Stray Dogs Food: ಇಷ್ಟ ಬಂದಾಗೆಲ್ಲಾ ಬೀದಿನಾಯಿಗಳಿಗೆ ಆಹಾರ ನೀಡುವ ಹಾಗಿಲ್ಲ! ತಪ್ಪಿದ್ರೆ ಬೀಳುತ್ತೆ ದಂಡ

ನಗರ ಪ್ರದೇಶಗಳಲ್ಲಿ ಹೆಚ್ಚಾಗಿ ಬೀದಿ ನಾಯಿಗಳಿಗೆ ಮಿಕ್ಕಿದ ಆಹಾರ ಹಾಕುವುದು ಸರ್ವೇ ಸಾಮಾನ್ಯವಾಗಿ ನಡೆಯುತ್ತಿರುತ್ತದೆ. ಈ ಬೀದಿನಾಯಿಗಳು ಅದೇ ಪ್ರದೇಶವನ್ನೇ ತಮ್ಮ ವಾಸಸ್ಥಾನವನ್ನಾಗಿ ಮಾಡಿಕೊಂಡಿರುತ್ತವೆ. ತಮ್ಮ ಸಂತತಿಯನ್ನು ವೃದ್ಧಿಸಿಕೊಳ್ಳುತ್ತವೆ. ಆದರೀಗ ಅವುಗಳಿಗೆ ಆಹಾರ ಹಾಕುವುದನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕು ಎಂಬುದು ಪಶುವೈದ್ಯರ ಮಾತಾಗಿದೆ.

ಜನರ ಮೇಲೆ ಆಕ್ರಮಣ ಹೆಚ್ಚಾಗುತ್ತದೆ: ಹೌಸಿಂಗ್ ಸೊಸೈಟಿ ಅಥವಾ ಕಟ್ಟಡಗಳ ಕಂಪೌಂಡ್‌ಗಳಲ್ಲಿ ಬೀದಿನಾಯಿಗಳಿಗೆ ಆಹಾರ ಹಾಕುವುದು ಹಾಗೂ ಅವುಗಳ ಲಾಲನೆ ಪಾಲನೆಗಳನ್ನು ಕಡ್ಡಾಯವಾಗಿ ನಿಲ್ಲಿಸಬೇಕು ಎಂದು ಪಶುವೈದ್ಯರಾದ ಜಯರಾಮ್ ದೇಸಾಯಿ ತಿಳಿಸಿದ್ದಾರೆ. ಬೀದಿನಾಯಿಗಳಿಗೆ ಆಹಾರ ಹಾಕುವುದರಿಂದ ಅವುಗಳು ಆ ಸ್ಥಳಕ್ಕೆ ಭೇಟಿನೀಡುವ ಕಸಕಡ್ಡಿ ಆಯುವವರು, ನ್ಯೂಸ್‌ಪೇಪರ್ ಹಾಕುವವರು, ಹಾಲು ಹಾಕುವವರು ಇತಹವರ ಮೇಲೆ ದಾಳಿ ಮಾಡುವ ಸಾಧ್ಯತೆ ಇರುತ್ತದೆ ಎಂದು ತಿಳಿಸಿದ್ದಾರೆ.

ನಾಯಿಗಳ ಮೇಲೆ ಪ್ರೇಮ ಬೆಳೆಸಿಕೊಳ್ಳುವುದು ಒಳ್ಳೆಯ ಉದ್ದೇಶವಾದರೂ ಅವುಗಳಿಗೆ ಆಹಾರ ಹಾಕುವುದು, ಅವುಗಳನ್ನು ಸಾಕುವುದರಿಂದ ಇತರರಿಗೆ ತೊಂದರೆಯಾಗುವುದು ಖಂಡಿತ ಎಂದು ಅಭಿಪ್ರಾಯ ನೀಡಿದ್ದಾರೆ.

ಗೋವಾದಲ್ಲಿ ಹೆಚ್ಚುತ್ತಿರುವ ಬೀದಿನಾಯಿಗಳ ತೊಂದರೆ: ಪ್ರವಾಸಿ ಸ್ಥಳವಾಗಿರುವ ಗೋವಾದ ಪರಿಸರಗಳಲ್ಲಿ ಬೀದಿನಾಯಿಗಳ ಉಪಟಳ ಅಧಿಕವಾಗುತ್ತಿದ್ದು ಪ್ರವಾಸಿಗರು ಈ ನಾಯಿಗಳಿಗೆ ಆಹಾರ ನೀಡುವುದು ಅವುಗಳನ್ನು ಪೋಷಿಸುವುದರಿಂದ ಬೀದಿನಾಯಿಗಳ ಸಂಖ್ಯೆಯಲ್ಲಿ ವೃದ್ಧಿಯಾಗುತ್ತಿದ್ದು ಇವುಗಳಿಂದ ಅಪಾಯ ಹೆಚ್ಚುತ್ತಿದೆ ಎಂಬುದು ನಿವಾಸಿಗಳ ಮಾತಾಗಿದೆ.

