Tomato Farming: ಟೊಮ್ಯಾಟೋ ಮಾತ್ರವಲ್ಲ, ಟೊಮ್ಯಾಟೋ ಬೀಜದಿಂದಲೂ ಲಕ್ಷ ಲಕ್ಷ ಗಳಿಸುತ್ತಿದ್ದಾರೆ ಈ ರೈತರು!

ದೇಶಾದ್ಯಂತ ರೈತರು ಸಾಂಪ್ರದಾಯಿಕ ಕೃಷಿಯ ಮೇಲಿನ ಪ್ರೀತಿಯನ್ನು ಕಳೆದುಕೊಂಡಿದ್ದಾರೆ. ಈಗ ರೈತರು ಲಾಭದಾಯಕ ಕೃಷಿಯತ್ತ ಗಮನ ಹರಿಸುತ್ತಿದ್ದಾರೆ.  ರಾಜಸ್ಥಾನದ  ಡುಂಗರಪುರದ ಹಳ್ಳಿಯೊಂದರಲ್ಲಿ ಹತ್ತಕ್ಕೂ ಹೆಚ್ಚು ರೈತರು ಟೊಮ್ಯಾಟೋ ಬೆಳೆ ಜೊತೆಗೆ ಟೊಮೇಟೋ ಬೀಜದ ಮೂಲಕವೂ ಲಕ್ಷ ಲಕ್ಷ ಆದಾಯ ಗಳಿಸುತ್ತಿದ್ದಾರೆ.

ಡುಂಗರಪುರದ ಸೀಮಲವಾಡ ಪ್ರದೇಶದ  ಅಂಬಾವು ಪಟ್ಟಣದ ರೈತರು ಟೊಮ್ಯಾಟೋ ಬೀಜಗಳನ್ನು ಬೆಳೆಯುವ ಮೂಲಕ ಲಕ್ಷಾಂತರ ರೂಪಾಯಿಗಳನ್ನು ಗಳಿಸುತ್ತಿದ್ದಾರೆ. ಈ ಕೃಷಿಯು ರೈತರ ಆರ್ಥಿಕ ಸ್ಥಿತಿಯನ್ನು ಸುಧಾರಿಸುತ್ತಿದೆ. 10 ರಿಂದ 12 ರೈತರು ಈ ಕೃಷಿಯಿಂದ ಲಕ್ಷಗಟ್ಟಲೆ ಆದಾಯ ಪಡೆಯುತ್ತಿದ್ದಾರೆ.

ಗುಜರಾತಿನ ಉಮಂಗ್ ಕಂಪನಿಯಿಂದ ಸಸಿಗಳನ್ನು ತರುವ ರೈತರು, ಪಾಲಿಹೌಸ್, ಶೆಡ್ ನೆಟ್ ಹೌಸ್ ಮತ್ತು ಪ್ಲಾಸ್ಟಿಕ್ ಮಲ್ಚಿಂಗ್ ಮೂಲಕ ಸಿದ್ಧಪಡಿಸಲಾದ ಒಂದು ಬಿಘಾ(0.3 ಎಕರೆ) ಅಂದರೆ 100 ರಿಂದ 150 ಅಡಿ ಜಾಗದಲ್ಲಿ ಗಿಡಗಳನ್ನು ನೆಡುತ್ತಾರೆ.  ತಿಂಗಳ ನಂತರ ಬೆಳೆಗಳು ಕೈಗೆ ಸಿಗುತ್ತವೆ. ಗುಜರಾತಿನ ಉಮಂಗ್ ಕಂಪನಿಯೇ ರೈತರ ಟೊಮ್ಯಾಟೋವನ್ನು ಖರೀದಿಸುವುದರಿಂದ ಈ ರೈತರಿಗೆ ತಮ್ಮ ಬೆಳೆಯನ್ನು ಮಾರಾಟ ಮಾಡುವ ಚಿಂತೆಯಿಲ್ಲ. ಕಂಪನಿ ಈ ಟೊಮ್ಯಾಟೋಗಳಿಂದ ಬೀಜಗಳನ್ನು ತಯಾರಿಸುತ್ತದೆ.

ರೈತ ಧುಲ್ ಸಿಂಗ್ ದಾಮೋರ್ ಸೇರಿದಂತೆ  10 ರಿಂದ 12 ರೈತರು ಟೊಮ್ಯಾಟೋ ಕೃಷಿ ಮಾಡುತ್ತಿದ್ದಾರೆ. ಸಾಂಪ್ರದಾಯಿಕ ಕೃಷಿಯಲ್ಲಿ ಗೋಧಿ, ಕಾಳುಗಳು, ಜೋಳವ್ನು ಬೆಳೆಯಲಾಗುತ್ತಿತ್ತು . ಈ ಕೃಷಿಯಲ್ಲಿ ಲಾಭ ಸಿಗದ ಕಾರಣ ಗುಜರಾತಿಗೆ ಕೂಲಿ ಕೆಲಸಕ್ಕೆ ಹೋಗುತ್ತಿದ್ದರಂತೆ.

