Marriage: ಒಂದೇ ದಿನ, ಒಂದೇ ಮುಹೂರ್ತದಲ್ಲಿ ಇಬ್ಬರು ಯುವತಿಯರಿಗೆ ತಾಳಿ ಕಟ್ಟಿದ ವರ! ಇದು ವಿಶೇಷ ಟ್ರಯಾಂಗಲ್ ಲವ್​ಸ್ಟೋರಿ!

ಮದುವೆ ಎಂಬುದು ಪ್ರತಿಯೊಬ್ಬರ ಜೀವನದಲ್ಲಿ ಪ್ರಮುಖ ಘಟ್ಟ. ಮನೆಯಲ್ಲಿ ಒಂದು ರೀತಿಯ ಹಬ್ಬದ ಸಂಭ್ರಮ, ಮದುವೆ ದಿನಾಂಕ ನಿಗದಿಯಾದಾಗಿನಿಂದ ಮದುವೆ ದಿನದವರೆಗೂ ಮನೆಯಲ್ಲಿ ಗಡಿಬಿಡಿ, ಸಂಭ್ರಮ ಇದ್ದೇ ಇರುತ್ತದೆ. ಲಗ್ನಪತ್ರಿಕೆಗಳನ್ನು ಹಂಚುವುದು, ಸಂಬಂಧಿಕರ ಮನೆಗೆ ಹೋಗಿ ಮದುವೆ ಕಾರ್ಡ್ ಕೊಟ್ಟು ಮದುವೆಗೆ ಆಹ್ವಾನಿಸುವುದು ಸಾಮಾನ್ಯವಾಗಿರುತ್ತದೆ.

ಆದರೆ ಒಂದೇ ಮುಹೂರ್ತದಲ್ಲಿ ಒಬ್ಬ ವ್ಯಕ್ತಿ ಇಬ್ಬರು ವಧುವಿಗೆ ತಾಳಿ ಕಟ್ಟುವುದನ್ನು ನೋಡಿರುತ್ತೀರಾ? ಬಹುಶಃ ಇಂತಹ ನಿದರ್ಶನ ತುಂಬಾ ವಿರಳ ಎನ್ನಬಹುದು. ಎರಡು ಮದುವೆಯಾದವರು ಸಾಕಷ್ಟು ಜನರಿದ್ದಾರೆ, ಆದರೆ ಅವರು ಬೇರೆ ಬೇರೆ ದಿನಗಳಲ್ಲಿ ಮದುವೆಯಾಗಿರುತ್ತಾರೆ. ಆದರೆ ಒಂದೇ ದಿನ, ಒಂದೇ ಮುಹೂರ್ತದಲ್ಲಿ ಮದುವೆಯಾಗುವುದೆಂದರೆ ನಿಜಕ್ಕೂ ಆಶ್ಚರ್ಯವೇ ಸರಿ, ಇಂತಹದೊಂದು ಘಟನೆ ತೆಲಂಗಾಣದಲ್ಲಿ ನಡೆದಿದೆ.

ಆ ಮದುವೆಗೆ ಸಂಬಂಧಿಸಿದ ವೆಡ್ಡಿಂಗ್ ಕಾರ್ಡ್ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಏಕೆಂದರೆ ಆ ಕಾರ್ಡ್‌ನಲ್ಲಿ ವರ ಒಬ್ಬನೆ, ಆದರೆ ಇಬ್ಬರು ವಧುಗಳ ಹೆಸರಿದೆ. ಇನ್ನು ಈ ಮದುವೆ ಕೂಡ ದೊಡ್ಡವರ ಉಪಸ್ಥಿತಿಯಲ್ಲಿ ನಡೆದಿರುವುದು ಮತ್ತೊಂದು ವಿಶೇಷ.

