Husband and Wife: ಹೆಂಡತಿಯನ್ನು ಇಂಪ್ರೆಸ್​ ಮಾಡಲು ಹೋಗಿ ಜೈಲು ಪಾಲಾದ ಇಂಜಿನಿಯರ್! ಆತ ಮಾಡಿದ ಘನಂದಾರಿ ಕೆಲಸ ಏನ್ ಗೊತ್ತಾ?

ಹೆಂಡತಿಗಾಗಿ ಏನು ಬೇಕಾದರೂ ಮಾಡಲು ಸಿದ್ಧವಾಗಿರುವ ಗಂಡಂದಿರುತ್ತಾರೆ ಎನ್ನುವುದನ್ನ ಕೇಳಿದ್ದೇವೆ. ಎಷ್ಟೇ ಕಷ್ಟವಾದರೂ ಸರಿ ಅಡ್ಡದಾರಿಯಲ್ಲಾದರೂ ಹೋಗಿ ತನ್ನ ಪತ್ನಿಯ ಆಸೆ, ಬೇಕು ಬೇಡಗಳನ್ನು ಈಡೇರಿಸುವವರು ಇರುತ್ತಾರೆ. ಆದರೆ ಏನು ಮಾಡಿದರೂ ಅದು ಇತಿಮಿತಿಯಲ್ಲಿದ್ದರೆ ಸರಿ, ಅದನ್ನು ಬಿಟ್ಟು ನಿಯಮ, ಕಾನೂನಿಗೆ ವಿರುದ್ಧ ಹೋದರೆ ಏನಾಗುತ್ತದೆ ಎಂಬುದಕ್ಕೆ ಮುಂಬೈನಲ್ಲಿ ನಡೆದ ಘಟನೆಯೊಂದು ಸಾಕ್ಷಿಯಾಗಿದೆ.

ಉತ್ತರ ಪ್ರದೇಶದಕ್ಕೆ ಸೇರಿದ ಸಿವಿಲ್ ಇಂಜಿನಿಯರ್ ಒಬ್ಬ ಮುಂಬೈ ಪೊಲೀಸರ ಪಾಸ್‌ಪೋರ್ಟ್ ವೆರಿಫಿಕೇಶನ್ ಸಿಸ್ಟಮ್ ಡೇಟಾವನ್ನು ತನ್ನ ತಾಂತ್ರಿಕ ಕೌಶಲ್ಯತೆಯಿಂದ ಹ್ಯಾಕ್ ಮಾಡಿ, ಇದೀಗ ಕಂಬಿ ಎಣಿಸುತ್ತಿದ್ದಾನೆ.

ರಾಜಾ ಬಾಬು ಶಾ ಎಂಬ ವ್ಯಕ್ತಿಯ ಪತ್ನಿ ವಿದೇಶದಲ್ಲಿ ಕೆಲಸ ಮಾಡುವ ಇಚ್ಛೆಯಿರುತ್ತದೆ. ಹಾಗಾಗಿ ಅವರು ಪಾಸ್‌ಪೋರ್ಟ್​ಗಾಗಿ ಮತ್ತು ವೀಸಾಗಳ ಪ್ರಕ್ರಿಯೆಗಳಿಗಾಗಿ ಅರ್ಜಿ ಸಲ್ಲಿಸಿರುತ್ತಾರೆ.

ಆದರೆ ವಿದೇಶಕ್ಕೆ ಹೋಗಲು ಬಯಸಿದ ತನ್ನ ಪತ್ನಿಯನ್ನು ತನ್ನದೇ ಶೈಲಿಯಲ್ಲಿ ಮೆಚ್ಚಿಸಲು ಬಯಸಿ ರಾಜಾ ಬಾಬು ಎಡವಟ್ಟು ಮಾಡಿಕೊಂಡಿದ್ದಾನೆ. ಯಾವುದೇ ಅಡೆತಡೆಯಿಲ್ಲದೆ ಪತ್ನಿಯ ಪಾಸ್‌ಪೋರ್ಟ್ ಅನ್ನು ತ್ವರಿತವಾಗಿ ಪಡೆಯಲು ಅಡ್ಡದಾರಿ ಹಿಡಿದಿದ್ದಾನೆ.

