’ಶೋಯಬ್ ಮಲಿಕ್ ಏನೇ ಆದರೂ ನಾನು ಮಾತ್ರ ಭಾರತವನ್ನೇ ಬೆಂಬಲಿಸುತ್ತೇನೆ’; ಸಾನಿಯಾ ಮಿರ್ಜಾ

"ಪಾಕಿಸ್ತಾನದ ಕ್ರಿಕೆಟರ್‌ ಶೋಯಬ್ ಮಲಿಕ್‌ ಏನೇ ಇರಲಿ. ಆದರೆ, ನಾನು ಮಾತ್ರ ಭಾರತವನ್ನು ಬೆಂಬಲಿಸುತ್ತೇನೆ” ಎಂದು ಭಾರತೀಯ ಟೆನಿಸ್ ತಾರೆ ಸಾನಿಯಾ ಮಿರ್ಜಾ ಇತ್ತೀಚಿನ ಸಂದರ್ಶನವೊಂದರಲ್ಲಿ ತಮ್ಮ ನಿಲುವನ್ನು ಪತಿ ಶೋಯೆಬ್ ಮಲಿಕ್ ಅವರಿಗೆ ಸ್ಪಷ್ಟಪಡಿಸಿದ್ದಾರೆ.

ಹತ್ತಾರು ವಿವಾದಗಳ ನಡುವೆಯೂ ಭಾರತದ ಖ್ಯಾತ ಟಿನಿಸ್ ತಾರೆ ಸಾನಿಯಾ ಮಿರ್ಜಾ 2010ರಲ್ಲಿ ಪಾಕಿಸ್ತಾನದ ಕ್ರಿಕೆಟಿಗ ಶೋಯಬ್‌ ಮಲಿಕ್ ಅವರನ್ನು ಮದುವೆಯಾಗಿದ್ದರು. ಈ ಕ್ರೀಡಾ ದಂಪತಿಗಳಿಗೆ 2018 ರಲ್ಲಿ ಇಶಾನ್‌ ಎಂಬ ಗಂಡು ಮಗು ಜನಿಸಿತ್ತು.

ಇನ್ನೂ ಶೋಯಬ್ ಮಲಿಕ್‌ ಜೊತೆಗೆ ಡೇಟಿಂಗ್ ನಡೆಸುತ್ತಿದ್ದಾಗಲೆ ತಮ್ಮ ಪ್ರೀತಿ ಮತ್ತು ವೃತ್ತಿ ಜೀವನದ ಬಗ್ಗೆ ಮಾತನಾಡಿದ್ದ ಸಾನಿಯಾ ಮಿರ್ಜಾ, "ಶೋಯಬ್ ಮಲಿಕ್ ಪಾಕಿಸ್ತಾನದ ಪರವಾಗಿ ಆಟವಾಡಲು ಇಷ್ಟಪಡುತ್ತಾರೆ. ಅವರ ದಾಖಲೆಗಳ ಬಗ್ಗೆ ಅವರಿಗೆ ಹೆಮ್ಮೆ ಇದೆ. ಆದರೆ, ನಾನು ಮಾತ್ರ ನನ್ನ ದೇಶ ಭಾರತವನ್ನೇ ಬೆಂಬಲಿಸುತ್ತೇನೆ” ಎಂದು ಭರವಸೆ ನೀಡಿದ್ದರು. ಅಲ್ಲದೆ, ಈಗಲೂ ತಮ್ಮ ಮಾತಿಗೆ ಬದ್ಧವಾಗಿರುವುದಾಗಿ ಮಿರ್ಜಾ ತಿಳಿಸಿದ್ದಾರೆ.

ಅಂತಾರಾಷ್ಟ್ರೀಯ ಕ್ರೀಡಾ ವೆಬ್‌ಸೈಟ್‌ ಎನಿಸಿಕೊಂಡಿರುವ ಸ್ಪೋಟ್ಸ್‌ ಕೀಡಾಗೆ ನೀಡಿರುವ ಸಂದರ್ಶನದಲ್ಲಿ ತಮ್ಮ ವ್ಯಯಕ್ತಿಕ ಬದುಕಿನ ಬಗ್ಗೆ ಮಾತನಾಡಿರುವ ಸಾನಿಯಾ ಮಿರ್ಜಾ, “ನಾವು ಬಹಳ ಖುಷಿಯಿಂದ ಇದ್ದೇವೆ. ನಾವಿಬ್ಬರೂ ನಮ್ಮ ಸಂಬಂಧವನ್ನು ತುಂಬಾ ಹಗುರವಾಗಿಡಲು ಪ್ರಯತ್ನಿಸುತ್ತೇವೆ. ಯಾರಾದರೂ ನೋಡಿದವರು ಅವರು ನನಗಿಂತ ಹೆಚ್ಚು ಮಾತನಾಡುತ್ತಾರೆ ಎನ್ನುವ ವಿಶ್ವದ ನಂಬಿಕೆಗೆ  ನಮ್ಮ ಬದುಕು ವಿರುದ್ಧವಾಗಿದೆ.

ಪ್ರೀತಿಸುವ ಕಾಲದಲ್ಲೇ ಕೆಲವು ಕಾರಣಗಳಿಂದಾಗಿ ಅವರು ಭಾರತದ ವಿರುದ್ಧ ಆಡಲು ಇಷ್ಟಪಟ್ಟರು. ನಾವು ಡೇಟಿಂಗ್ ಮಾಡುವಾಗ ಮತ್ತು ನಾವು ಈ ಕುರಿತು ಮಾತನಾಡುವಾಗಲೆಲ್ಲಾ, ನಾನು ಯಾವಾಗಲೂ 'ನಾನು ಭಾರತವನ್ನು ಬೆಂಬಲಿಸುತ್ತೇನೆ’ ಎಂದು ಹೇಳುತ್ತಿದೆ.

ಆದರೆ, ಅವರು ’ಭಾರತದ ವಿರುದ್ಧ ನನ್ನ ದಾಖಲೆ ಅತ್ಯುತ್ತಮವಾಗಿದೆ’ ಎನ್ನುತ್ತಿದ್ದರು. ಈಗಲೂ ಅವರು ಪಾಕಿಸ್ತಾನದ ಪರ ಆಡುತ್ತಾರೆ, ನಾನು ಭಾರತವನ್ನೇ ಬೆಂಬಲಿಸುತ್ತೇನೆ. ಆದರೂ ಅವರು ಬಹಳ ಸಮಯದಿಂದ ಇದ್ದಾರೆ ಮತ್ತು ಅವರು ಅದ್ಭುತ ವೃತ್ತಿಜೀವನವನ್ನು ಹೊಂದಿದ್ದಾರೆಂದು ನಾನು ಭಾವಿಸುತ್ತೇನೆ. ನಾನು ಅವರ ಬಗ್ಗೆ ನಿಜವಾಗಿಯೂ ಹೆಮ್ಮೆಪಡುತ್ತೇನೆ "ಎಂದು ಮಿರ್ಜಾ ತಿಳಿಸಿದ್ದಾರೆ.