Crime News: ಶಾಲೆಯಲ್ಲಿ ಸಹಪಾಠಿಗಳ ಮೇಲೆ ವಿದ್ಯಾರ್ಥಿಯಿಂದ ಗುಂಡಿನ ದಾಳಿ! ಎಂಟು ಸಾವು

ಸರ್ಬಿಯಾ ರಾಜಧಾನಿ ಕೇಂದ್ರ ಬೆಲ್‌ಗ್ರೇಡ್‌ನ ವ್ಲಾಡಿಸ್ಲಾವ್ ರಿಬ್ನಿಕಾರ್ ಪ್ರೈಮರಿ ಶಾಲೆಯಲ್ಲಿ ನಿನ್ನೆ ಬೆಳಗ್ಗೆ 8.40ರ ಸುಮಾರಿಗೆ ಈ ಭೀಕರ ಘಟನೆ ನಡೆದಿದ್ದು, ಶೂಟೌಟ್ ಮಾಡಿದ ಬಾಲಕ ಅದೇ ಶಾಲೆಯ ವಿದ್ಯಾರ್ಥಿಯಾಗಿದ್ದಾನೆ ಎಂದು ತಿಳಿದು ಬಂದಿದೆ.

ತರಗತಿಗೆ ಪಿಸ್ತೂಲ್ ತಂದಿದ್ದ ಬಾಲಕ ಮೊದಲು ತನ್ನ ಶಿಕ್ಷಕನ ಮೇಲೆಯೇ ಗುಂಡು ಹಾರಿಸಿ ನಂತರ ಸಹಪಾಠಿಗಳು ಮತ್ತು ಸೆಕ್ಯೂರಿಟಿ ಮೇಲೆ ಗುಂಡಿನ ದಾಳಿ ನಡೆಸಿದ್ದಾನೆ ಎಂದು ಸರ್ಬಿಯಾದ ಸಚಿವರು ಹೇಳಿದ್ದಾರೆ.

ಗುಂಡು ಹಾರಿಸಿ ಎಂಟು ಜನರ ಕೊಲೆಗೆ ಕಾರಣನಾದ ಬಾಲಕನನ್ನು ಶಾಲಾ ಆವರಣದಲ್ಲೇ ಪೊಲೀಸರು ಬಂಧಿಸಿದ್ದು, ಈತ ಏಳನೇ ತರಗತಿ ವಿದ್ಯಾರ್ಥಿಯಾಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತನ್ನ ತಂದೆಯ ಬಂದೂಕನ್ನು ಶಾಲೆಗೆ ತಂದಿದ್ದ ಆರೋಪಿಯು ಮನಸೋಇಚ್ಛೆ ಅಲ್ಲಿದ್ದವರ ಮೇಲೆ ಗುಂಡಿನ ದಾಳಿ ನಡೆಸಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.

2009ರಲ್ಲಿ ಜನಿಸಿರುವ ಕೊಲೆ ಆರೋಪಿ ಬಾಲಕ ನಿನ್ನೆ ಬೆಳಿಗ್ಗೆ 8.40ರ ವೇಳೆಗೆ ಗುಂಡಿನ ದಾಳಿ ನಡೆಸಿದ್ದಾನೆ. ಆಗಷ್ಟೇ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಶಾಲೆಗೆ ಬಂದಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಸರ್ಬಿಯಾದಲ್ಲಿ ಇಂತಹ ಘಟನೆ ನಡೆಯುತ್ತಿರೋದು ಇದೇ ಮೊದಲಲ್ಲ. 2013ರಲ್ಲಿ ಸೆಂಟ್ರಲ್ ಸರ್ಬಿಯಾದ ಗ್ರಾಮದಲ್ಲಿ 13 ಮಂದಿಯನ್ನು ಕೊಲೆ ಮಾಡಲಾಗಿತ್ತು.

ಸದ್ಯ ಗುಂಡು ಹೊಡೆದು ಕೊಲೆ ಮಾಡಿರುವ ಬಾಲಕನ ಹೆಸರನ್ನು ಪೊಲೀಸರು ಸಾರ್ವಜನಿಕಗೊಳಿಸಿಲ್ಲ. ಆತನ ಬಂಧನದ ವೇಳೆ ಮುಖಕ್ಕೆ ಕವರ್ ಹಾಕಿ ಕರೆದೊಯ್ದಿದ್ದಾರೆ.