Sanitary Napkin: ಇದೆಂಥಾ ವಿಚಿತ್ರ! ಬಿಹಾರದ ಶಾಲೆಯಲ್ಲಿ ಹುಡುಗರಿಗೂ ಸ್ಯಾನಿಟರಿ ನ್ಯಾಪ್​ಕಿನ್​ ವಿತರಣೆ

ಪಾಟ್ನಾ(ಜ.25): ಋತುಚಕ್ರದ ಸಮಯದಲ್ಲಿ(Menstrual Periods) ಹುಡುಗಿಯರು(Girl) ಬಳಸುವ ಸ್ಯಾನಿಟರಿ ಪ್ಯಾಡ್​ಗಳನ್ನು(Sanitary Pads) ಹುಡುಗರಿಗೂ(Boys) ವಿತರಣೆ ಮಾಡಿರುವ ವಿಚಿತ್ರ ಘಟನೆ ಬಿಹಾರದಲ್ಲಿ ನಡೆದಿದೆ. ಇದರಿಂದ ಸರ್ಕಾರಿ ಶಾಲೆಗೆ ದಾಖಲಾದ ಹದಿಹರೆಯದ ಹೆಣ್ಣುಮಕ್ಕಳಿಗೆ ಉಚಿತ ಸ್ಯಾನಿಟರಿ ಪ್ಯಾಡ್​​ಗಳನ್ನು ಒದಗಿಸುವ ಬಿಹಾರ ಸಿಎಂ ನಿತೀಶ್​​ ಕುಮಾರ್(Bihar CM Nitish Kumar)​ ಸರ್ಕಾರದ ಯೋಜನೆಯು ಅಗತ್ಯವಿಲ್ಲದ ಫಲಾನುಭವಿಗಳನ್ನು ತಲುಪಿದೆ ಎಂಬುದು ತಿಳಿದು ಬಂದಿದೆ.

ಈ ಅಕ್ರಮ ವ್ಯವಹಾರ ಸರನ್ ಜಿಲ್ಲೆಯ ಮಾಂಝಿ ಬ್ಲಾಕ್​​ನಲ್ಲಿರುವ ಸರ್ಕಾರಿ ಶಾಲೆಯಾದ ಹಲ್ಕೋರಿ ಸಾಹ್​ ಪ್ರೌಢಶಾಲೆಯಲ್ಲಿ ನಡೆದಿದೆ. ಯೋಜನೆಯ ಅವ್ಯವಹಾರ ಇದೀಗ ಬೆಳಕಿಗೆ ಬಂದಿದ್ದು, ತನಿಖೆ ಪ್ರಗತಿ ಹಂತದಲ್ಲಿದೆ. ಶಾಲೆಯ ಹೆಡ್​ಮಾಸ್ಟರ್ ಈ ಅಕ್ರಮಗಳನ್ನು ಪತ್ತೆ ಹಚ್ಚಿರುವುದಾಗಿ ತಿಳಿದು ಬಂದಿದೆ. ಹಲವು ವರ್ಷಗಳಿಂದ ಈ ಅಕ್ರಮ ವ್ಯವಹಾರ ನಡೆದಿರುವುದು ಇದೀಗ ಗೊತ್ತಾಗಿದೆ.

‘‘2016-17ನೇ ಸಾಲಿನಲ್ಲಿ ಶಾಲೆಯ 7 ಹುಡುಗರಿಗೆ ಸ್ಯಾನಿಟರಿ ನ್ಯಾಪ್​​ಕಿನ್​​​ಗಾಗಿ ವಾರ್ಷಿಕವಾಗಿ 150 ರೂ. ಹಣ ವಿತರಿಸಲಾಗಿದೆ ಎಂದು ಹೆಡ್​ಮಾಸ್ಟರ್​​ ಸಕ್ಷಮ ಪ್ರಾಧಿಕಾರಕ್ಕೆ ನೀಡಿದ ವರದಿಯಲ್ಲಿ ತಿಳಿಸಿದ್ದಾರೆ‘‘ ಎಂದು ಜಿಲ್ಲಾ ಶಿಕ್ಷಣಾಧಿಕಾರಿ ಅಜಯ್​ ಕುಮಾರ್ ಸಿಂಗ್​ ಹೇಳಿದ್ದಾರೆ.

ಈ ಅಕ್ರಮದ ತನಿಖೆಗಾಗಿ ಇಬ್ಬರು ಸದಸ್ಯರ ಸಮಿತಿಯನ್ನು ರಚಿಸಲಾಗಿದೆ. ಸಮಿತಿಯ ಫಲಿತಾಂಶಗಳ ಆಧಾರದ ಮೇಲೆ ತಪ್ಪಿತಸ್ಥರ ವಿರುದ್ಧ ಸೂಕ್ತ ಶಿಸ್ತು ಕ್ರಮ ಕೈಗೊಳ್ಳಲಾಗುವುದು. ಸಮಿತಿಯು ಇನ್ನು 4 ದಿನಗಳಲ್ಲಿ ತನ್ನ ವರದಿಯನ್ನು ಸಲ್ಲಿಸಲಿದೆ ಎಂದು ಅಜಯ್​ ಕುಮಾರ್ ಸಿಂಗ್​ ತಿಳಿಸಿದ್ದಾರೆ.

ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್​ 2015ರ ಫೆಬ್ರವರಿಯಲ್ಲಿ ಸರ್ಕಾರಿ ಶಾಲೆಗಳಲ್ಲಿ ಹದಿಹರೆಯದ ಹೆಣ್ಣುಮಕ್ಕಳಿಗೆ ಉಚಿತ ಸ್ಯಾನಿಟರಿ ನ್ಯಾಪ್​​ಕಿನ್​ ವಿತರಿಸುವ ಯೋಜನೆ ಮೂಲಕ ಆರೋಗ್ಯ ಮತ್ತು ನೈರ್ಮಲ್ಯವನ್ನು ಸುಧಾರಿಸುವ ಪ್ರಯತ್ನ ಮಾಡಿದ್ದರು.