 ಆದರೆ, ಈ ಟೊಮ್ಯಾಟೋ ಕೃಷಿಯಲ್ಲಿ ಹೆಚ್ಚು ಲಾಭವಿದೆ ಎಂದು ತಿಳಿದಾಗ ಗುಜರಾತ್‌ಗೆ ಕೂಲಿ ಕೆಲಸಕ್ಕೆ ಹೋಗುವುದನ್ನು ನಿಲ್ಲಿಸಿದೆವು, ಸಾಂಪ್ರದಾಯಿಕ ಬೆಳೆಗಳಾದ ಗೋಧಿ, ಹುರುಳಿ, ಜೋಳ ಬಿಟ್ಟು ಟೊಮ್ಯಾಟೋ ಕೃಷಿ ಆರಂಭಿಸಿದ್ದೇವೆ ಎಂದು ಧುಲ್​ ಸಿಂಗ್ ತಿಳಿಸಿದ್ದಾರೆ.

ಧುಲ್​ ಸಿಮಗ್ ಕಳೆದ 3 ವರ್ಷಗಳಿಂದ ಒಂದು ಬಿಘಾ (0.3)ಭೂಮಿಯಲ್ಲಿ ಟೊಮ್ಯಾಟೊ ಬೆಳೆಯುತ್ತಿದ್ದಾರೆ. ಇದರಿಂದ ಉತ್ತಮ ಆದಾಯ ಬರುತ್ತಿದೆ. ಟೊಮ್ಯಾಟೋ ಗಿಡಗಳು ಸಾಮಾನ್ಯವಾಗಿ 3 ರಿಂದ 4 ಅಡಿ ಎತ್ತರವಿರುತ್ತವೆ. ಆದರೆ ಹೊಸ ವೈಜ್ಞಾನಿಕ ರೀತಿಯಲ್ಲಿ ಇಲ್ಲಿನ ರೈತರು 4 ರಿಂದ 6 ಅಡಿಯ ಟೊಮ್ಯಾಟೋ ಗಿಡಗಳನ್ನು ಬೆಳೆಯುತ್ತಿದ್ದಾರೆ.

ಹೊಸ ತಂತ್ರಜ್ಞಾನದಲ್ಲಿ ಬೆಳೆದಿರುವ ಒಂದು ಗಿಡದಿಂದ 22 ಬಾರಿ ಟೊಮ್ಯಾಟೋ ಕೊಯ್ಲು ಮಾಡಲಾಗುತ್ತದೆ. ಒಂದು ಬಿಘಾಗೆ(0.3 ಎಕರೆ) 40 ರಿಂದ 50 ಸಾವಿರ ವೆಚ್ಚವಾಗುತ್ತದೆ. ಈ ವರ್ಷ ಧುಲ್ಸಿಂಗ್​ ತಮ್ಮ ಜಮೀನಿನಲ್ಲಿ 12 ಬಾರಿ ಟೊಮ್ಯಾಟೊ ಫಸಲು ಪಡೆದಿದ್ದಾರೆ. ಸುಮಾರು 5 ಲಕ್ಷ ರೂಪಾಯಿ ಮೌಲ್ಯದ ಟೊಮೆಟೋ ಮಾರಾಟ ಮಾಡಿದ್ದಾರೆ. ಗುಜರಾತಿನ ಉಮಂಗ್ ಕಂಪನಿಗೆ ಟೊಮ್ಯಾಟೋ ಮಾರುತ್ತಾರೆ.

ಟೊಮ್ಯಾಟೋ ಬೀಜಗಳನ್ನು ಬೆಳೆಸುವುದು ಹೇಗೆ? ಹೊಲವನ್ನು ಉಳುಮೆ ಮಾಡಿದ ನಂತರ ಪಾಲಿಹೌಸ್, ಶೆಡ್ ನೆಟ್ ಹೌಸ್  ಮಾಡಿ, ಪ್ಲಾಸ್ಟಿಕ್ ಮಲ್ಚಿಂಗ್ ತಯಾರಿಸಲಾಗುತ್ತದೆ. ನಂತರ ಟೊಮ್ಯಾಟೋ ಗಿಡಗಳನ್ನು 1 ರಿಂದ 2 ಅಡಿ ಅಂತರದಲ್ಲಿ ನೆಡಲಾಗುತ್ತದೆ. 10 ರಿಂದ 15 ದಿನಗಳಲ್ಲಿ ಡ್ರಿಪ್ ಮೂಲಕ ನೀರು ಬಿಡಲಾಗುತ್ತದೆ.

ಇನ್ನು ಟೊಮ್ಯಾಟೋ ಗಿಡಗಳನ್ನು ಹುರಿ ಮತ್ತು ತಂತಿಯಿಂದ ಕಟ್ಟಲಾಗುತ್ತದೆ. ಇದರಿಂದ ಹಣ್ಣುಗಳ ತೂಕವು ಗಿಡಕ್ಕೆ ಹಾನಿಯಾಗುವುದಿಲ್ಲ ಮತ್ತು ಸಸ್ಯಗಳಿಗೆ ಉತ್ತಮ ಗಾಳಿ ಸಿಗುತ್ತದೆ. ಇದರಿಂದಾಗಿ ಹಣ್ಣುಗಳು ಕೂಡ ಎಲ್ಲಾ ಒಂದೇ ಸಮವಾಗಿ ಬೆಳೆಯುತ್ತವೆ ಮತ್ತು ಹಾಳಾಗುವುದಿಲ್ಲ ಎನ್ನುತ್ತಾರೆ ರೈತರು.