ಏಕಾದಶಿಯನ್ನು ಅದ್ಧೂರಿಯಾಗಿ ನಡೆಸಲಾಗಿದೆ. ತಿರುಮಲ ದೇವಾಲಯವನ್ನು ಹೂವುಗಳು ಮತ್ತು ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿತ್ತು. ಇಂದು ದೇವಸ್ಥಾನದ ಉತ್ತರ ವೈಕುಂಠದ ದ್ವಾರದ ಮೂಲಕ ಭಕ್ತರಿಗೆ ದರ್ಶನಕ್ಕೆ ಅವಕಾಶ ನೀಡಲಾಗಿತ್ತು.

ತಿರುಮಲ ತಿರುಪತಿ ದೇವಸ್ಥಾನ ಕಮಿಟಿ (ಟಿಟಿಡಿ) ಜನವರಿ 2 ರಿಂದ 11 ರವರೆಗೆ ವೈಕುಂಠ ದ್ವಾರ ಮೂಲಕ ದರ್ಶನ ಭಾಗ್ಯ ನೀಡುತ್ತಿದೆ. ಇದರ ಅಂಗವಾಗಿ ಹೆಚ್ಚು ಜನ ಸಾಮಾನ್ಯ ಭಕ್ತರ ದರ್ಶನ ಪಡೆಯಲು ವಿಶೇಷ ಕ್ರಮಗಳನ್ನು ಕೈಗೊಳ್ಳಲಾಗಿತ್ತು. ಈ ದರ್ಶನಕ್ಕೆ ಡಿ.24 ರಿಂದ 300 ರೂಪಾಯಿ ಟಿಕೆಟ್ ಬಿಡುಗಡೆ ಮಾಡಲಾಗಿದೆ.

ಇಂದು ವೈಕುಂಠ ಏಕಾದಶಿ ಮತ್ತು ಜನವರಿ 3 ರಂದು ವೈಕುಂಠ ದ್ವಾದಶಿ ಇರುವುದರಿಂದ ಸಾಮಾನ್ಯ ಭಕ್ತರು ವೈಕುಂಠ ದ್ವಾರದ ಮೂಲಕ ದರ್ಶನ ಪಡೆಯಬೇಕು ಎಂಬ ಕಾರಣದಿಂದ ಟಿಟಿಡಿ ಎಲ್ಲಾ ವಿಶೇಷ ಸವಲತ್ತು ಹಾಗೂ ವಿಶೇಷ ದರ್ಶನ ಶಿಫಾರಸುಗಳನ್ನು ರದ್ದುಗೊಳಿಸಿದೆ.

ಮಾರ್ಗಶಿರ ಮಾಸ ಹಿಂದೂ ಧರ್ಮದ ಚಾಂದ್ರಮಾನ ಪಂಚಾಂಗದ ಒಂಬತ್ತನೇ ಮಾಸ, ಹೇಮಂತ ಋತುವಿನ ಮೊದಲ ತಿಂಗಳು. ಸೌರಮಾಸದ ಪ್ರಕಾರ ಇದು ಧನುರ್ಮಾಸ. ಮಾರ್ಗಶಿರ ಮಾಸವು ವಿಷ್ಣುವಿಗೆ ಪ್ರಿಯವಾದ ಮಾಸವಾಗಿದೆ. ಅಲ್ಲದೇ, ವೈಕುಂಠ ಏಕಾದಶಿಯಂದು ಭಗವಾನ್ ವಿಷ್ಣುವು ಭೂಮಿಗೆ ಬಂದ ದಿನವನ್ನು ವೈಕುಂಠ ಏಕಾದಶಿ ಎಂದು ಕರೆಯಲಾಗುತ್ತದೆ.

ಅಲ್ಲದೇ, ಈ ದಿನದಂದು ಭಗವಾನ್ ವಿಷ್ಣು ಮೂರು ಕೋಟಿ ದೇವತೆಗಳೊಂದಿಗೆ ಭೂಮಿಯ ಮೇಲೆ ಕಾಲಿರಿಸಿದ್ದ. ಆದ್ದರಿಂದ ಈ ಹಬ್ಬವನ್ನು ಮೂರುಕೋಟಿ ಏಕಾದಶಿ ಅಂತಲೂ ಕರೆಯುತ್ತಾರೆ. ವೈಕುಂಠ ಏಕಾದಶಿಯನ್ನು ಭಕ್ತರು ವರ್ಷದ ಏಕಾದಶಿಗಳಲ್ಲಿ ಸಂತೋಷ, ಸುಖವನ್ನು ತಂದುಕೊಡುವ ಮಾಸ ಎಂದು ಭಾವಿಸಿ ವಿಜೃಂಭಣೆಯಿಂದ ಆಚರಿಸುತ್ತಾರೆ.

