TTD: ಚೆನ್ನೈನಲ್ಲಿ ತಿರುಪತಿ ತಿಮ್ಮಪ್ಪನ ಎರಡನೇ ದೇಗುಲ ನಿರ್ಮಾಣ; ಮಾರ್ಚ್‌ 17ಕ್ಕೆ ನಡೆಯಲಿದೆ ಲೋಕಾರ್ಪಣೆ

ಹೌದು.. ತಿರುಪತಿ ತಿರುಮಲ ದೇವಸ್ಥಾನದ ಎರಡನೇ ದೇವಸ್ಥಾನ ಈಗಾಗಲೇ ತಮಿಳುನಾಡಿನ ರಾಜಧಾನಿ ಚೆನ್ನೈನ ಟಿ ನಗರದ ಜಿಎನ್ ಚೆಟ್ಟಿ ರಸ್ತೆಯಲ್ಲಿ ನಿರ್ಮಾಣವಾಗಿದೆ. ಭಕ್ತರ ದರುಶನಕ್ಕೆ ಈ ದೇಗುಲ ತಯಾರಾಗಿದ್ದು, ಕೊನೇ ಹಂತದ ಕೆಲಸ ಕಾರ್ಯಗಳು ಮುಗಿಯುವ ಹಂತದಲ್ಲಿದೆ.

ಚೆನ್ನೈನ ಟಿ ನಗರದ ಜಿಎನ್ ಚೆಟ್ಟಿ ರಸ್ತೆಯಲ್ಲಿ ಸ್ಥಾಪಿಸಲಾದ ಟಿಟಿಡಿಯ ಎರಡನೇ ಹೊಸ ದೇವಾಲಯದ ಉದ್ಘಾಟನೆಗೆ ಪೂರ್ಣ ತಯಾರಿ ನಡೆದಿದ್ದು, ಇದೇ ಮಾರ್ಚ್‌ ತಿಂಗಳ 17ನೇ ತಾರೀಕಿನಂದು ದೇವಾಲಯ ಲೋಕಾರ್ಪಣೆಗೊಳ್ಳಲಿದೆ.

ಟಿಟಿಡಿಯ ಎರಡನೇ ಈ ಹೊಸ ದೇವಾಲಯವು ಭಗವಾನ್ ವೆಂಕಟೇಶ್ವರನ ದೈವಿಕ ಪತ್ನಿ ಪದ್ಮಾವತಿ ಅಮ್ಮನವರಿಗೆ ಸಮರ್ಪಿತವಾಗಿದೆ ಎಂದು ಆಡಳಿತ ಮಂಡಳಿ ಹೇಳಿದ್ದು, ಇದು ಮಾಹಿತಿ ಕೇಂದ್ರಕ್ಕೆ ಬಹಳ ಹತ್ತಿರದಲ್ಲಿದೆ.

ತಿರುಪತಿ ತಿರುಮಲ ಆಡಳಿತ ಮಂಡಳಿಯ ಎರಡನೇ ದೇವಾಲಯ ನಿರ್ಮಾಣಕ್ಕೆ ದಕ್ಷಿಣ ಭಾರತದ ಚಲನಚಿತ್ರ ನಟಿ ಪಿ.ಕಾಂಚನಾ ಅವರು 14880 ಚದರ ಅಡಿ ವಿಸ್ತೀರ್ಣದ ಜಮೀನನ್ನು ದಾನ ಮಾಡಿದ್ದರು.

ಸುಮಾರು 7 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ದೇವಾಲಯವನ್ನು ನಿರ್ಮಿಸಲಾಗಿದ್ದು, ಮಾರ್ಚ್‌ 17ರಂದು ಮಹಾಕುಂಭಾಭಿಷೇಕ ಸೇರಿದಂತೆ ದೇವಸ್ಥಾನದಲ್ಲಿ ವಿವಿಧ ಧಾರ್ಮಿಕ ವಿಧಿ ವಿಧಾನಗಳು ನಡೆಯಲಿವೆ.

ಮಾರ್ಚ್​ 17 ರಂದು ನಡೆಯುವ ಶ್ರೀ ಪದ್ಮಾವತಿ ಅಮ್ಮನವರ ಮಹಾಕುಂಭಾಭಿಷೇಕದಲ್ಲಿ ಎಲ್ಲಾ ಭಕ್ತರು ಭಾಗವಹಿಸುವಂತೆ ತಿರುಪತಿ ತಿರುಮಲ ದೇವಸ್ಥಾನದ ಆಡಳಿತ ಮಂಡಳಿ ಮನವಿ ಮಾಡಿದೆ.

ಇನ್ನು ಟಿಟಿಡಿಯ ಹೊಸ ದೇಗುಲದ ದರ್ಶನ ಪಡೆಯಲು ಭಕ್ತರು ತುದಿಗಾಲಲ್ಲಿ ನಿಂತಿದ್ದು, ಮಾರ್ಚ್‌ 17ಕ್ಕೆ ಲೋಕಾರ್ಪಣೆಗಾಗಿ ಕಾಯುತ್ತಿದ್ದಾರೆ. ಇನ್ನೊಂದೆಡೆ ಎರಡು ದೇಗುಲ ನಿರ್ಮಾಣ ಆಗಿರುವುದರಿಂದ ಭಕ್ತರು ವಿಂಗಡಣೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.