Veg Biriyani: ಕೈಗೆ ಬಂದ ತುತ್ತು ಬಾಯಿಗೆ ಬರ್ಲಿಲ್ಲ; ವೆಜ್​ ಬಿರಿಯಾನಿಯಲ್ಲಿ ಚಿಕನ್ ಮೂಳೆ! ಠಾಣೆ ಮೆಟ್ಟಿಲೇರಿದ ಗ್ರಾಹಕ

ಎಷ್ಟೋ ಮಂದಿಗೆ ನಾನ್​ ವೆಜ್ ಅಂದರೆ ಬಹಳ ಇಷ್ಟ ಆದರೆ ಅದೆಷ್ಟೋ ಮಂದಿಗೆ ಅದೇ ನಾನ್​ವೆಜ್ ಅಂದ್ರೆ ಕಷ್ಟ. ಸಾಮಾನ್ಯವಾಗಿ ಸಸ್ಯಾಹಾರಿಗಳು ತರಕಾರಿ, ಸೊಪ್ಪು, ಹಣ್ಣು-ಹಂಪಲು ತಿಂದು ಬದುಕುತ್ತಾರೆ. ಆದರೆ ಇವರಿಗೆ ನಾನ್​ವೆಜ್ ಅಂದರೆ ಒಂದು ರೀತಿ ಅಲರ್ಜಿ ಇದ್ದಂತೆ ಎಂದರೂ ತಪ್ಪಾಗಲಾರದು.

ಸಸ್ಯಾಹಾರಿಗಳು  ನಾನ್​ವೆಜ್​ ವಾಸನೆ ಬಂದರೂ ಕೂಡ ಸಹಿಸುವುದಿಲ್ಲ. ಅಲ್ಲದೇ ಒಂದು ಪೀಸ್​ ಕೇಕ್​ನಲ್ಲಿ ಮೊಟ್ಟೆ ಬೆರೆಸಿದ್ದರೂ ಅದನ್ನು ಮುಟ್ಟುವುದಿಲ್ಲ. ಹೀಗಿರುವಾಗ ಮಧ್ಯಪ್ರದೇಶದ ವ್ಯಕ್ತಿಯೊಬ್ಬರು ಹೋಟೆಲ್​ನಲ್ಲಿ ಆರ್ಡರ್ ಮಾಡಿದ್ದ ವೆಜಿಟೆಬಲ್ ಬಿರಿಯಾನಿಯಲ್ಲಿ ಚಿಕನ್ ಮೂಳೆ ಪತ್ತೆಯಾಗಿದೆ.

ಇದರಿಂದ ಕೋಪಗೊಂಡ ಗ್ರಾಹಕ ಇದೀಗ ಹೋಟೆಲ್ ಮಾಲೀಕನ ವಿರುದ್ಧ ಪೊಲೀಸ್​ ಠಾಣೆ ಮೆಟ್ಟಿಲೇರಿದ್ದಾರೆ. ಇತ್ತೀಚೆಗಷ್ಟೇ ಇಂದೋರ್‌ನ ವಿಜಯ್‌ ನಗರದಲ್ಲಿ ಈ ಘಟನೆ ನಡೆದಿದ್ದು, ಗ್ರಾಹಕ ಆಕಾಶ್​ ದುಬೆ ಹೋಟೆಲ್ ಮಾಲೀಕರ ವಿರುದ್ಧ ದೂರು ದಾಖಲಿಸಿದ್ದಾರೆ.

ವಿಜಯ್​ನಗರದಲ್ಲಿರುವ ಹೋಟೆಲ್​ನಲ್ಲಿ ಆಕಾಶ್​ ದುಬೆ ಅವರು ವೆಜ್​ ಬಿರಿಯಾನಿಯನ್ನು ಆರ್ಡರ್ ಮಾಡಿದ್ದರು. ಬಹಳ ಹಸಿವಿನಿಂದ ಕಾಯುತ್ತಿದ್ದ ಆಕಾಶ್​ ಅವರಿಗೆ ತಮ್ಮ ವೆಜ್​​ ಬಿರಿಯಾನಿ ಪಾರ್ಸೆಲ್ ಸಿಕ್ಕಿತು.

ನಂತರ ಸಂತಸದಿಂದ ವೆಜ್​ ಬಿರಿಯಾನಿ ಪ್ಯಾಕೆಟ್​ ಓಪನ್ ಮಾಡಿ ಇನ್ನೇನು ತಿನ್ನಬೇಕು ಅಷ್ಟರಲ್ಲಿಯೇ ಆಕಾಶ್​ ಅವರಿಗೆ ವೆಜ್​ ಬಿರಿಯಾನಿಯಲ್ಲಿ ಚಿಕನ್ ಮೂಳೆ ಪತ್ತೆಯಾಗಿದೆ. ಇದರಿಂದ ತೀವ್ರ ಕೋಪಗೊಂಡ ಗ್ರಾಹಕ ಆಕಾಶ್​ ಹೋಟೆಲ್ ಸಿಬ್ಬಂದಿಯೊಂದಿಗೆ ವಾಗ್ವಾದಕ್ಕಿಳಿದಿದ್ದಾರೆ.

ಬಳಿಕ ಈ ಬಗ್ಗೆ ಹೋಟೆಲ್ ಮಾಲೀಕ ಹಾಗೂ ಮ್ಯಾನೇಜರ್ ಕ್ಷಮೆ ಕೇಳಿದ್ದಾರೆ.‌ ಆದರೆ ಇದಕ್ಕೆ ಜಗ್ಗದ ಆಕಾಶ್‌ ಠಾಣೆ ಮೆಟ್ಟಿಲೇರಿದ್ದಾರೆ. ಈ ಸಂಬಂಧ ವಿಜಯ್‌ ನಗರ್‌ ಪೊಲೀಸ್‌ ಠಾಣೆಯಲ್ಲಿ ಹೊಟೇಲ್‌ ಮಾಲೀಕ ಸ್ವಪ್ನಿಲ್ ಗುಜರಾತಿ ಅವರ ವಿರುದ್ಧ ದೂರು ನೀಡಿದ್ದಾರೆ.

ಇದೀಗ ಈ ಘಟನೆ ಸಂಬಂಧ ಪೊಲೀಸರು ಮ್ಯಾನೇಜರ್‌ ಅವರನ್ನು ವಿಚಾರಣೆ ನಡೆಸಿದ್ದಾರೆ. ಅಲ್ಲದೇ  ತಪ್ಪಿಸ್ಥರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದ್ದಾರೆ. ಒಟ್ಟಾರೆ ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ  ಎಂಬಂತೆ, ಆಸೆಯಿಂದ ವೆಜ್​ ಬಿರಿಯಾನಿ ಆರ್ಡರ್ ಮಾಡಿದ್ದ ಗ್ರಾಹಕರಿಗೆ ತಮ್ಮ ಮುಂದೆ ಊಟವಿದ್ದರೂ ತಿನ್ನಲಾಗಲಿಲ್ಲ.