ಮುಹೂರ್ತಕ್ಕೆ ಒಂದೇ ವ್ಯಕ್ತಿ ತನ್ನ ಇಬ್ಬರು ಪ್ರಿಯತಮೆಯರಿಗೆ ತಾಳಿ ಕಟ್ಟಿದ್ದಾನೆ. ತೆಲಂಗಾಣದ ಭದ್ರಾದ್ರಿ ಹೊಸಗುಡ್ಡೆ ಜಿಲ್ಲೆ ಚರ್ಲ ತಾಲೂಕಿನ ಎರಬೋರು ಗ್ರಾಮಕ್ಕೆ ಸೇರಿದ ಸತ್ತಿಬಾಬು ಎಂಬ ವ್ಯಕ್ತಿ ಸ್ವಪ್ನ ಮತ್ತು ಸುನೀತಾ ಎಂಬ ಇಬ್ಬರು ಹುಡುಗಿಯರನ್ನು ಪ್ರೀತಿಸಿದ್ದ ಎನ್ನಲಾಗಿದೆ.

ಸತ್ತಿಬಾಬು ಮತ್ತು ಸ್ವಪ್ನಾ ವಿದ್ಯಾರ್ಥಿ ದಿನಗಳಿಂದಲೂ ಪ್ರೀತಿಸುತ್ತಿದ್ದರು ಮತ್ತು ಲಿವ್-ಇನ್ ಸಂಬಂಧದಲ್ಲಿದ್ದರು. ಪರಿಣಾಮ ಒಂದು ಹೆಣ್ಣು ಮಗು ಜನಿಸಿತ್ತು. ಕೆಲವು ದಿನಗಳ ನಂತರ ಸತ್ತಿಬಾಬು ತನ್ನ ಸಂಬಂಧಿ ಕರ್ನೆಪಲ್ಲಿ ಗ್ರಾಮದ ಸುನೀತಾಳ ಜೊತೆ ಸಹಜೀವನ ನಡೆಸಿದ್ದು, ಆಕೆಗೆ ಗಂಡು ಮಗು ನೀಡಿದ್ದಾನೆ.

ನಂತರ ಸತ್ತಿಬಾಬು ಜೊತೆ ಸ್ವಪ್ನಳೊಂದಿಗೆ ಮದುವೆ ಮಾಡಲು ಎರಡು ಕುಟುಂಬ ಸದಸ್ಯರು ನಿರ್ಧರಿಸಿದ್ದಾರೆ. ಈ ವಿಷಯ ತಿಳಿದ ಸುನೀತಾ ಪ್ರಿಯತಮ ಸತ್ತಿಬಾಬುನನ್ನು ತರಾಟೆಗೆ ತೆಗೆದುಕೊಂಡು ಗಲಾಟೆ ಮಾಡಿದ್ದಾಳೆ.

ಈ ವಿಷಯ ಮೂರು ಕುಟುಂಬ ಸದಸ್ಯರಿಗೆ ತಿಳಿಯುತ್ತಿದ್ದಂತೆ ಗೊಂದಲ ಸೃಷ್ಟಿಯಾಗಿದೆ. ಕೊನೆಗೆ ಸತ್ತಿಬಾಬು ಇಬ್ಬರು ಯುವತಿಯರನ್ನು ಮದುವೆ ಮಾಡಿಕೊಳ್ಳುತ್ತೇನೆ ಎಂದು ಹೇಳಿದ್ದಾನೆ.

ಇದಕ್ಕೆ ಸತ್ತಿಬಾಬು, ಸ್ವಪ್ನ, ಸುನೀತಾಳ ಕುಟುಂಬ ಸದಸ್ಯರು ಒಪ್ಪಿಕೊಂಡಿದ್ದಾರೆ. ನಂತರ ಆಹ್ವಾನ ಪತ್ರಿಕೆಯಲ್ಲಿ ಇಬ್ಬರು ಯುವತಿಯರ ಹೆಸರುಗಳನ್ನ ಪ್ರಿಂಟ್ ಮಾಡಿಸಲಾಗಿತ್ತು. ಕೊನೆಗೆ ಒಂದೇ ಮುಹೂರ್ತದಲ್ಲಿ ಇಬ್ಬರು ಪ್ರಿಯತಮೆಯರಿಗೆ ಅವರ ಮಕ್ಕಳ ಸಾಕ್ಷಿಯಾಗಿ ತಾಳಿ ಕಟ್ಟಿದ್ದಾನೆ.