Floating Stone: ರಾಮೇಶ್ವರದಲ್ಲಿವೆ ತೇಲುವ ಕಲ್ಲುಗಳು!

ರಾಮೇಶ್ವರ ಎಂಬ ಹೆಸರು ಹೇಳಿದ್ರೆ ಸಾಕು, ಭಾರತದ ಎಲ್ಲ ಪೌರಾಣಿಕ ಕಥೆಗಳು ಕಣ್ಮುಂದೆ ಬರುತ್ತವೆ. ಶ್ರೀ ರಾಮಚಂದ್ರ ವಾನರರ ಜೊತೆಗೂಡಿ ರಾಮಸೇತು ನಿರ್ಮಿಸಿದ ಕಥೆಯನ್ನಂತೂ ಮರೆಯಲು ಸಾಧ್ಯವೇ ಇಲ್ಲ!

ರಾಮಸೇತು ಎಂದಾಕ್ಷಣ ಸಮುದ್ರದ ನೀರಿನಲ್ಲಿ ಕಲ್ಲುಗಳು ಹೇಗೆ ತೇಲಿದವು ಎಂಬ ಪ್ರಶ್ನೆ ಹುಟ್ಟುವುದು ಸಹಜ. ಆದರೆ ರಾಮೇಶ್ವರದಲ್ಲಿ ಈಗಲೂ ನೀರಿನಲ್ಲಿ ಕಲ್ಲುಗಳು ತೇಲುತ್ತದೆ ಎಂದು ಗೊತ್ತಾದ್ರೆ ನಿಮಗೆ ಅಚ್ಚರಿಯಾಗುತ್ತೆ!

ಹೀಗೆ ನೀರಿನಲ್ಲಿ ತೇಲುವ ಅದ್ಭುತ ಕಲ್ಲುಗಳನ್ನು ನೋಡಲು ರಾಮೇಶ್ವರದಲ್ಲಿರುವ ಈ ಎರಡು ದೇವಾಲಯಗಳನ್ನು ನೀವು ದರ್ಶನ ಮಾಡಬಹುದು.

ಸದ್ಯ ಈ ಕಲ್ಲುಗಳನ್ನು ಭಕ್ತರಿಗೆ ನೋಡಲು ಕೇವಲ ಎರಡು ದೇವಾಲಯಗಳಲ್ಲಿ ಮಾತ್ರ ಸಿಗುತ್ತೆ. ರಾಮೇಶ್ವರಂ ಲೆಟ್ಚುಮನನ್ ತೀರ್ಥಂ ಬಳಿಯ ಪಂಚಮುಖಿ ಹನುಮಾನ್ ದೇವಸ್ಥಾನ ಮತ್ತು ಧನುಷ್ಕೋಟಿಯ ಚಂಡಮಾರುತದಿಂದ ಹಾನಿಗೊಳಗಾದ ಹಳೆಯ ರೈಲು ನಿಲ್ದಾಣದ ಎದುರಿನ ರಾಜಕಾಳಿಯಮ್ಮನ್ ದೇವಸ್ಥಾನದಲ್ಲಿ ಮಾತ್ರ ನೀವು ಈ ಕಲ್ಲುಗಳನ್ನು ನೋಡಬಹುದು.

ರಾಮನಾಥಪುರಂ ಜಿಲ್ಲೆಯ ಸಮುದ್ರ ತೀರಗಳಲ್ಲಿ ಹವಳದ ದಂಡೆಗಳು ಹೆಚ್ಚಾಗಿ ಕಂಡುಬರುತ್ತವೆ. ಅದರಲ್ಲೂ ಸಮುದ್ರದಿಂದ ಸುತ್ತುವರಿದಿರುವ ರಾಮೇಶ್ವರ ದ್ವೀಪದಲ್ಲಿ ಇವುಗಳನ್ನು ನೀವು ಹೆಚ್ಚಾಗಿ ನೋಡಬಹುದು.

ಈ ಹವಳದ ಕಲ್ಲುಗಳು ಪ್ರಾಕೃತಿಕ ವಿಕೋಪಗಳ ಸಂದರ್ಭದಲ್ಲಿ ಹಾನಿಯನ್ನು ತಡೆಯುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.

ನೀರಿನಲ್ಲಿ ತೇಲುತ್ತಿರುವ ಈ ಅದ್ಭುತ ಕಲ್ಲು "ಪೈಪೆಕೋರಲ್" ಎಂದು ಕರೆಯಲ್ಪಡುವ ಒಂದು ರೀತಿಯ ಹವಳವಾಗಿದೆ. ಈ ಕಲ್ಲುಗಳು ಸುತ್ತಲೂ ಸಣ್ಣ ಪೈಪ್ ತರಹದ ರಂಧ್ರಗಳಿವೆ. ಈ ಕಾರಣದಿಂದಾಗಿ ಈ ಕಲ್ಲುಗಳು ನೀರಿನಲ್ಲಿ ತೇಲುತ್ತವೆ ಎಂದು ವಿಜ್ಞಾನ ಹೇಳುತ್ತದೆ.

ಈ ತೇಲುವ ಕಲ್ಲುಗಳನ್ನು ನೋಡಲು ಪ್ರವಾಸಿಗರು ಹಾಗೂ ಭಕ್ತರು ಹೆಚ್ಚಿನ ಆಸಕ್ತಿ ತೋರುತ್ತಿದ್ದಾರೆ. ಈ ಎರಡು ದೇವಸ್ಥಾನಗಳನ್ನು ಬಿಟ್ಟು ಬೇರೆ ಎಲ್ಲೂ ಹವಳದ ಕಲ್ಲುಗಳನ್ನು ಇಡಲು ಅನುಮತಿಯಿಲ್ಲ.

ಕೆಲವು ವರ್ಷಗಳ ಹಿಂದೆ ಇಂತಹ ಹವಳದ ಕಲ್ಲುಗಳನ್ನು ಕೆಲವರು ವಾಣಿಜ್ಯ ಉದ್ದೇಶಕ್ಕಾಗಿ ಅಕ್ರಮವಾಗಿ ಮಾರಾಟ ಮಾಡಲು ಪ್ರಯತ್ನಿಸಿದ್ದರು. ಹೀಗಾಗಿ ಬೇರೆ ಎಲ್ಲೂ ಹವಳದ ಕಲ್ಲುಗಳನ್ನು ಸಂಗ್ರಹಿಸಿಡುವುದನ್ನು ನಿಷೇಧಿಸಲಾಗಿದೆ.