ಜಿಲ್ಲಾ ಸೊಸೈಟಿ ನಿರ್ದಿಷ್ಟಪಡಿಸಿರುವ ಪ್ರದೇಶಗಳಲ್ಲಿ ಮಾತ್ರವೇ ಬೀದಿನಾಯಿಗಳಿಗೆ ಆಹಾರ ನೀಡಬೇಕೆಂದು ಕಟ್ಟುನಿಟ್ಟಿನ ನಿಯಮವಾಗಿದ್ದು, ಅದಾಗ್ಯೂ ಎಲ್ಲೆಂದರಲ್ಲಿ ನಾಯಿಗಳಿಗೆ ಆಹಾರ ನೀಡಲಾಗುತ್ತಿದೆ. ಇದರಿಂದ ನಾಯಿಗಳು ಜನರ ಮೇಲೆ ಆಕ್ರಮಣ ಮಾಡುತ್ತಿವೆ ಎಂದು ನಿವಾಸಿಗಳು ದೂರು ನೀಡಿದ್ದಾರೆ.

ನಾಯಿಗಳಿಗೆ ಆಹಾರ ನೀಡಲು ನಿಯಮಗಳು: ಪ್ರಾಣಿ ದಯಾ ಸಂಘದ ಪರಿಣಿತರು ತಿಳಿಸಿರುವಂತೆ ನಿರ್ದೇಶಿಸಿರುವ ಆಯಾ ಸ್ಥಳಗಳಲ್ಲಿ ಮಾತ್ರವೇ ನಾಯಿಗಳಿಗೆ ಆಹಾರ ಹಾಕಬೇಕು ಎಂದು ತಿಳಿಸಿದ್ದು ಹೌಸಿಂಗ್ ಸೊಸೈಟಿ ಅಥವಾ ಬಿಲ್ಡಿಂಗ್ ಕಂಪೌಂಡ್‌ಗಳಲ್ಲಿ ಆಹಾರ ಹಾಕಬೇಕು ಹಾಗೂ ಈ ಭಾಗಗಳಲ್ಲಿ ಜನರು ಹೆಚ್ಚಾಗಿ ಓಡಾಡುವುದಿಲ್ಲ ಎಂಬುದನ್ನು ಖಾತ್ರಿಪಡಿಸಬೇಕು ಎಂದು ತಿಳಿಸಿದ್ದಾರೆ.

ಎನ್‌ಜಿಓಗಳು ಹಾಗೂ ಶಾಸಕರು ಈ ಬಗ್ಗೆ ಜವಾಬ್ದಾರಿ ವಹಿಸಬೇಕು ಅಂತೆಯೇ ಬೀದಿ ನಾಯಿಗಳಿಗೆ ಆಹಾರ ನೀಡುವವರಿಗೆ ನಿಯಮಾವಳಿಗಳನ್ನು ನಿರ್ದಿಷ್ಟಪಡಿಸಬೇಕು ಎಂದು ತಿಳಿಸಿದ್ದಾರೆ.

ಮನುಷ್ಯರ ಸಮಸ್ಯೆ, ಪ್ರಾಣಿಗಳ ತಪ್ಪಿಲ್ಲ: ದಕ್ಷಿಣ ಗೋವಾದಲ್ಲಿ ಪ್ರಾಣಿ ದಯಾ ಸಂಘ ನಡೆಸುವ ಗ್ರೇಸ್ ಕೌರ್ ತಿಳಿಸಿರುವಂತೆ ಈ ವಿಷಯದಲ್ಲಿ ಪ್ರಾಣಿಗಳದ್ದು ಯಾವುದೇ ದೋಷವಿಲ್ಲ. ಇದೆಲ್ಲಾ ಮಾನವ ನಿರ್ಮಿತ ಸಮಸ್ಯೆಯಾಗಿದ್ದು ಮಾನವರೇ ಇದಕ್ಕೆ ಪರಿಹಾರ ಕಂಡುಕೊಳ್ಳಬೇಕು ಎಂದು ತಿಳಿಸಿದ್ದಾರೆ. ಜನರು ನಾಯಿ ಮರಿಗಳನ್ನು ಮಾರುಕಟ್ಟೆ, ಕಟ್ಟಡಗಳ ಸಮೀಪ, ರೆಸಿಡೆನ್ಸಿ ಪಕ್ಕ ಬಿಟ್ಟು ಹೋಗುತ್ತಾರೆ. ಈ ಸಮಯದಲ್ಲಿ ಯಾವುದೇ ಚುಚ್ಚುಮದ್ದು ಹಾಗೂ ಲಸಿಕೆಗಳನ್ನು ನೀಡದೆಯೇ ತಮಗೆ ಬೇಕಾದ ಸ್ಥಳದಲ್ಲಿ ನಾಯಿ ಮರಿಗಳನ್ನು ಬಿಡುತ್ತಾರೆ.