ವಿಶೇಷ ದಿನದಂದು ದೇವರ ದರ್ಶನ ಪಡೆಯಲು ತಿರುಮಲ ಕ್ಷೇತ್ರಕ್ಕೆ ಭಕ್ತರ ದಂಡೇ ಹರಿದು ಬರುತ್ತಿದೆ. ಈ ಹಿನ್ನೆಲೆಯಲ್ಲಿ ದಿನಕ್ಕೆ 25,000 ಟಿಕೆಟ್​ಗಳಂತೆ ಮುಂದಿನ 10 ದಿನಗಳ ವರೆಗೂ 2.50 ಲಕ್ಷ ಟಿಕೆಟ್‌ಗಳನ್ನು ಟಿಟಿಡಿ ಆನ್‌ಲೈನ್‌ನಲ್ಲಿ ಮಾರಾಟ ಮಾಡಿದೆ.

ವೈಕುಂಠ ಏಕಾದಶಿಯಂದು ವೆಂಕಟೇಶ್ವರ ಸ್ವಾಮಿಗೆ ಪುಣ್ಯಕಾರ್ಯಗಳನ್ನು ನಡೆಸಲಾಗಿದೆ. ಕಳೆದ ಎರಡು ವರ್ಷಗಳಿಂದ ನಡೆಸಿಕೊಂಡು ಬರಲಾಗುತ್ತಿರುವ ಜನವರಿ 11ರವರೆಗೆ ಅಂದರೇ, ಹತ್ತು ದಿನಗಳ ಕಾಲ ವೈಕುಂಠ ದ್ವಾರದ ಮೂಲಕ ಟಿಟಿಡಿ ದರ್ಶನ ನೀಡಲಿದೆ. ಇಂದು ಬೆಳಗ್ಗೆ ಪೂಜಾ ಕೈಂಕರ್ಯಗಳನ್ನು ನಡೆಸಿ ಬೆಳಗ್ಗೆ 5 ಗಂಟೆಗೆ ಭಕ್ತರಿಗೆ ಸರ್ವದರ್ಶನ ಆರಂಭಿಸಲಾಗಿತ್ತು.

ಈ ಬಾರಿ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಬರುವ ನಿರೀಕ್ಷೆ ಇದ್ದ ಕಾರಣ ದಿನಕ್ಕೆ ಸುಮಾರು 80 ಸಾವಿರ ಜನರಿಗೆ ದರ್ಶನ ನೀಡಲು ಸಿದ್ಧತೆ ಮಾಡಿಕೊಳ್ಳಲಾಗಿತ್ತು. ಜನ ಸಾಮಾನ್ಯರಿಗೆ ಅನುಕೂಲವಾಗುವಂತೆ ಉಳಿದ ಎಲ್ಲಾ ವಿಶೇಷ ಸೇವೆಗಳನ್ನು ರದ್ದು ಪಡಿಸಲಾಗಿತ್ತು.

ಸ್ಥಳೀಯರಿಗಾಗಿ ವಿಶೇಷ ಸೌಲಭ್ಯಗಳನ್ನು ಏರ್ಪಡಿಸಿದ್ದ ಟಿಟಿಡಿ, ದಿನಕ್ಕೆ 50 ಸಾವಿರ ಟಿಕೆಟ್​​ಗಳಂತೆ ಐದು ಲಕ್ಷ ಟೋಕನ್​​ಗಳನ್ನು ಭಕ್ತರಿಗೆ ವಿತರಿಸುತ್ತಿದೆ. ಈ ಟೋಕನ್‌ಗಳನ್ನು ಪಡೆಯಲು ಸ್ಥಳೀಯರು ಆಧಾರ್ ಕಾರ್ಡ್ ಹಾಜರುಪಡಿಸಬೇಕಿದೆ.