Turkey Earthquake: ಭೂಕಂಪ ಸಂತ್ರಸ್ತರ ನೆರವಿಗೆ ತೆರಳಿದ್ದ ಎನ್‌ಡಿಆರ್‌ಎಫ್‌ ವಾಪಸ್, ಭಾರತ ತಂಡಕ್ಕೆ ಹೃದಯಸ್ಪರ್ಶಿ ಬೀಳ್ಕೊಡುಗೆ

ಟರ್ಕಿಯಲ್ಲಿ ಸಂಭವಿಸಿ ಭೂಕಂಪದಿಂದ ಸಾವಿರಾರು ಮಂದಿ ಸಾವನ್ನಪ್ಪಿದ್ದಾರೆ. ಅಲ್ಲಿ ಶೋಧ ಮತ್ತು ರಕ್ಷಣಾ ಕಾರ್ಯದ ನೆರವಿಗೆ ತೆರಳಿದ್ದ ಎನ್‌ಡಿಆರ್‌ಎಫ್ ತಂಡ  ಇಂದು ವಾಪಸಾಗಿದೆ. NDRF ತಂಡ ಅಲ್ಲಿಂದ ಹೊರಟಾಗ ಅದಾನ ವಿಮಾನ ನಿಲ್ದಾಣದಲ್ಲಿ ಅಲ್ಲಿನ ಜನರು ಚಪ್ಪಾಳೆ ತಟ್ಟುವ ಮೂಲಕ ಭಾರತೀಯ ರಕ್ಷಣಾ ತಂಡಕ್ಕೆ ಧನ್ಯವಾದ ಅರ್ಪಿಸಿದ್ದಾರೆ.

ಟರ್ಕಿಯ ಅದಾನ ವಿಮಾನ ನಿಲ್ದಾಣದಲ್ಲಿ ಅಲ್ಲಿನ ಸಿಬ್ಬಂದಿ ಚಪ್ಪಾಳೆ ತಟ್ಟುವ ಮೂಲಕ ಭಾರತೀಯ ರಕ್ಷಣಾ ತಂಡಕ್ಕೆ ಧನ್ಯವಾದ ಅರ್ಪಿಸಿದರು. ಇದರ ನಂತರ, ಭಾರತವನ್ನು ತಲುಪಿದ ನಂತರ, ಗಾಜಿಯಾಬಾದ್‌ನಲ್ಲಿರುವ ಅಧಿಕಾರಿಗಳು NDRF ತಂಡದ ಸದಸ್ಯರಿಗೆ ಹೂವಿನ ಹಾರ ಹಾಕಿ ಸ್ವಾಗತಿಸಿದರು.

ಟರ್ಕಿಯಲ್ಲಿ ಆಪರೇಷನ್ ದೋಸ್ತ್ ಕಾರ್ಯಚಾರಣೆಯಲ್ಲಿ ಭಾಗವಹಿಸಿದ್ದ ತಂಡವೊಂದು ಇಂದು ತವರಿಗೆ ಮರಳಿದೆ. ಇದು ಗಾಜಿಯಾಬಾದ್ ಎನ್‌ಡಿಆರ್‌ಎಫ್ ಬೆಟಾಲಿಯನ್‌ಗೆ ತಲುಪಿದ್ದು, ಅಲ್ಲಿ ಅವರು ವೈದ್ಯಕೀಯ ಚಿಕಿತ್ಸೆ ಪಡೆಯಲಿದ್ದಾರೆ. ಬಳಿಕ ಊಟ ಮುಗಿಸಿ ಮನೆಗೆ ತೆರಳುತ್ತಾರೆ. ಆದರೆ ಎರಡನೇ ತಂಡ ಇಂದು ಸಂಜೆ ಬರಲಿದ್ದು, ಮೂರನೇ ತಂಡ ನಾಳೆ ಬರಲಿದೆ ಎಂದು ತಿಳಿದುಬಂದಿದೆ.

ಭೂಕಂಪ ಪೀಡಿತ ಟರ್ಕಿಯಲ್ಲಿ 10 ದಿನಗಳ ರಕ್ಷಣಾ ಕಾರ್ಯಾಚರಣೆಯ ನಂತರ ಶ್ವಾನದಳದ ಸದಸ್ಯರಾದ ರಾಂಬೋ ಮತ್ತು ಹನಿ ಅವರೊಂದಿಗೆ ಎನ್‌ಡಿಆರ್‌ಎಫ್‌ನ 47 ಸದಸ್ಯರ ತಂಡ ಇಂದು ಭಾರತಕ್ಕೆ ಮರಳಿದೆ.

ಟರ್ಕಿ-ಸಿರಿಯಾ ಭೂಕಂಪದಲ್ಲಿ ಇಲ್ಲಿಯವರೆಗೆ 41 ಸಾವಿರಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಫೆಬ್ರವರಿ 6ರಂದು ಭೀಕರ ಭೂಕಂಪ ಸಂಭವಿಸಿದ ನಂತರ, ಪ್ರಪಂಚದಾದ್ಯಂತದ ಎಲ್ಲಾ ದೇಶಗಳು ಟರ್ಕಿಯ ಸಹಾಯಕ್ಕೆ ಕೈ ಚಾಚಿದವು.

ಟರ್ಕಿ ಮತ್ತು ಸಿರಿಯಾದಲ್ಲಿ ಸಂಭವಿಸಿರುವ ಭೂಕಂಪದಿಂದ ಸಾವಿನ ಸಂಖ್ಯೆ ಇನ್ನೂ ಏರುತ್ತಲೇ ಇದೆ. ಇಂದು ಅಂದರೆ ಶುಕ್ರವಾರ ಈ ಸಂಖ್ಯೆ 41,000 ದಾಟಿದೆ. ಟರ್ಕಿಯೊಂದರಲ್ಲೇ ದುರಂತದಿಂದ ಇದುವರೆಗೆ 38,044 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.

ಭೂಕಂಪದ ನಂತರ, ಭಾರತ ಸೇರಿದಂತೆ ವಿಶ್ವದಾದ್ಯಂತದ ದೇಶಗಳು ಟರ್ಕಿಗೆ ಸಹಾಯ ಮಾಡಲು ಮುಂದೆ ಬಂದಿವೆ. ಮಾನವೀಯ ಬಿಕ್ಕಟ್ಟನ್ನು ಪರಿಹರಿಸಲು ವಿಶ್ವಸಂಸ್ಥೆಯು ಶುಕ್ರವಾರ 100 ಮಿಲಿಯನ್ ಡಾಲರ್​ ಸಹಾಯ ಮಾಡಬೇಕೆಂದು ವಿಶ್ವದ ಮುಂದೆ ಮನವಿ ಮಾಡಿದೆ.