Eagle Owl: ತಲೆಯ ಮೇಲೆ 2 ಕೊಂಬಿನ ಗರಿಗಳಿರುವ ಅಪರೂಪದ ಹದ್ದು ಗೂಬೆ ಪತ್ತೆ! ಏನಿದರ ವೈಶಿಷ್ಟ್ಯ ಗೊತ್ತಾ?

ಏಪ್ರಿಲ್ 10 ರಂದು ತೇಣಿ ಜಿಲ್ಲೆಯ ಬೋಡಿನಾಯಕನೂರಿನ ಸ್ಟೇಟ್ ಬ್ಯಾಂಕ್ ಮುಂಭಾಗದಲ್ಲಿ ಸುಮಾರು 3 ಕೆಜಿ ತೂಕದ ವಿಶಿಷ್ಟ ರೀತಿಯ ಗೂಬೆಯನ್ನು ಸ್ಥಳೀಯರು ನೋಡಿದ್ದರು.

ಗಾಯಗೊಂಡಿದ್ದ ಈ ಗೂಬೆಯನ್ನು ನೋಡಿ ಗಾಬರಿಗೊಂಡ ಸ್ಥಳೀಯರು ತಕ್ಷಣ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮಾಹಿತಿ ನೀಡಿ ರಕ್ಷಣೆ ಮಾಡುವಂತೆ ಸೂಚನೆ ನೀಡಿದ್ದಾರೆ.

ತ್ವರಿತವಾಗಿ ಸ್ಪಂದಿಸಿದ ಅರಣ್ಯ ಇಲಾಖೆ ಅಧಿಕಾರಿಗಳು ಗೂಬೆಯನ್ನು ರಕ್ಷಣೆ ಮಾಡಿದ್ದು, ಅದಕ್ಕೆ ಔಷಧವನ್ನು ನೀಡಿದ ಬಳಿಕ ಸುರಕ್ಷಿತವಾಗಿ ಕಾಡಿಗೆ ಬಿಟ್ಟಿದ್ದಾರೆ.

ಈ ಗೂಬೆಯನ್ನು 'ದಿ ಇಂಡಿಯನ್ ಈಗಲ್ ಔಲ್' ಎಂದು ಗುರುತಿಸಲಾಗಿದ್ದು, ಇದು ಭಾರತೀಯ ಉಪಖಂಡದಲ್ಲಿ ಸಾಮಾನ್ಯವಾಗಿ ಕಂಡುಬರುವ ಅಪರೂಪದ ಜಾತಿಯ ಪಕ್ಷಿಯಾಗಿದೆ.

ಈ ಗೂಬೆಯ ತಲೆಯ ಮೇಲೆ ಇರುವ ಗರಿಗಳು ಕೊಂಬುಗಳನ್ನು ಹೋಲುತ್ತವೆ. ಅರಣ್ಯ ಇಲಾಖೆಯ ಪ್ರಕಾರ, ಈ ಗೂಬೆಗೆ ಬೆಂಗಾಲ್ ಈಗಲ್ ಗೂಬೆ ಮತ್ತು ರಾಕ್ ಈಗಲ್ ಗೂಬೆ ಎಂದು ಭಾರತೀಯ ಹೆಸರಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಅರಣ್ಯ ಇಲಾಖೆಯ ಅಧಿಕಾರಿಯೊಬ್ಬರು, 'ಕಲ್ಲು ಮತ್ತು ಗುಡ್ಡಗಾಡು ಕಾಡುಗಳಲ್ಲಿ ಕಂಡುಬರುವ ಈ ಗೂಬೆಯು ಕಂದು ಮತ್ತು ಬೂದು ಬಣ್ಣದ ಗರಿಗಳನ್ನು ಹೊಂದಿದೆ. ಈ ಜಾತಿಯ ಗೂಬೆಗಳು ಎಂದಿಗೂ ಒಬ್ಬಂಟಿಯಾಗಿ ಹೊರಗೆ ಬರೋದಿಲ್ಲ. ಎರಡು ಅಥವಾ ಅದಕ್ಕಿಂತ ಹೆಚ್ಚಿನ ಗುಂಪಿನಲ್ಲಿ ಸಂಚರಿಸುತ್ತವೆ ಎಂದಿದ್ದಾರೆ.

ಇನ್ನು ಈ ಜಾತಿಯ ಗೂಬೆ ತನ್ನ ಬೇಟೆಯನ್ನು ಹದ್ದಿನಂತೆ ಬೆನ್ನಟ್ಟುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದು, ಅರಣ್ಯ ಇಲಾಖೆಯ ಅಧಿಕಾರಿಗಳ ಪ್ರಕಾರ ಈ ನಿರ್ದಿಷ್ಟ ಭಾರತೀಯ ಈಗಲ್ ಗೂಬೆ ದಾರಿ ತಪ್ಪಿ ಬಂದಿರುವ ಸಾಧ್ಯತೆ ಇದೆ ಎಂದು ಭಾವಿಸಲಾಗಿದೆ.