Couple Swap: ಅತ್ತ ಬಾಯ್ ಫ್ರೆಂಡ್ ಜೊತೆ ಪತ್ನಿ ಎಸ್ಕೇಪ್, ಇತ್ತ ಓಡಿಸ್ಕೊಂಡು ಹೋದವನ ಹೆಂಡ್ತಿಯನ್ನೇ ಮದ್ವೆಯಾದ ಪತಿ!

ಒಂದೇ ಹೆಸರಿನ ಇಬ್ಬರು ಮಹಿಳೆಯರು ಅವಳ ಗಂಡನನ್ನು ಇವಳು, ಇವಳ ಗಂಡನನ್ನ ಅವಳು ಪ್ರೀತಿಸಿ, ಅವರ ಜೊತೆ ಓಡಿ ಹೋಗಿ ವಿವಾಹವಾಗಿರುವ ವಿಚಿತ್ರವಾದ ಘಟನೆ ಬಿಹಾರದ ಖಗರಿಯಾದಲ್ಲಿ ನಡೆದಿದೆ.

ನೀರಜ್ ಕುಮಾರ್ ಸಿಂಗ್ ಮತ್ತು ರೂಬಿ ದೇವಿ ಎಂಬುವರು 2009 ರಲ್ಲಿ ವಿವಾಹವಾಗಿದ್ದರು. ಈ ಜೋಡಿಗೆ ನಾಲ್ಕು ಮಕ್ಕಳಿದ್ದಾರೆ. ನಾಲ್ವರಲ್ಲಿ ಇಬ್ಬರು ಗಂಡು ಮತ್ತು ಇಬ್ಬರು ಹೆಣ್ಣು ಮಕ್ಕಳು

ಆದರೂ ರೂಬಿ ತನ್ನ ಪೋಷಕರ ಮನೆಯ ಬಳಿ ವಾಸಿಸುತ್ತಿದ್ದ ಮುಖೇಶ್ ಕುಮಾರ್ ಸಿಂಗ್ ಎಂಬ ಇನ್ನೊಬ್ಬ ವ್ಯಕ್ತಿಯನ್ನು ಪ್ರೀತಿಸುತ್ತಾ ಇದ್ದಳಂತೆ. ಕಳೆದ ವರ್ಷ ಫೆಬ್ರವರಿಯಲ್ಲಿ, ರೂಬಿ ತನ್ನ ಮೂರು ಮಕ್ಕಳೊಂದಿಗೆ ಮುಖೇಶ್ ಜೊತೆ 2ನೇ ಮದುವೆಯಾಗಲು ಓಡಿಹೋಗಿದ್ದಾಳೆ. ನೀರಜ್ ಜೊತೆಗೆ ಒಂದು ಹೆಣ್ಣು ಮಗುವನ್ನು ಬಿಟ್ಟು ಹೋಗಿದ್ದಾಳಂತೆ.

ಫೆಬ್ರವರಿ 2022 ರಲ್ಲಿ, ರೂಬಿ ದೇವಿ ಮತ್ತು ಮುಖೇಶ್ ಓಡಿಹೋಗಿ ವಿವಾಹವಾಗಿದ್ದಾರೆ. ಈ ವಿಚಾರ ನೀರಜ್‌ಗೆ ಗೊತ್ತಾದಾಗ, ತನ್ನ ಹೆಂಡತಿಯನ್ನು ಅಪಹರಿಸಿದ್ದಾನೆ ಎಂದು ಮುಖೇಶ್ ವಿರುದ್ಧ ದೂರು ದಾಖಲಿಸಿದ್ದಾನೆ. ಸಮಸ್ಯೆಯನ್ನು ಪರಿಹರಿಸಲು ಗ್ರಾಮದಲ್ಲಿ ಪಂಚಾಯಿತಿ ನಡೆಸಲಾಯಿತು. ಆದರೆ ಮುಖೇಶ್ ಒಪ್ಪದೇ ಪರಾರಿಯಾದ ಕಾರಣ, ಸೇಡು ತೀರಿಸಿಕೊಳ್ಳಲು ನೀರಜ್ ಕಳೆದ ತಿಂಗಳು ಮುಖೇಶ್ ಪತ್ನಿಯನ್ನು ಮದುವೆಯಾಗಿದ್ದಾನೆ.

ಕಾಕತಾಳಿಯ ಎಂದರೆ ನೀರಜ್​ ಪತ್ನಿ ರೂಬಿ ದೇವಿ ಜೊತೆ ಓಡಿ ಹೋಗಿದ್ದ ಮುಖೇಶ್ ಹೆಂಡತಿಯ ಹೆಸರು ಕೂಡ ರೂಬಿ ದೇವಿ. ಆಕೆಗೂ 2 ಮಕ್ಕಳಿದ್ದಾರೆ. ತನ್ನ ಪತ್ನಿ ಓಡಿ ಹೋಗಿದ್ದರಿಂದ ನೀರಜ್, ಮುಖೇಶ್​ ಪತ್ನಿ ಬಗ್ಗೆ ತಿಳಿದುಕೊಂಡು ಪರಿಚಯ ಮಾಡಿಕೊಂಡಿದ್ದಾನೆ.

ಪರಿಚಯದ ನಂತರ ಇಬ್ಬರೂ ಫೋನ್‌ನಲ್ಲಿ ಮಾತನಾಡಲು ಪ್ರಾರಂಭಿಸಿದ್ದಾರೆ. ಈ ವೇಳೆ ಒಬ್ಬರನ್ನೊಬ್ಬರು ಇಷ್ಟಪಡಲು ಪ್ರಾರಂಭಿಸಿ, ಈ ವರ್ಷ ಫೆಬ್ರವರಿ 18 ರಂದು ಅವರು ನ್ಯಾಯಾಲಯದಲ್ಲಿ ಅಧಿಕೃತವಾಗಿ ವಿವಾಹವಾಗಿದ್ದಾರೆ.

ನೀರಜ್​ ತನ್ನ ಪತ್ನಿಯನ್ನು ಹಾರಿಸಿಕೊಂಡ ಹೋದ ಮುಖೇಶ್​ಗೆ ತಕ್ಕ ಪಾಠ ಕಲಿಸಲು ಆತನ ಹೆಂಡತಿಯನ್ನೇ ವಿವಾಹವಾಗಿದ್ದಾನೆ. ಇತ್ತ ರೂಬಿ ದೇವಿ ಕೂಡ ನೀರಜ್​ಗೆ ಸಾಥ್​ ನೀಡಿದ್ದಾಳೆ. ಈ ಮೂಲಕ ಮೋಸ ಮಾಡಿ ಹೋದ ಗಂಡನನ್ನು ನೆನೆದು ಕುಳಿತುಕೊಳ್ಳದೆ ತನಗೂ ಒಂದೂ ಜೀವನ ಇದೆ ಎಂಬುದನ್ನು ಅರಿತು ಕೊಂಡು 2ನೇ ವಿವಾಹವಾಗಿದ್ದಾಳೆ.

ನೀರಜ್ ತನ್ನ ಹೆಣ್ಣು ಮಗು ಜೊತೆಗೆ ಮುಖೇಶ್​ ಮಕ್ಕಳನ್ನು ತನ್ನ ಮಕ್ಕಳೆಂದು ಸ್ವೀಕರಿಸಿದ್ದಾನೆ. ವಿಚಿತ್ರ ಎಂದರೆ ಈ ಎರಡೂ ನವ ದಂಪತಿಗಳು ಮಧ್ಯಪ್ರದೇಶದ ಬೇರೆ ಬೇರೆ ನಗರಗಳಲ್ಲಿ ವಾಸಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.