ವಾಸ್ತವವಾಗಿ ಪ್ರಾದೇಶಿಕ ಪಾಸ್‌ಪೋರ್ಟ್ ಕಛೇರಿಯು ಎಲ್ಲಾ ಫೈಲ್‌ಗಳನ್ನು ಸಿಟಿ ಪೊಲೀಸ್ ಸ್ಪೆಷಲ್ ಬ್ರಾಂಚ್‌ಗೆ ಕಳುಹಿಸುತ್ತದೆ. ಅಲ್ಲಿಂದ ಅರ್ಜಿದಾರರ ಮಾಹಿತಿಗಾಗಿ ಸ್ಥಳೀಯ ಪೊಲೀಸರನ್ನು ಕಳುಹಿಸಲಾಗುತ್ತದೆ. ಅವರು ಸಂಗ್ರಹಿಸಿದ ಮಾಹಿತಿಯ ಆಧಾರದ ಮೇಲೆ ನಿರ್ಧಾರ ತೆಗೆದುಕೊಳ್ಳಲಾಗುತ್ತದೆ ಮತ್ತು ಫೈಲ್ ಅನ್ನು ಪಾಸ್​ಪೋರ್ಟ್ ಕಚೇರಿಗೆ ಕಳುಹಿಸಲಾಗುತ್ತದೆ. ಆದರೆ ಯಾವುದೇ ಪರಿಶೀಲನೆಯಿಲ್ಲದೆ ಶೀಘ್ರವಾಗಿ ತನ್ನ  ಪತ್ನಿಯ ಲೈನ್ ಕ್ಲಿಯರ್ ಆಗುವಂತೆ ಮಾಡಲು ಹೋಗಿ ಸಿಕ್ಕಿಬಿದ್ದಿದ್ದಾನೆ.

ಸೆಪ್ಟೆಂಬರ್ 24 ರಂದು ರಜೆ ಇದ್ದ ಕಾರಣ ಪೊಲೀಸರ ಪಾಸ್‌ಪೋರ್ಟ್ ಕಚೇರಿಯನ್ನು ಮುಚ್ಚಲಾಗಿತ್ತು. ಅದೇ ಸಮಯದಲ್ಲಿ, ಶಾ ತನ್ನ ಕೌಶಲ್ಯವನ್ನು ತೋರಿಸಿದ್ದಾನೆ. ಪಾಸ್ ಪೋರ್ಟ್ ಡೇಟಾ ಸಿಸ್ಟಮ್ ಆಕ್ಸೆಸ್ ಪಡೆದುಕೊಂಡಿದ್ದಾನೆ. ತನ್ನ ಬುದ್ಧಿವಂತಿಕೆಯಿಂದ ಹ್ಯಾಕ್ ಮಾಡಿ ಪತ್ನಿಯ ಬಾಕಿ ಉಳಿದಿದ್ದ ಫೈಲ್ ಕ್ಲಿಯರ್ ಮಾಡಿದ್ದಾನೆ.

ಒಂದು ವೇಳೆ ಈ ವಿಷಯ ಪೊಲೀಸರಿಗೆ ಗೊತ್ತಾಗಿಬಿಟ್ಟರೆ ಎಂದು ಯೋಚಿಸಿದ ಶಾ ತನ್ನ ಹೆಂಡತಿಯ ಫೈಲ್​ ಮಾತ್ರವಲ್ಲದೆ ಇನ್ನೂ ಮೂರು ಫೈಲ್​ಗಳನ್ನು ಕ್ಲಿಯರ್ ಮಾಡಿದ್ದಾನೆ. ಆದರೆ ಪೊಲೀಸರಿಗೆ ಅನುಮಾನ ಬಂದು ತಮ್ಮದೇ ಶೈಲಿಯಲ್ಲಿ ತನಿಖೆ ಆರಂಭಿಸಿದಾಗ ಶಾ ಸಿಸ್ಟಮ್ ಹ್ಯಾಕ್ ಮಾಡಿರುವುದು ಪತ್ತೆಯಾಗಿದೆ. ಐಪಿ ವಿಳಾಸದ ಆಧಾರದ ಮೇಲೆ ಆರೋಪಿಯ ಮನೆಯನ್ನು ಪತ್ತೆ ಹಚ್ಚಲಾಗಿದ್ದು, ಆತನನ್ನು ಬಂಧಿಸಿದ್ದಾರೆ.