ಗರ್ಭಿಣಿಯರು ಕೆಲಸ ಮಾಡಲು ಅನರ್ಹರು ಎಂದ SBI; Delhi ಮಹಿಳಾ ಆಯೋಗದಿಂದ ನೋಟಿಸ್​​

ಬ್ಯಾಂಕಿನ ಈ ಕ್ರಮವು ತಾರತಮ್ಯ ಮತ್ತು ಕಾನೂನುಬಾಹಿರವಾಗಿದೆ. ಇದು ಕಾನೂನಿನ ಅಡಿಯಲ್ಲಿ ಒದಗಿಸಲಾದ ಹೆರಿಗೆ ಪ್ರಯೋಜನಗಳ ಮೇಲೆ ಪರಿಣಾಮ ಬೀರಬಹುದು. ಎಂದು ಮಹಿಳಾ ಆಯೋಗ ಆಧ್ಯಕ್ಷೆ ಸ್ವಾಮಿ ಮಲಿವಾಲ್​​​ ಟ್ವೀಟ್​​ ಮಾಡಿದ್ದಾರೆ. ಈ ಹಿನ್ನಲೆ ತಕ್ಷಣಕ್ಕೆ ಈ ಮಹಿಳಾ ವಿರೋಧಿ ನಿಯಮವನ್ನು ಹಿಂಪಡೆಯುವಂತೆ ಕೋರಿ ನೋಟಿಸ್ ಜಾರಿ ಮಾಡಿದ್ದೇವೆ ಎಂದು ತಿಳಿಸಿದ್ದಾರೆ.

ಎಸ್​ಬಿಐ ಡಿಸೆಂಬರ್​ 31ರಂದು ಈ ನಿಯಮದ ಸುತ್ತೋಲೆಯನ್ನು ಪ್ರಕಟಿಸಿದೆ. ಈ ಸುತ್ತೊಲೆಯಲ್ಲಿ ಅದು ಮಹಿಳಾ ಉದ್ಯೋಗಿಗಳು ಸರಿಯಾದ ಪ್ರಕ್ರಿಯೆ ಮೂಲಕ ಆಯ್ಕೆಯಾದರೂ ಮೂರು ತಿಂಗಳಿಗಿಂತ ಹೆಚ್ಚು ಗರ್ಭಿಣಿ ಮಹಿಳೆಯರನ್ನು ಕೆಲಸಕ್ಕೆ ಸೇರುವುದಕ್ಕೆ ನಿರಾಕರಿಸಿದೆ. ಜೊತೆಗೆ ಆಕೆಯನ್ನು ತಾತ್ಕಾಲಿಕವಾಗಿ ಅನರ್ಹ ಎಂದು ಪರಿಗಣಿಸಲಾಗುವುದು ಮತ್ತು ಮಗುವಿನ ಹೆರಿಗೆಯ ನಂತರ ನಾಲ್ಕು ತಿಂಗಳೊಳಗೆ ಅವಳನ್ನು ಸೇರಲು ಅನುಮತಿಸಬಹುದು ಎಂದು ಸುತ್ತೋಲೆ ಹೇಳುತ್ತದೆ.

ಈ ಸಂಬಂಧ ಮಾತನಾಡಿರುವ ಸ್ವಾಮಿ ಮಲಿವಾಲ್, ಮಹಿಳಾ ಅಭ್ಯರ್ಥಿಯು ನೇಮಕವಾಗುವಾಗ ಮೂರು ತಿಂಗಳ ಗರ್ಭಿಣಿಯಾಗಿದ್ದರೆ, ಆಕೆಯನ್ನು ತಾತ್ಕಾಲಿಕವಾಗಿ ಅನರ್ಹರೆಂದು ಪರಿಗಣಿಸಲಾಗುತ್ತದೆ. ಇದರಿಂದ ಆಕೆಯ ಆಯ್ಕೆಯ ಮೇಲೆ ತಕ್ಷಣವೇ ಸೇರ್ಪಡೆಗೊಳ್ಳುವುದಿಲ್ಲ ಎಂದು ಬ್ಯಾಂಕ್ ನಿಯಮಗಳನ್ನು ರೂಪಿಸಿದೆ.

ಇದು ಬಹಳ ಗಂಭೀರವಾದ ವಿಷಯ. ಬ್ಯಾಂಕಿನ ಈ ಕ್ರಮವು ತಾರತಮ್ಯ ಮತ್ತು ಕಾನೂನುಬಾಹಿರವೆಂದು ತೋರುತ್ತಿದೆ ಏಕೆಂದರೆ ಇದು ಸಾಮಾಜಿಕ ಭದ್ರತೆ ಸಂಹಿತೆ, 2020 ರ ಅಡಿಯಲ್ಲಿ ಒದಗಿಸಲಾದ ಹೆರಿಗೆ ಪ್ರಯೋಜನಗಳಿಗೆ ವಿರುದ್ಧವಾಗಿದೆ ಎಂದು ಆರೋಪಿಸಿದ್ದಾರೆ.

ಇಷ್ಟೇ ಅಲ್ಲದೇ, ಈ ಮಾರ್ಗಸೂಚಿಗಳನ್ನು ಯಾವ ನಿಯಮದ ಆಧಾರದ ಮೇಲೆ ರಚಿಸಲಾಗಿದೆ. ಇದರ ಹಿಂದಿನ ಪ್ರಕ್ರಿಯೆ ಏನು? ಇದನ್ನು ಅನುಮೋದಿಸಿದ ಅಧಿಕಾರಿಗಳ ಹೆಸರನ್ನು ನೀಡುವಂತೆ ಕೂಡ ದೆಹಲಿ ಮಹಿಳಾ ಆಯೋಗ ಕೋರಿದೆ.

ಮೊದಲು, ಆರು ತಿಂಗಳ ಗರ್ಭಿಣಿಯವರೆಗಿನ ಮಹಿಳಾ ಅಭ್ಯರ್ಥಿಗಳು ಕೆಲವು ಷರತ್ತುಗಳ ಅಡಿಯಲ್ಲಿ ಎಸ್‌ಬಿಐಗೆ ಸೇರಲು ಅವಕಾಶವಿತ್ತು, ಆ ವೇಳೆ ಉದ್ಯೋಗ ನಿರ್ವಹಿಸಲು ಆಕೆಯ ಆರೋಗ್ಯದ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಸ್ತ್ರೀರೋಗತಜ್ಞರಿಂದ ಪ್ರಮಾಣಪತ್ರ ನೀಡಬೇಕಿತ್ತು.